10 تامىز، سەنبى كۇنى ماسكەۋدە 60 مىڭعا تارتا نارازىلاردىڭ قاتىسۋىمەن رۇقسات ەتىلگەن ميتينگ بولىپ ءوتتى. «بۇل جيىن بۇرىنعىدان وزگەرەك» دەپ باعالانعان وقيعانىڭ جاي-جاپسارىنا ءۇڭىلىپ كورسەك.

"ماسكەۋ جاڭعىرىعى" راديوسىنا بەرگەن پىكىرىندە  قۇقىق قورعاۋشى، ا.د. ساحاروۆ اتىنداعى مۋزەيدىڭ بۇرىنعى ديرەكتورى، قوعام بەلسەندىسى  يۋري سامودۋروۆ "شامامەن ساعات 13.40-تان 17.00-گە دەيىن ساحاروۆ داڭعىلىنداعى ميتينگتە بولدىم. ول جەردەگى جيىن اياقتالعان سوڭ كوپشىلىكپەن ەسكى الاڭعا بارا المادىم. شارشاپ، قاۋقارىم جەتپەدى", – دەپ ەسكە الادى سەنبى كۇنگى ميتينگ تۋرالى. ول ءوز سوزىندە "ەڭ الدىمەن، مەن تۇتقىندالعان نارازىلىق ليدەرلەرى الەكسەي ناۆالنىيسىز جانە "دەپۋتاتتىق سايلاۋعا جىبەرىلمەگەن 13  وپپوزيتسيالىق كانديداتسىز" وتكەن ميتينگ ۇيىمداستىرۋشىلارىنا ەرەكشە العىسىمدى بىلدىرگىم كەلەدى. سونداي-اق بۇگىنگى ساحاروۆ داڭعىلىنداعى رۇقسات ەتىلگەن ميتينگىگە 27 شىلدە مەن 3 تامىزدا سانكتسيالانباعان  اكتسيالاردان، 20 شىلدەدەگىدەن كەم دەگەندە ەكى ەسە كوپ، ياعني 40-تان 50 مىڭعا دەيىن ادام كەلدى",– دەيدى. اكادەميك ساحاروۆ داڭعىلىنداعى رۇقسات ەتىلگەن ميتينگكە "بەلىي سچەتچيك" مالىمەتى بويىنشا باستاپقىدا 49 مىڭ 900 ءجۇز دەپ بەرىلگەن، ارتىنان كەشكىلىك جاڭالىقتاردا 60 مىڭعا تارتا ادام قاتىسقان دەپ جاڭارتىلىپ بەرىلگەن. ال ءىىم «20 مىڭداي ادام» جينالدى دەپ حابارلادى. جاۋىندى كۇن رايىنا قاراماستان ەڭ ءجيى ايتىلعان «دوپۋسكاي!» جانە «وتپۋسكاي»، قوسىمشا «روسسيا بۋدەت سۆوبودنوي!»، «روسسيا بەز پۋتينا!»، «پۋتين – ۆور!» دەگەن ۇراندارمەن دەمونسترانتتار بىرنەشە ساعات ءوز قارسىلىعىن بىلدىرگەن.

ميتينگتە جۋرناليست لەونيد پارفەنوۆ، ۇستالعان بەلسەندى دميتري گۋدكوۆتىڭ ايەلى ۆالەريا گۋدكوۆا، ستەنداپ-كوميك ءارى بەلگىلى بلوگەر دانيلا پوپەرەچنىي، الەكسەي پوليحوۆيچتەر ارنايى قۇرىلعان ساحنادان اشىق مالىمدەمەلەر جاسادى. قازىرگى "ماسكەۋ ءىسى" اتىمەن بەلگىلى تەرگەۋ ىسىنە «كۇدىكتى» رەتىندە تارتىلعان 22 جاستاعى مانەرلەپ سىرعاناۋشى دانيل كونوننىڭ اناسى ءسوز سويلەدى. كوزگە تۇسەتىندەي قوعامدىق ءتارتىپ بۇزۋشىلىقتار بولعان جوق. ساحنادان ساياساتكەرلەر مەن قوعام قايراتكەرلەرىنەن باسقا بىرنەشە مۋزىكالىق توپتار مەن رەپەرلەر ءوز ۇستانىمدارىن جاريالاپ، ونەر كورسەتتى.

ميتينگتى ۇيىمداستىرۋشىلار بيلىككە قوياتىن تالاپتارىن ايقىنداپ، قارار قابىلدادى. ولاردىڭ ىشىندە – الدىندا وتكەن اكتسيالاردا "جاپپاي تارتىپسىزدىكتەرگە كۇدىكتى" رەتىندە ايىپ تاعىلعان بارلىق وپپوزياتسيالىق تۇتقىنداردى بوساتىپ، قىلمىستىق ءىستى توقتاتۋ، سايلاۋعا دەيىن بارلىق تاۋەلسىز كانديداتتاردى بوساتۋ جانە موسگوريزبيركوم كوميسسياسىنىڭ باسشىسى ۆالەنتينا گوربۋنوۆانى وتستاۆكاعا جىبەرۋ تۋرالى تالاپتار اتالعان.

