![](https://qazaqtimes.com/kk/content/uploads/2020/07/iQR8DEI8T-800x480.jpg?token=4b932fd2120739b4e7830ea6d9c53170)
دۇنيەجۇزى بويىنشا كوروناۆيرۋس جۇقتىرعاندار سانى 16,4 ميلليوننان استى. ساراپشىلار الداعى ۋاقىتتا ۆيرۋس دەرەگى قايتادان ارتىپ، ەكىنشى لوكداۋن بولۋى مۇمكىن دەيدى. وسى رەتتە پاندەميا كەزىندە الەم احۋالىنا شولۋ جاساپ كورەلىك.
گەرمانيانىڭ كەي ايماقتارىندا كارانتين تالاپتارى كۇشەيتىلدى. ەلدىڭ دەنساۋلىق ساقتاۋ ءمينيسترى اتاپ وتكەندەي، ەلدە اۋرۋ جۇقتىرۋ دەڭگەيى جوعارى ەلدەردەن، سونىڭ ىشىندە اقش پەن برازيليا، سونداي-اق تۇركيادان كەلگەن بارلىق دەمالۋشىلار ءۇشىن كوروناۆيرۋس مىندەتتى تەست تاپسىرۋ ەنگىزىلەدى.
وسى اپتادا بەلگيانىڭ ۇلتتىق قاۋىپسىزدىك كەڭەسى شەكتەۋلەردى الىپ تاستاۋدىڭ بەسىنشى كەزەڭىن ەنگىزۋدى كەيىنگە قالدىردى. كەرىسىنشە، ەلدە اۋرۋ جۇقتىرعاندار سانىنىڭ وسۋىنە بايلانىستى ماسكا تاعۋ رەجيمىن كۇشەيتۋ تۋرالى شەشىم قابىلدادى.
ۇلىبريتانيا مەن فرانتسياداعى احۋال دا ءماز ەمەس. قوس مەملەكەت تە جاپپاي ۆاكتسيناتسيالاۋعا ءۇمىت ارتىپ وتىر. فرانتسيادا حالىق ماسكا تاعۋعا مىندەتتەلدى. ال بىرىككەن كورولدىك BioNtech, Pfizer جانە Velneva كومپانيالارى وندىرەتىن ۆاكتسينانىڭ 90 ملن دوزاسىن ساتىپ الماق. سونىمەن قاتار بيلىگى گەنەتيكالىق كود فراگمەنتى بار ۆاكتسينانى ازىرلەيتىن BioNtech جانە Pfizer اليانسىنا 30 ملن دوزاعا، ال Valneva كومپانياسىنا 60 ملن كولەمىندە تاپسىرىس بەرگەن. الداعى ۋاقىتتا ۇلىبريتانيا بيلىگى الداعى ۋاقىتتا حالىقتى تۇماۋعا قارسى ەگۋ بويىنشا اۋقىمدى شارا وتكىزۋدى جوسپارلاپ وتىر. ازاماتتاردىڭ كەي توبىن تەگىن ەگۋ دە قاراستىرىلعان.
كوروناۆيرۋستان قاتتى زارداپ شەككەن يتاليادا پاندەميانىڭ الدىن الۋ ءۇشىن كارانتين تالاپتارىن كۇشەيتۋ تۋرالى جارلىق قابىلداندى. جارلىقتىڭ نەگىزگى شارالارىنىڭ ءبىرى – جابىق مەكەمەلەر مەن بارلىق قوعامدىق ورىنداردا، كولىكتە ماسكا تاقپاعاندارعا 1 مىڭ ەۋرو مولشەرىندە ايىپپۇل سالۋ. ەگەر بيزنەس وكىلدەرى تالاپقا باعىنباسا، اتالعان سومادان بولەك، كاسىپ 5-تەن 30 كۇنگە دەيىنگى مەرزىمگە جابىلۋى مۇمكىن.
مۇنىمەن قاتار، ۇكىمەت باسشىسى دجۋزەپپە كونتە توتەنشە جاعداي رەجيمىن قازاننىڭ ورتاسىنا دەيىن سوزۋ تۋرالى شەشىم قابىلدادى. يتاليا ددۇ ەسكەرتكەن ەكىنشى تولقىننان ساقتاۋ ءۇشىن وسىنداي شارا ەنگىزىپ وتىر.
قازىر ەلدە اۋرۋ جۇقتىرعان 242 000–نان استام جاعداي تىركەلگەن، 35 مىڭنان استام ادام قايتىس بولعان.
