بۇۇ بوسقىندار ءىسى جونىندەگى جوعارى كوميسسيانىڭ جاڭا ەسەبىنە ساي، الەمدەگى بوسقىندار سانى 100 ميلليوننان استى. حالىارالىق قاۋىمداستىق بوسقىندار سانىنىڭ ارتۋىنا الەم ەلدەرىندەگى سوعىس، زورلىق-زومبىلىق جانە ادام قۇقىعىنىڭ بۇزىلۋى سىندى جايتتەردىڭ كوبەيۋى سەبەپ بولدى دەپ كورسەتكەن.

مالىمەتتەرگە ساي، 2021 جىلدىڭ سوڭىندا قونىس اۋدارعاندار سانىنىڭ الدىنعى جىلمەن سالىستىرعاندا 8 پايىزعا ارتىپ، 89,3 ميلليونعا جەتكەن. بۇل 10 جىلدا بوسقىن سانى ەكى ەسەدەن كوپ وسكەنىن كورسەتەدى. ال، اتالعان كوميسسيانىڭ ارنايى ەسەبىندە ايتىلۋىنشا، اقپان ايىندا رەسەيدىڭ ۋكرايناعا باسىپ كىرۋى ەكىنشى دۇنيەجۇزىلىك سوعىستان كەيىنگى ەڭ ءىرى ءماجبۇرلى قونىس اۋدارۋعا سەبەپ بولعان. بۇعان افريكادان اۋعانستانعا دەيىنگى بوسقىندار اعىنىن قوسقاندا الەمدەگى بوسقىندار سانى 100 ميلليون ادامنان اسىپ كەتكەن.

بوسقىندار سانىنىڭ بۇل كورسەتكىشى 2022 جىلدىڭ مامىر ايىنا دەيىنگى ساناقتى كورسەتەدى.  ايىرىقشا 2021 جىلدىڭ اياعىندا تومەن جانە ورتا تابىستى ەلدەر بوسقىنداردىڭ 83 پايىزىن شىعارعان. قازىر الەمدە بوسقىندار ەڭ كوپ جينالعان ەل رەتىندە تۇركيا اتالۋدا. وندا 3,5 ميلليون شاماسىنداعى سيريالىق جانە وزگە ورتا شىعىس ەلدەرىنەن بارعان بوسقىندار تۇرادى. ۆەنەسۋەللاداعى ساياسي-الەۋمەتتىك جاعدايعا بايلانىستى قونىس اۋدارعان بوسقىندار سانىمەن كولۋمبيا ەكىنشى ورىندى يەلەيدى. ءۇشىنشى ورىندا 1,5 ميلليوننان استام بوسقىنمەن پاكىستان، ءتورتىنشى ورىندا 1,5 ملن شاماسىنداعى بوسقىندار مەن ۋگاندا، بەسىنشە ورىندا گەرمانيا (1,3 ملن) جايعاسقان.

The Qazaq Times