Qazaq ädebietiniñ azulı aqını Esenğali Rauşanov. Foto: Ult.kz

Belgili aqın, "Jazuşı" baspasınıñ direktorı, Qazaqstan memlekettik sıylığınıñ laureatı Esenğali Rauşanov qaytıs boldı. Bwl aqparattı bügin, 16 säuirde Jazuşılar odağı basqarma törağasınıñ orınbasarı Aqberen Elgezek Facebook paraqşasında habarladı.

"Qadirli ağayın! Qazaqtıñ asa körnekti aqını, Qazaqstan Respublikası Memlekettik sıylığınıñ laureatı Esenğali Rauşanovtan ayırılıp qaldıq. Alla aldınan jarılqasın. Asıl ruhı beyiştiñ törinde şalqısın. Qosımşa aqparat keyinirek beriledi" dep jazdı Elgezek.

Esenğali Rauşanov 1957 jılı 5 qazanda Qaraqalpaqstanda tuğan. QazMU-diñ (qazirgi QazWU) jurnalistika fakul'tetin bitirgen. Öleñderi 1973 jıldan beri jariyalanıp keledi. 1983 jılı «Berdäulet pen Jolaman» attı poeması Qazaq KSR Baspa, poligrafiya jäne kitap saudası isteri jönindegi memlekettik komitetiniñ, Qazaqstan Jazuşılar odağı, Qazaqstan LKJO Ortalıq Komiteti men «Jalın» baspasınıñ ozıq şığarmalarğa jariyalağan bäygesinde birinşi orın aldı.

1983-1987 jıldarı "Jalın" jäne "Aray" jurnaldarında poeziya böliminiñ meñgeruşisi, jauaptı hatşı, 1988-1995 jıldarı "Bilim jäne eñbek" jurnalınıñ bas redaktorı qızmetin atqardı. 1995 jıldan eldegi eñ iri ädebi baspalardıñ biri "Jazuşı" baspasınıñ direktorı bolğan.

Onıñ öleñderi orıs, litva, bolgar, çeh, ukrain, özbek, qırğız tilderine audarılğan. Qazaqstan Lenin komsomolı sıylığınıñ jäne Halıqaralıq «Alaş» ädebi sıylığınıñ laureatı. Mäskeude ötken jas aqın-jazuşılar festivaliniñ, sonday-aq Qazaq KSR-i şığarmaşılıq jastarınıñ "Jiger" festivaliniñ twñğış laureatı. Qazaq KSR-i sıylıqtarımen jäne täuelsiz Qazaqstannıñ on jıldığı medalimen marapattalğan. Memlekettik sıylıqtıñ laureatı (2006), "Qwrmet" ordeniniñ iegeri.

Alaştıñ ayaulı "öleñine" aynalğan aqınnıñ otbası-tuıstarı, barşa oqırmandarı men ädebietsüyer qauımğa qayğıra köñil aytamız.

Qara bauır qasqaldaq

Qara bauır qasqaldaq, qayda wştıñ pır-pırlap?

Sazıñ qaldı säbidiñ eñbegindey bılqıldap.

 

Qarabauır qasqaldaq, qasqaldağım, keri qayt,

Sirep ketken toğayğa qamıqpa dep köñil ayt!

 

Wya qalsa iesiz, aydın üşin sol qayğı,

Qañğıp kelgen şüregey kölge pana bolmaydı.

 

Öz bosağañ bwl jerdiñ tauı, qırı, töbesi,

Bosağasın basqağa tastay ma eken, o nesi?

Qasqaldağım, keri qayt!..

"The Qazaq Times"