پۋتين مەن شويگۋ. فوتو; CNBC

بۇگىن، 9 مامىر كۇنى ماسكەۋدەگى قىزىل الاڭدا جىلداعىداي اسكەري پاراد ءوتتى. الاڭدا ۇزاق بايانداما جاساعان پۋتين ءسوزىنىڭ كوبىن ۋكرايناداعى سوعىسقا ارنادى. دەگەنمەن، جۇرت بولجاعانداي ۋكرايناعا «رەسمي سوعىس جاريالاۋ» بولعان جوق.

سونداعى پرەزيدەنت ءپۋتيننىڭ ايتقان ءسوزى

قىزىل الاڭداعى ءسوزىن پرەزيدەنت پۋتين رەسەي تاريحىنداعى جەڭىستەر تۋرالى اڭگىمەدەن باستادى. ەكىنشى دۇنيەجۇزىلىك سوعىس تاريحى تۋرالى سوزدەن كەيىن ول: «قازىر دە سىزدەر ءبىزدىڭ دونباسستاعى جاراندار ءۇشىن، وتانىمىز – رەسەيدىڭ قاۋىپسىزدىگى ءۇشىن كۇرەسىپ جاتسىزدار»، – دەدى. ول سونداي-اق، ءفاشيزمدى تالقانداعان «جەڭىمپازداردىڭ قاھارمان بۋىنى» «بىزگە ساق بولۋدى وسيەتتەگەن» دەگەندەي گەپ قىلىپتى. بۇدان تىس بىلتىر جەلتوقساندا اقش پەن ناتو-عا قاۋىپسىزدىك كەپىلدىكتەرى تۋرالى ۇسىنىس تاستاعانىن اتاي وتىرىپ: «... ونىڭ ءبارى تەككە كەتتى، ناتو ەلدەرى ءبىزدى تىڭداعىسى كەلمەيدى»، – دەگەن پىكىرىن دە ورتاعا سالعان.

پۋتين بايانداماسىندا ۋكرايناداعى سوعىسقا كوبىرەك ءسوز ارنادى. فوتو: Kyiv Post

ءپۋتيننىڭ ايتۋىنشا ولار (ۋكراين جانە ونى قولداعان باتىس. QT) «دونباسستا كەزەكتى جازالاۋ وپەراتسياسىنا دايىندالىپ جاتىپتى»، بۇعان قوسا كيەۆ يادرولىق قارۋعا قول جەتكىزۋدىڭ ىقتيمالدىعىنا يە ەكەن. وسىلايشا رەسەيدى الاڭداتاتىن قاۋىپتى ارەكەتتەرى كەزەگىمەن بولىپ، دونباسستاعى سوعىسقا يتەرمەلەپتى.

رەسەي پرەزيدەنتى سوزىندە رەسەيلىك قارۋلى كۇشتەردىڭ ۋكرايناداعى ارەكەتى «اگرەسسيانى توقتاتۋعا جاسالعان پارمەندى سوققى» رەتىندە اتالدى، سونداي-اق، ۋكرايناداعى اسكەري ارەكەت بىردەن ءبىر دۇرىس شەشىم بولعانىن قايتالاعان. «دونباسس قوسىندارى رەسەي اسكەرلەرىمەن بىرگە ءوز جەرىندە سوعىسىپ جاتقانىن» ايتقان پۋتين: «سىزدەر ۇلى وتان سوعىسىنىڭ جەڭىسىن ەشكىم ۇمىتىپ قالماس ءۇشىن، ءوز وتاندارىڭىز بەن ونىڭ جارقىن بولاشاعى ءۇشىن كۇرەسىپ جاتسىزدار»، – دەپتى.

ءپۋتيننىڭ بۇگىن عانا اسكەري پاراد قارساڭىنداعى ءسوزىن الەمنىڭ كوپتەگەن اقپارات قۇرالدارى تالداپ جاتىر. ونىڭ ۋكرايناداعى ءوز ارەكەتتەرىن اقتاعان سوزدەرى قالاي دا قازىرگى ماسكەۋ بيلىگىنىڭ ۇستانىمىن تاعى ءبىر رەت ايقىندادى جانە ماسكەۋلىك ساياساتتىڭ جاقىن ارادا سوعىس توقتاتۋعا، بەيبىتشىلىك كەلىسسوزدەرىنە كەلۋ نيەتىنىڭ جوقتىعىنا سىرتقى الەمنىڭ كوزىن تاعى ءبىر مارتە جەتكىزگەندەي بولدى.

التىناي مۇرات