كورنەكى سۋرەت. فوتو: ۆاديم كۆياتكوۆسكي

دۇيسەنبى، 21 جەلتوقسان كۇنى پرەزيدەنت توقاەۆ ازيا دامۋ بانكى مەن ازيا ينفراقۇرىلىمدىق ينۆەستيتسيالار بانكىنەن جالپى سوماسى 1,6 ملرد ەۋرو قارىز الۋ تۋرالى زاڭعا قول قويعانى حابارلاندى.

قارىز كوروناۆيرۋسپەن كۇرەس جانە ەل ەكونوميكاسىن قالپىنا كەلتىرۋ شارالارىنا جۇمسالماق. بۇعان دەيىن قازاقستان پارلامەنت ءماجىلىسى قاراشا ايىنىڭ سوڭىندا ازيا دامۋ بانكى مەن ازيا ينفراقۇرىلىمدىق ينۆەستيتسيالار بانكىنەن جالپى سوماسى 1,57 ملرد ەۋرو (1,9 ملرد دوللار) قارىز الۋ تۋرالى زاڭدى ماقۇلداعان.

اقوردانىڭ مالىمەتىنشە، قازاقستان بيلىگى ازيا دامۋ بانكىنەن 908,5 ملن ەۋرو، ال ازيا ينفراقۇرىلىمدىق ينۆەستيتسيالار بانكىنەن 661,8 ملن ەۋرو الۋعا نيەتتى.

قارجى ءمينيسترى ەرۇلان جاماۋباەۆتىڭ قازان ايىنداعى مالىمدەمەسىنە سايكەس، كەلەر جىلعى جوسپار بويىنشا رەسپۋبليكا بيۋدجەتىنىڭ كىرىسى 11,4 ترلن، ال شىعىس 14 ترلن تەڭگە بولۋى ءتيىس. سونداي-اق، ۇلتتىق بانكتىڭ شىلدەدەگى ەسەبىندە ەلدىڭ سىرتقى قارىزى 159,8 ملرد  دوللارعا جەتكەنى ايتىلعان. تاراتىپ ايتقاندا، مەملەكەتتىك باسقارۋ ورگاندارى 11,8 ملرد دوللار، ۇلتتىق بانك 825 ملن  دوللار، ەكىنشى دەڭگەيلى بانكتەردىڭ 5,2 ملرد دوللار بورىشى بار. تاعى 101,2 ملرد دوللارى فيرماارالىق قارىزدىڭ ۇلەسىندە. قالعان 40,6 ملرد دوللار – مەملەكەت كەپىلدىگىمەن الىنعان قارىزدار.

ۇكىمەت پاندەميانىڭ كوكتەمگى تولقىنىندا-اق، العاشقى كارانتين كەزىندە كوروناۆيرۋسپەن كۇرەسكە جانە ونىڭ سالدارىنان تۋىندايتىن ەكونوميكالىق داعدارىسقا 5,9 ترلن تەڭگە بولەتىنىن مالىمدەگەن. ونىڭ 191 ملرد تەڭگەسى مەديتسينا سالاسىنا، قوماقتى بولىگى كارانتين رەجيمى كەزىندە تابىسىنان ايىرىلعاندارعا جاردەماقى تولەۋگە، كاسىپورىنداردى قولداۋعا جانە ەكونوميكانى قالپىنا كەلتىرۋگە باعىتتالعان.

ساراپشىلار مەن جەرگىلىكتى ماماندار قازاقستاندا شەتەلدەن الىنعان قارىزداردىڭ ءتيىمدى جۇمسالۋىنا كۇمانمەن قارايدى. ەلدە شەتەلدەن قارىزعا جانە ينۆەستيتسيا رەتىندە الىنعان قىرۋار قاراجات جوبالاردى ىسكە اسىرۋدىڭ ورنىنا جەمقورلىق جولىنا جۇتىلىپ كەتەتىن جاعداي از كەزدەسپەيدى. بۇعان مىسال بولا الاتىن اتىشۋلى قىلمىستىق ىستەر جەتكىلىكتى. جەمقورلىق يندەكسىن ەسسەپتەيتىن Transparency International ۇيىمىنىڭ ەسەبىندە قازاقستان 198 ەلدىڭ اراسىندا 113-ورىندا تۇر.

"The Qazaq Times"