ليدەرلەر بالالارعا بەرگەن ۋادەسىن ورىنداعان جوق: بۇۇ بالالار ومىرىنەن الاڭداۋدا

بۇۇ-نىڭ كەشەگى وتىرىسى بالالاردى قورعاۋ تاقىرىبىندا بولدى. جيىنىڭ باستالۋى الدىندا بۇۇ باس حاتشىسى انتونيۋ گۋتەررەش مىرزا بايانداما جاساپ، بۇدان 30 جىل بۇرىن الەم ليدەرلەرى بالالار ءۇشىن سالتاناتتى تۇردە ۋادە بەرىپ، باس قوسقانىن ەسكە سالدى. بۇۇ مالىمەتتەرىنە قاراعاندا الەمنىڭ بيلەۋشى ليدەرلەرى جاعىنان بەرىلگەن كول-كوسىر ۋادەلەردىڭ ەشقايسىسى دا تولىق ورىندالماعانداي.

بۇۇ تاراتقان مالىمەتكە قاراعاندا، جاڭا زامان بالالارى ءۇشىن جاڭا قورقىنىشتار كوبەيدى. ايتالىق، ءبىز بالالاردى كليمات وزگەرىسى قاتەرىنەن، ۇزاققا سوزىلعان قاقتىعىستار، ميگراتسيا جانە عالامتوردىڭ تەرىس اسەرىنەن قورعاي الماي وتىرمىز. سوڭعى 30 جىل ىشىندە بالالار ءولىمى 60 پايىزعا ازايعان. الايدا، قازىردىڭ وزىندە ميلليونداعان بالالاردىڭ تاعدىرىنا كەدەيلىك پەن اشتىقتان بولاتىن ءولىم قاتەرى ءتونىپ تۇر. بۇدان تىس مەكتەپ قابىرعاسىن كورە الماعان نەمەسە زورلىق-زومبىلىق ارەكەتتەرىنە ۇشىراپ جاتقان بالالار سانى دا كوپ.

يۋنيسەف مالىمەتىنە سەنسەك، بالالاردىڭ زورلىق-زومبىلىققا ۇشىراۋى، ءبىلىم الا الماۋى، كەدەيشىلىكتە ءومىر ءسۇرۋى تاعى باسقا پروبلەمالار تۇبەگەيلى شەشىم تاپقان جوق، سۇيتە تۇرا وعان جوعارىدا اتالعانداي جاڭا قاۋىپ-قاتەرلەر قوسىلۋدا. بۇلاردى تولىعىمەن جويۋ ءۇشىن الەم ەلدەرى ىزگىلىككە قۇرىلعان ورتاق ساياسي قادام جاساۋى كەرەك دەيدى يۋنيسەف.

بالالاردىڭ قاۋىپسىزدىگى مەن ولاردىڭ قالىپتاسۋىنا اسەر ەتەتىن فاكتورلاردى زەرتتەگەن زەرتتەرمەن عالىمدار جالپى ادامزات قوعامىندا بولاشاعىنا دەگەن جاۋاپكەرشىلىك سەزىمىنىڭ السىرەگەنىن ايتادى. ايتالىق، ءبىز بالالارىمىزدى قانشالىقتى جاقسى كورىپ، باۋلىعانىمىزبەن ءبىز ولارعا لاستانعان ورتانى، تاۋسىلماس داۋ-دامايدى، اقىرى جوق سوعىستاردى، جانجالداردى قالدىرىپ وتىرمىز دەپ سانايدى. ولاردىڭ پىكىرىنشە، ءبىز بالالارعا جاڭا زامان تەحنولوگيا جەتىستىكتەرىنىڭ قاتەرى تۋرالى جەتەرلىك ەسكەرتە الماي كەلەمىز. وسىلايشا ءبىز ءوزىمىزدىڭ ۇرپاقتارمىز الدىنداعى جاۋاپكەرلىكتەن جالتارىپ وتىرمىز.

“The Qazaq Times”