الداعى 8 قىركۇيەكتە موسگوردۋما سايلاۋى وتەتىنى ءمالىم. سايلاۋ كوميسسياسى سايلاۋعا قاتىسۋعا 233 كانديداتتى قابىلداپ، 57 ۇمىتكەردىڭ ءوتىنىمىن "بەلگىلى ءبىر سەبەپتەرمەن" قاناعاتتاندىرماعان  (سوڭعى سايلاۋدا تىركەۋگە 107 ءوتىنىم قابىلدانباي، وتكىزىلمەي تاستاعان بولاتىن). وسك مالىمەتىنە قاراعاندا، كوپتەگەن زاڭ بۇزۋشىلىقتار انىقتالعان: تىركەلمەگەن 22 كانديداتتىڭ قولداۋشىلارى تىزىمىندە "339 قايتىس بولعان ادامنىڭ ورنىنا قول قويىلعان", ال 29 وتكىزىلمەگەن ۇمىتكەردىڭ تىزىمىنەن 14 مىڭنان استام "جاساندى" سايلاۋشىلار تابىلعان.

وۆد-ينفو اگەنتتىگىنىڭ اقپاراتتارىنا قاراعاندا، قارسىلىق شارالارىن باقىلاۋ بارىسىندا قۇقىق قورعاۋ ورگاندارى 350-دەن استام ازاماتتى ۇستاپ الىپ كەتكەن. اۋەسقوي وپەراتورلار مەن بلوگەر، مەديا وكىلدەرىنىڭ درون كامەرالارى ارنايى قۇرىلعىلارمەن اۋەدە ءتۇسىرىلىم جاساپ جاتقان جەرىنەن تارتىپ الىنعان.

ۇستالعاندار تۋرالى اقپارات:

جالپى ۇستالعاندار: 352 ادام

ماسكەۋ – 256

پەتەربۋرگ – 79

روستوۆ-نا-دون – 13

بريانسك – 2

سىكتىۆكار – 2

 

پوليتسيا قىزمەتكەرلەرىمەن كونفليكتىگە كەلگەندەر: 6

كامەلەتكە تولماعاندار: 28

ۇستالعان جۋرناليستەر: 3

ۇستالعاندار اقبتك 20.2-بابىنىڭ 5-بولىگى بويىنشا «اكتسيالارعا قاتىسۋ ەرەدجەسىن بۇزۋ» نەگىزىندە ايىپتالعان. ولارعا 20 مىڭ رۋبلگە دەيىن ايىپپۇل نەمەسە 40 ساعاتقا قاماۋ تۋرالى ۇكىم شىعارىلعان.

ماسكەۋگە بولىسقان قالالار

رەسەيدىڭ ماسكەۋدەن باسقا قالالارىندا وتكەن جاپپاي نارازىلىق اكتسيالارى:

حاباروۆسك: 500-گە جۋىق ادام،

ەكاتەرينبۋرگ: شامامەن 300 ادام،

نوۆوسيبيرسك: 200-دەن 300 ادامعا دەيىن،

يجەۆسك: شامامەن 250 ادام،

ۆورونەج: 200 ادام تۋرالى،

تومەنگى نوۆگورود: شامامەن 200 ادام،

پەتەربۋرگ: 200-گە جۋىق ادام،

قازان: شامامەن 200 ادام،

ومبى: شامامەن 200 ادام،

يركۋتسك: 100-دەن استام ادام،

سامارا: 100-دەن استام ادام،

ۋفا: شامامەن 100 ادام.

ءتۇيىن

بيىلعى جاز ماۋسىمى كرەمل ءۇشىن «باسقاشا ويلايتىن» جاس رەسەيلىكتەردىڭ وزگەرىسكە ۇمتىلىس ماقساتىنداعى  نارازىلىقتارى «جاڭا تولقىن» تاسقىنى رەتىندە اسەر ەتكەنى ءسوزسىز. تاۋەلسىز ساراپشىلاردىڭ پىكىرىنشە، الداعى بەس جىلدا رەسەي تاريحي ماڭىزى زور دەموكراتيالىق وزگەرىستەردى باسىنان كەشىرىپ، جۇيە مۇلدەم جاڭا سيپات الۋى مۇمكىن. سايكەسىنشە بۇل ورتاازيالىق باستى كورشىسى قازاقستانعا دا ىقپالى ەتەرى ءسوزسىز. پوستكەڭەستىك ەلدەردەگى الەمگە ءمالىم اۆتوريتارلىق رەجيمدەر كەڭەس وداعىنىڭ انالوگىن قۇرعىسى كەلەتىن «ساعىم» اڭسارىمەن اۋىراتىن بۇگىنگى رف-نىڭ كۋرس وزگەرىسىمەن جويىلۋى ىقتيمال دەگەن دە پىكىرلەر بار. بولجام راسقا شىقسا، بىزدەگى قاراسى كوبەيگەن قارسىلىق كوڭىل-كۇيلەردىڭ ميتينگ-پيكەت، «سەرۋەن» فورمالارى ەرتەڭ بۇلىكشىلىك كوزقاراسىندا ەمەس، ازاماتتىق قوعامدى ورنىقتىرۋدا «زور فاكتور» رەتىندە باعالاناتىنى انىق.