يسپانياداعى كاتالونيا بيلىگى سوڭعى 10 كۇندە كوروناۆيرۋس جۇقتىرۋشىلار سانى ارتسا، كارانتين شارالارىن قايتا قاتاڭداتپاق. رەسمي دەرەكتەر بويىنشا، ەۋروپادا ۆيرۋس جۇقتىرۋ دەرەگى كۇن ساناپ ارتقان مەملەكەت قاتارىندا يسپانيا كوش باستاپ تۇر. ماۋسىمدا يسپانيادا ەل بويىنشا كۇنىنە 250 اۋرۋ جۇقتىرۋ وقيعاسى تىركەلسە، وسى اپتادا ءبىر كۇندە 1,5 مىڭ كوروناۆيرۋسكە شالدىعۋ دەرەگى تىركەلگەن.
اۋستريا ەپيدەميولوگيالىق جاعدايى قولايسىز ەلدەردەن كەلۋشىلەر ءۇشىن ەلگە كىرۋ ەرەجەسىن كۇشەيتتى. ەندى 32 مەملەكەتتەن كەلۋشىلەر كوروناۆيرۋسقا تاپسىرعان پتر-تەست تەرىس ناتيجە كورسەتسە عانا ەلگە كىرە الادى.
2021 قاڭتاردا ەۋروپا عالىمدارنىڭ كوروناۆيرۋسقا قارسى پرەپاراتى ساتىلىمعا شىعادى دەپ جوسپارلانعان. ءدارىنى وكسفورد ۋنيۆەرسيتەتىنىڭ ماماندارى، «استرازەنەكا» كومپانياسى جانە يتاليالىق عالىمدار بىرلەسىپ وندىرگەن. كەلىسىم بويىنشا، قۇنى 2-3 ەۋرو بولاتىن ەكپە الدىمەن يتاليا مەن ۇلىبريتانياعا، كەيىن نيدەرلاند، گەرمانيا مەن فرانتسياعا جەتكىزىلەدى. بارلىعى شامامەن 30 ملن دوزا وندىرىلمەك. ءبىرىنشى كەزەكتە ءدارى ينفەكتسيانى اۋىر وتكەرەتىن ادامدارعا ەگىلەدى.
امەريكا ۆيرۋس جۇقتىرۋ دەرەگى بويىنشا انتيرەكورد ورناتىپ، تىزىمدە ءبىرىنشى ورىندا تۇر. رەسمي ۋاشينگتون دا جاپپاي ۆاكتسيناتسيالاۋعا ءۇمىت ارتىپ وتىر. جەرگىلىكتى مودەرنا بيوتەحنولوگيالىق كومپانياسى كوروناۆيرۋسقا قارسى ۆاكتسينانى سىناقتان وتكىزۋدىڭ ءۇشىنشى ءارى سوڭعى كەزەڭىن باستاپ كەتتى. الەمدەگى ەڭ اۋقىمدى زەرتتەۋگە 30 مىڭ ەرىكتى قاتىسپاق. جوبانىڭ قارجىسى دا قوماقتى. اقش بيلىگى قوسىمشا 472 ميلليون دوللار بولگەن. كوكتەمدە عانا وسى مودەرنا كومپانياسى ۆاكتسينا جاساپ شىعارۋعا 483 ميلليون العان
ۆاتسينا ءوندىرىسى وڭ ناتيجە بەرەدى دەگەن اق ءۇي باسشىسى دونالد ترامپ: «ءبىز بۇل ۆيرۋستى جەڭەمىز. مودەرنا كومپانياسى ۆاكتسينانى كلينيكالىق سىناقتان وتكىزۋدىڭ سوڭعى كەزەڭىن باستاپ كەتتى. ساناۋلى كۇننەن كەيىن تاعى ءبىر ەكپەنى، سوسىن ءبىر-ەر اپتانىڭ ىشىندە 4 پرەپاراتتى كلينيكالىق سىناقتان وتكىزۋدىڭ سوڭعى كەزەڭى باستالادى. ءبىز ادەتتە بىرنەشە جىل ۋاقىتتى قاجەت ەتەتىن جۇمىستى شەكتەۋلى مەرزىمدە ورىنداپ شىقتىق»، – دەيدى.
لاتىن امەريكاسى ەلدەرى مەن افريكا ۆيرۋستىڭ وشاعىنا اينالعان. ال يراندا ۆيرۋستىڭ ەكىنشى تولقىنى باستالىپ، كوروناۆيرۋس دەرەگى ارتتى. ەلدە سوڭعى تاۋلىكتە كوروناۆيرۋس جۇقتىرعان جاڭا وقيعالار سانى – 2 333 بولسا، ىدەتتەن كوز جۇمعانداردىڭ جالپى سانى 15,7 مىڭ.
