ۇقشۇ-عا 30 جىل: رەسەي جەڭىلە باستاعاندا وتكەن سامميت

ماسكەۋدە ۇجىمدىق قاۋىپسىزدىك شارت ۇيىمىنىڭ 30 جىلدىعىنا وراي ۇيىمعا مۇشە ەلدەردىڭ جەتەكشىلەرى سامميتتە باس قوسىپ جاتىر. سامميت الدىندا رەسەي پرەزيدەنتى ۆلاديمير پۋتين پرەزيدەنتتەرمەن جەكە-جەكە كەزدەسۋ وتكىزۋدە. ۋكرايناداعى سوعىس قارساڭىندا ءوتىپ جاتقان بۇل جيىن كوپتىڭ نازارىن اۋدارارى ءسوزسسىز. ونىڭ ۇستىنە ۋكراينا رەسەي اسكەرىن حاركوۆتەن شەگىندىرگەنى تۋرالى اقپاراتتار تاراپ جاتقان تۇستا، ۇقشۇ ەلدەرى رەسەي جاعىنان كۇشتەپ ۋكراينا سوعىسىنا تارتىلماي ما دەگەن سۇراقتار الاڭداتۋدا.

كەزەكتى سامميت تۋرالى ماسكەۋدىڭ رەسمي مالىمدەمەسىنىڭ وزىندە ۇيىم جەتەكشىلەرىنىڭ باس قوسۋىندا ۋكرايناداعى سوعىس دا تالقىلاناتىنى ايتىلعان. قازىر سوعىس مايدانىنداعى حابارلاردان، ۋكراينا اسكەرلەرىنىڭ اكتيۆتى پوزيتسياعا وتكەنى تۋرالى مالىمەتتەر كوپ. بۇنداي جاعداي ۇقشۇ سىندى اسكەري-ساياسي ۇيىمنىڭ مۇشەسى بولعان قازاقستان ءۇشىن دە اۋىر سىناقتاردىڭ جاقىنداپ قالعانىن كورسەتكەندەي.

ۋكرايناداعى جالپى جاعدايعا قاراعاندا رەسەي ىرىقسىز ورىنعا ءتۇسىپ قالدى، ال بۇل ءۇردىس جالعاسسا رەسەي جەلڭىلۋى دە مۇمكىن. وسىعان بايلانىستى ماسكەۋ ۇقشۇ ەلدەرىنەن اسكەري كومەك سۇراۋى دا  عاجاپ ەمەس. بىراق، ماسكەۋدىڭ سۇراعان كومەگىن ۇيىم مۇشەلەرى بەرە قويۋى نەعايبىل، ولار بۇل سوعىستىڭ بولاتىنى، قانداي ارەكەت ەتكەلى وتىرعانى تۋرالى رەسەيدىڭ الدىن الا ۇيىم مۇشەلەرىمەن اقىلداسپاعانىن العا تارتارى انىق. ونىڭ ۇستىنە ۇيىم شارتىندا مۇشە ەلگە سىرتتان شابۋىل بولعان جاعدايدا عانا اسكەري كومەك بەرۋ قاراستىرىلعان. بىراق، رەسەي ءوزى شابۋىلعا ۇشىراۋشى ەل رەتىندە ستسەناري ۇيىمداستىرۋعا تاجىريبەلى ەكەنىن دە ەسكەرۋ كەرەك.

ەگەر ۇقشۇ-نىڭ قازىرگى جاعدايىن باعالايتىن بولساق، 30 جىل بولعان ۇيىم قازىر كۇردەلى جاعدايدى باستان كەشىرىپ جاتىر دەۋگە بولادى. سەبەبى، ۇيىمداعى نەگىزگى ءبىر ەل سوعىس جاعدايىندا تۇر. بۇل كەزەڭ ۇيىمنىڭ سوعىستى قالامايتىن وزگە مۇشەلەرى ءۇشىن قيىندىقتار تۋدىرادى.

رەسەي ءسىم تارابى كەزەكتى سامميت تۋرالى رەسمي مالىمدەمەسىندە ۇيىمنىڭ قىسقا ۋاقىت ىشىندە كوپ جۇمىستاردى اتقارعانىن العا تارتىپتى. مالىمدەمەدە: «مۇشە ەلدەردىڭ ورتاق ارەكەتى نەگىزىندە قاۋىپسىزدىككە قاتىستى ماسەلەلەردى ورتاق شەشەتىن، تولىق ءارى ەفەكتيۆتى قۇرىلىم ءتۇزىپ شىعارىلدى. ۇيىم قازىر وڭىرلىك قاۋىپسىزدىك پەن تۇراقتىلىقتىڭ سەنىمدى كەپىلىنە اينالدى»، – دەگەن. رەسەي سىرتقى ىستەر ۆەدومستۆولارى ءوز مالىمدەمەسىندە ۇيىمنىڭ ەفەكتيۆتىلىگىن كورسەتۋ ماقساتىندا قاڭتار وقيعاسى كەزىندە قازاقستانعا ۇيىم كۇشتەرىنىڭ كىرگەنىن العا تارتىپ جاتىر. بۇل دا بولسا ماڭىزدى شەشىمدەردى قابىلداۋدا بىزگە ۇلكەن قيىندىقتار تۋدىرارى ءسوزسىز.

The Qazaq Times