رەسەي دونباسس ايماعىنداعى اسكەري كۇشىن بىرگەشە ەسەگە كوبەيتۋى مۇمكىن. فوتو: Atlantic Council

ۋكراينا مەن رەسەي اسكەرلەرى نەگىزىنەن دونباسس ايماعىنا قاراي جينالىپ تۇر. ءالى دە سوعىستى توقتاتۋ بويىنشا كەلىسىمنىڭ توبەسى كورىنبەيدى. قوس تاراپتىڭ ءىس-قيمىلدارىنا قاراي وتىرىپ كوپتەگەن ساراپشىلار مەن اقپارات قۇرالدارى دونباسس ايماعىندا بولعالى جاتقان سوعىس قيان-كەسكى بولادى دەپ بولجاۋدا.

كوپتەگەن شەتەلدىك ەكسپەرتتەر دونباستا بولعالى جاتقان سوعىس ەكى ەل ورتاسىنداعى جالپى قايشىلىقتىڭ بولاشاعىن شەشەدى دەپ سانايدى. بۇل شايقاس رەسەي-ۋكراينا سوعىسىنىڭ سوڭعى باسقىشى دەپ جاتقاندار دا بار. قازىرگە دەيىن وسى ايماقتان 100 مىڭ شاماسىنداعى بەيبىت تۇرعىن ءبىرشاما قاۋىپسىز دەگەن باتىس ايماقتارعا قاراي بوسىپ كەتتى. رەسەيگە وتكەندەر دە بار.

رەسەيدىڭ اۋىر قوسىنى ۋكراينانىڭ شىعىسىنا بەت العانىن باتىس اقپارات قۇرالدارى جەرسەرىكتەردەن تارتىلعان سۋرەتتەر ارقىلى دا كورسەتىپ جاتىر. ۋكراينا دا ءوز كەزەگىندە قولىندا بار جانە باتىس ەلدەرى بەرگەن قارۋ-جاراقتارىن وسى ايماققا توپتاستىرىپ جاتىر، ولاردىڭ قاتارىندا قازىرگە دەيىن كوپكە تانىس بولعان تانكىگە قارسى شاعىن زىمىرانداردان تارتىپ اۋە قورعانىس جۇيەلەرى دە بار. الايدا، توپتاستىرىلعان اسكەر مەن اسكەري تەحنيكانىڭ سانى جاعىنان رەسەي مەن ۋكراينانى تاعى دا سالىستىرۋعا كەلمەيتىندەي.

ءدال قازىرگى كەزدىڭ وزىندە تاراپتار ءبىر-ءبىرىنىڭ اسكەري نىساندارى كوزدەپ تىنباي اتىسىپ جاتىر. بىراق، سونىڭ وزىندە دونباسس ءۇشىن سوعىس تولىققاندى باستالمادى. ايماقتا قوس تاراپتان دا 30-40 مىڭنان اسكەرلەر بار، دەگەنمەن رەسەي ءوزىنىڭ وسى ايماقتاعى كۇشىن بۇدان بىرنەشە ەسە كوبەيتۋدى ماقسات ەتىپ جاتقانىن پەنتاگون دا ايتقان. قازىرشە، رەسەي اۋقىمدى اۋماقتاعى اسكەري كۇشتەرىن قايتا جاساقتاپ ۇلگىرمەي جاتقانىن بولجاي الامىز. رەسەي جاعى اۋەدەن باسىمدىققا يە بولۋعا كۇش سالعانىمەن ونىڭ ءوزىن تولىق جۇزەگە اسىرا الماعانى انىق، سوعىس دالاسىندا ءتىلشى اتتاندىرا العان اقپارات قۇرالدارىنىڭ دەرەگىنشە ۋكراينانىڭ اۋە قورعانىس جۇيەلەرى، رادارلارى جۇمىس ىستەپ تۇر.

رەسەي ۋكراينا شىعىسىنا سالماقتى كۇشىن سالعىسى كەلىپ جاتساپ، ۋكراينا بۇعان دەينى دە سوعىس وپەراتسيالارىن ورىنداپ كەلگەن ەڭ تاجىريبەلى قوسىندارىمەن ءوزىنىڭ قورعانىستاعى جانە تاكتيكالىق ۇيىمداستىرۋداعى ارتىقشىلىعىن پايدالانىپ كورمەك. قوس تاراپتىڭ وسىنداي ءىس-قيمىلدارى دونباسس ايماعى ءۇشىن بولاتىن كۇرەستىڭ بۇرىنعىدان الدە قايدا قيان-كەسكى بولاتىنىن كورسەتكەندەي.

The Qazaq Times