ءۇندىستان كوروناۆيرۋسقا قارسى ۆاكتسينانى العاش رەت ادامدارعا ەگىپ، سىناقتان وتكىزۋدى باستادى. مۇندا سOVID-19 ىندەتىنە شالدىققان ناۋقاستاردىڭ جالپى سانى 1,4 ميلليوننان استى. كوروناۆيرۋس ينفەكتسياسىنان 32 771 ادام كوز جۇمعان.
كورشى مەملەكەتتەردە كەسەلدى ۆيرۋستىڭ بەتى قايتپاي تۇر. رەسەيدە كوروناۆيرۋس انىقتالعاندار سانى 823 515 ادامعا جەتكەن. ەلدە ۆيرۋستىڭ كۇن ساناپ قارقىن الۋىنا قاراماستان، ەلدىڭ بىرقاتار ايماقتارىندا بيلىك پەن گۋبەرناتور سەرگەي فۋرگالدىڭ سوتتالۋىنا قارسى ميتينگتەر ءوتىپ جاتىر. ۋكراينا مەن بەلارۋستە 67 مىڭنان استام ناۋقاس تىركەلگەن.
قازاقستان دەنساۋلىق ساقتاۋ مينيسترلىگى ەلدە 20-26 شىلدە ارالىعىندا كوروناۆيرۋستان 208 ادام قايتىس بولعانىن حابارلادى. رەسمي مالىمەت بويىنشا، ەلدە 793 ادام COVID ىندەتىنەن كوز جۇمعان. ەلدە جالپى سانى 84 648 ناۋقاس بار. دەگەنمەن، ساراپشىلار قازاقستانداعى كوروناۆيرۋستان قايتىس بولعانداردىڭ سانىنا كۇمانمەن قارايدى. سەبەبى بيلىك كوروناۆيرۋستان قايتىس بولعانداردىڭ ستاتيستيكاسىنا اپتاسىنا ءبىر رەت جاريالاپ وتىر جانە كوروناۆيرۋس جۇقتىرعان كەم دەگەندە 319 مارقۇمدى «ولىمىنە باسقا دەرت سەبەپ بولدى» دەپ رەسمي ستاتيستيكاعا قوسقان جوق.
قىرعىزستاندا 33 مىڭنان استام ادامنان ۆيرۋس انىقتالدى. مۇندا قۇربان ايت مەرەكەسى كەزىندە مەشىتتەردە ناماز وقىلىپ، قوعامدىق شارالار وتكىزىلمەيدى. بۇل شەشىم كوروناۆيرۋس ىندەتى تارالماس ءۇشىن قابىلداندى. ال وزبەكستاندا بىرنەشە كۇنگە بارلىق كولىك قوزعالىسىنا ۋاقىتشا تىيىم سالىندى. ەلدە 21 699 ادام دەرتكە شالدىققان.
قازىرگى ۋاقىتتا الەم بويىنشا COVID-19 ۆيرۋسىن 16,4 ميلليوننان استام ادام جۇقتىرعان. قايتىس بولعاندار سانى – 653 مىڭنان استام. جازىلىپ شىققاندار – 905 ميلليون. وسى اپتادا ددۇ-نىڭ پاندەمياعا بايلانىستى توتەنشە جاعداي جاريالاعانىنا جارتى جىل تولادى. ۇيىم وكىلدەرىنىڭ زەرتتەۋىنشە، «COVID-19 الەمدەگى ەڭ قيىن توتەنشە جاعداي».
ددۇ باس ديرەكتورى تەدروس ادحانوم گەبرەيەسۋس: «سوڭعى التى اپتادا اۋرۋ جۇقتىرۋ دەرەگى ەكى ەسە ارتقان. 30 قاڭتاردا توتەنشە جاعايدا جاريالاعاندا، قىتايدان تىس جەردە تىركەلگەن ناۋقاستار سانى جۇزدەن اسپايتىن جانە ودان ەشكىم كوز جۇمعان جوق ەدى. حالىقارالىق سانيتارلىق ەرەجەلەرگە سايكەس، توتەنشە جاعداي بويىنشا كوميتەت جيىنىن وتكىزەمىن. ول پاندەمياعا بايلانىستى جاعدايدى قايتا باعالاۋعا مۇمكىندىك بەرەدى»، – دەپ مالىمدەدى.