2020 جىلى بريتانيانىڭ حالىق سانى كەسكىن قىسقارىپ كەتتى. دەموگرافياداعى مۇنداي جاعدايى ەكىنشى دۇنيەجۇزىلىك سوعىستان بەرى بولىپ كورمەگەن. ەكسپەرتتەردىڭ راستاۋىنشا پاندەميا سەبەبىنەن ەلدەن شامامەن 1,3 ملن ادام شىعىپ كەتكەن.

2004 جىلى شىعىس ەۋروپاداعى بىرقاتار ولكەلەر ەو قۇرامىنا كىرگەننەن كەيىن بريتانيانى كوزدەي مىڭداعان ميگرانتتار اعىلعان بولاتىن. سول كەزدەگى بريتان ۇلتتىق ستاتيستيكا ورتالىعى ميگرانتتاردىڭ سانىن دالمە-ءدال انىقتاپ شىعۋ مۇمكىن ەمەس ەكەنىن ايتقان. ەكسپەرتتەردىڭ سوزىنشە قازىرگى جاعداي دا سونداي، ەلدەن شىعىپ كەتكەندەردىڭ سانىن انىق ايتۋ قيىن.

بريتانيادا حالىق سانىنىڭ كۇرت قىسقارىپ كەتكەنى تۋرالى دجوناتان پورتەس مەن مايكل و'كوننور اتتى ەكونوميستەر ءوز زەرتتەۋ ناتيجەسىن BBC-مەن بولىسكەن ەكەن. ولارزەرتتەۋلەرىنە سۇيەنە وتىرىپ 2019 جىلدىڭ ءۇشىنشى توقسانىنان 2020 جىلعا دەيىن ەلدەن 1,3 ملن شاماسىنداعى ميگرانت شىعىپ كەتكەن بولۋى مۇمكىن دەپ كورسەتتى. ولاردىڭ ەسەبىنشە، لوندون قالاسىنىڭ وزىنەن 700 مىڭ ادام شىعىپ كەتكەن، بۇل ورتالىق قالانىڭ 8 پايىز حالقى كەدەگەن ءسوز.

اتالعان زەرتتەۋشىلەر ميگرانتتار سانىنىڭ كەسكىن قىسقارۋىن پاندەميا سالدارىنان جۇمىس ورىندارىنىڭ قىسقارىپ كەتۋىمەن تۇسىندىرەدى. اسىرەسە، ميگرانتتار كوبىرەك جۇمىس ىستەيتىن مەيرامحانا، تۋريزم سالالارى كارانتيندىك شەكتەۋلەردەن كوپ زارداپ شەكتى. بۇل جاعدايدىڭ جاناما سەبەپتەرى قاتارىندا كوپتەگەن جوعارى وقۋ ورىندارىنىڭ ونلاين وقىتۋعا وتۋىمەن تۇسىندىرۋگە دە بولادى. بريتانياعا ءبىلىم ىزدەپ باراتىن شەتەلدىكتەر الىس ارالىقتى وقۋعا ءماجبۇر.

ميگرانتتار سانى كۇرت قىسقارقان ورتالىق قالا تەك لوندون ەمەس، ماسكەۋ دە پاندەميا كەزىندە وزىندەگى ميگرانتتاردىڭ 40 پايىزىن جوعالتتى. بۇل مالىمەتتى بىلتىر قاراشادا ماسكەۋ قالالىق ۇكىمەت رەسمي مالىمدەگەن بولاتىن. مالىمەتكە سايكەس، سالدارىنان قۇرىلىس جانە كوممۋنالدىق سالالار زارداپ شەككەن. ماسكەۋدەگى مۇنداي جاعدايدى بىلتىر كوكتەم جانە جاز ايلارىندا رەسەي شەكارالارىندا قامالىپ قالعان ورتا ازيالىق ميگرانتتار ماسەلەسىنەن-اق سالماقتاۋعا بولادى.

رف ۇكىمەتى تاراتقان بىرقاتار ستاتيستيكالىق مالىمەتتەردەن ەلدەگى ميگرانتتاردىڭ 54 پايىزى جۇمىسسىز قالعانىن نەمەسە اقىسىز ەڭبەكتەرمەن كۇن كورە باستاعانىن، 32 پايىزى تولىقتاي كىرىس كوزدەرىنەن ايىرىلعانىن بىلە الامىز. كەيبىر زەرتتەۋلەر ناتيجەسى رەسەيدەگى الەۋمەتتىك توپتار اراسىندا ميگرانتتاردىڭ ىندەتكە شالدىعۋ كورسەتكىشىنىڭ جوعارى ەكەنىن كورۋگە بولادى.

بۇعان دەيىن باتىس ەلدەرى، اسىرەسە باتىس ەۋروپا ەلدەرى ميگراتسيا اعىنىنان الاڭداپ كەلگەن. ميگرانتتار اعىمى ۇلتتىق قاۋىپسىزدىك پەن ەكونوميكالىق قاۋىپسىزدىككە قاۋىپ توندىرەدى دەپ قاراعان. الايدا، جاھاندىق ىندەتتەن كەيىن ميگرانتتار اعىنى ەكونوميكالىق وسىمگە سەرپىن بەرىپ وتىراتىنىن كورسەتتى. بۇنداي پىكىردى 2005 جىلى انگليا بانكىنىڭ جەتەكشىسى مەرۆين كيڭ دە ايتقان ەكەن. ەكسپەرتتەردىڭ ايتۋىنشا، الىپ شاھارلاردىڭ كوپ سانداعى ميگرانتتاردى جوعالتۋى قىسقا مەرزىمدى وڭ اسەر بەرگەندەي كورىنگەنىمەن، ەكرنوميكانىڭ ۇزاق ۋاقىتتىق دامۋ مۇددەسىنە كەرى اسەر ەتپەك.

“The Qazaq Times”