اقش پەن ءۇندىستان قىتاي ىقپالىنا قارسى ىنتىماقتاستىق قۇرۋدا

كەشە ۋاشينگتوندا اقش پەن ءۇندىستاننىڭ سىرتقى ىستەر جانە قورعانىس ۆەدمستۆو باسشىلارى كەزدەسىپ، «2+2» فورماتى اياسىندا قورعانىس جانە تەحنولوگيالار ىنتىماقتاستىعىن نىعايتۋعا كەلىستى. بۇل ارقىلى اقش پەن ءۇندىستان بىرلەسكەن اسكەري وقۋ جاتتىعۋلاردىڭ كۇشى مەن كولەمىن ارتتىرۋدى كوزدەپ وتىر.

شاراعا اقش مەم. حاتشىسى مايكل پومپەو، قورعانىس ءمينيسترى مارك ەسپەر، ءۇندىستاننىڭ ءسىم باسشىسى سۋبراحمانيام دجايشانكار جانە ءۇندىستان قورعانىس ءمينيسترى رادجنات سينگح قاتىستى. كەزدەسۋدەن كەيىن تورتەۋ ارا ءباسپاسوز جيىنىن وتكىزدى.

ءباسپاسوز جيىنىندا بەلگىلى بولعانداي، اقش-ءۇندىستان اراسىندا عىلىم-تەحنيكانى دامىتۋ ماقساتىندا ايتۋلى جوباعا قول قويعان. جالپى ەكى ەل اراسىندا بۇعان دەيىن دە تەحنولوگيانى دامىتۋ باعىتىندا تابىستى جوبالار جۇمىس ىستەپ كەلگەن ەدى.

ارتىپ كەلە جاتقان قىتاي ىقپالىنا قارسى تۇرۋ                                    

اقش پەن ءۇندىستاننىڭ قورعانىس جانە تەحنولوگيا سالاسىندا ىنتىماقتاستىقتى ارتتىرۋ ارەكەتى قىتايدىڭ ارتىپ كەلە جاتقان ىقپالىنا قارسى جاسالىپ وتىرعانى انىق. قىتاي تاقىرىبىن ەكى ەلدىڭ لاۋازىمدى تۇلعالارى باسقارىپ اشقان ءباسپاسوز جيىنىندا دا كوبىرەك تالقىلادى. ايتالىق، پومپەو سوزىندە: «قىتاي تۋرالى ايتار بولساق، ءبىز قىتاي بايلانىس جەلىلەرىنىڭ، سونىڭ ىشىندە 5G تەحنولوگياسىنىڭ ءبىزدىڭ ەركىندىگىمىزگە اكەلەتىن قاتەرلەرى تۋرالى تالقىلادىق. ءۇندى-تىنىق مۇحيتى ايماعىنداعى قىتايدىڭ ادىلەتسىز جانە جىرتقىش ەكونوميكالىق ارەكەتتەرى بوستاندىققا قاۋىپ توندىرەدى»، – دەدى.

اقش سوڭعى جىلدارى ءۇندى-تىنىق مۇحيتىنداعى قىتاي ىقپالىن توقتاتۋ ءۇشىن ايماقتاعى ەلدەرمەن قورعانىس ىنتىماقتاستىعىن جانداندىردى. ايتالىق، وڭتۇستىك قىتاي تەڭىزىنە شەكتەسەتىن فيليپپين، ۆەتنام قاتارلى ەلدەرمەن، سونداي-اق، ءۇندىستان، جاپونيا، اۋستراليا سەكىلدى وڭىردەگى ءىرى مەملەكەتتەرمەن دە بۇل سالادا تابىستى ىنتىماقتاستىق جاساستى.

دەگەنمەن...

دەگەنمەن، اقش پەن ءۇندىستاننىڭ بۇل قادامدارى ەكى ەلدىڭ دە ىشكى قايشىلىقتارى اسقىنىپ تۇرعان تۇستا جاسالۋدا. ايتالىق، پرەزيدەنت ترامپ، يمپيچمەنت قىسىمىندا تۇر. پومپەو بۇنى «اقىماقتىق جانە شۋ-شۇرقان» دەپ باعالادى. ءارى، بۇل ارەكەتتەر ۇكىمەتتىڭ ۇلتتىق قاۋىپسىزدىككە باسا نازار اۋدارۋىنا بوگەت بولا المايدى دەپ كورسەتتى.

ال، ءۇندىستان ءوز ىشىندە «ازاماتتىققا قابىلداۋ تۋرالى» جاڭا زاڭ جوباسى ەلدەگى مۇسىلمانداردىڭ قارسىلىعىنا تاپ بولدى. ءبىر اپتاعا جۋىق ۋاقىتتان بەرى ەلدىڭ بىرنەشە قالاسىندا نارازىلىق شەرۋلەرى ءوتىپ، ونىڭ سوڭى پوليتسيامەن قاقتىعىسقا ۇلاستى.

“The Qazaq Times”