وزگەرىس – تابيعات زاڭى. سينگاپۋردىڭ «ساۋلەتشىسى» اتانعان لي كۋان يۋ «سينگاپرۋلىق تاريح. 1965-2000 ج.ج. ءۇشىنشى الەم ەلدەرىنەن «بىرىنشىلىككە» مەمۋارىندا «مەنىڭ جولىمدا ەكى تاڭداۋ تۇردى. ءبىرىنشىسى: حالقىمدى توناپ، جالاڭاشتاندىرىپ، ەسەسىنە جاقىندارىم مەن دوس-تۋىستارىمدى «فوربس» تىزىمىنە ەنگىزۋ. ال، ەكىنشى: ەلىمە قالتقىسىز قىزمەت ەتۋ ارقىلى ۇزدىك وندىققا كىرگىزۋ. مەن ەكىنشىسىن تاڭدادىم»، – دەيدى. جۇرتى قايتا-قايتا باس كوتەرىپ جاتقان باسشىلار سينگاپۋرلىق ءامىردىڭ سوزىنە ءبىر ۋاق وي جۇگىرتسە، ءوز تاڭداۋىن قايتا ايقىنداسا دەگەن تىلەك بار ازاماتتىق قوعامدا.

وپپوزيتسيالىق، ازاماتتىق بەلسەندىلەر مەن تىركەۋدەن وتپەگەن كانديداتتار، رەپەر، انشىلەر مالىمدەمە جاساعان ساحناعا قاراپ تۇرعان نارازىلار. 10 تامىز 2019 جىل. ماسكەۋ قالاسى، رف. فوتو: "ريا نوۆوستي"

كۇشتىك قۇرىلىمدار كوپشىلىكتىڭ كوزىنشە ءتۇسىرىلىم جۇرگىزىپ جاتقان درون كامەرالارىن ارنايى ەلەكترلى قۇرىلعىمەن تارتىپ الۋدا. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

Face ەسىمىمەن تانىمال رەپەر-ءانشى "كالاشنيكوۆ", "يۋموريست" شىعارمالارىن ورىنداۋدا. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

"بيلىك - بۇل، ءبىز. داۋىس بەرۋ قۇقىعىمىزدى وزىمىزگە بەرىڭدەر" دەگەن لوزۋنگى جانە مەملەكەتتىك تۋ ۇستاعان نارازىلار اكادەميك ساحاروۆ داڭعىلى بويىندا ساحناعا قاراپ تۇرعان كەزى. 10 تامىز 2019 جىل. ماسكەۋ قالاسى، رف. فوتو: فوتوگراف-جۋرناليست يليا ۆارلاموۆتىڭ تۆيتتەر پاراقشاسىنان. @varlamov

قۇقىق قورعاۋ ورگاندارى وكىلدەرىنىڭ ماروسەيكاداعى ۇستاۋ ارەكەتى. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

مەكتەپ وقۋشىسى ولگا ميسيك وموندارعا رف-نىڭ كونستيتۋتسياسىن وقىپ بەرۋدە. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

داڭعىل بويىندا جىلجىپ كەلە جاتقان نارازىلار. 10 تامىز 2019 جىل. ماسكەۋ قالاسى، رف. فوتو: echo.msk.ru

ساحاروۆ داڭعىلىنداعى كۇشتىك قۇرىلىمداردىڭ تىزبەك قۇرۋ شاراسىنداعى پوليتسيا قىزمەتكەرى. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

ساحناعا بەتتەپ تۇرعان نارازىلار. 10 تامىز 2019 جىل. ماسكەۋ قالاسى، رف. فوتو: svoboda.org

رەپەر وكسيميرون ءوز اۋديتورياسىن رۇقسات ەتىلگەن ميتينگىگە شاقىراتىنىن، ءوزى العاش رەت ساياسي اكتسياعا شىققانىن ايتىپ تۇر. فۋتبولكاسىنا "ەگور جۋكوۆقا ەركىندىك!" دەگەن لوزۋنگ پەن سۋرەتىن جازدىرىپ العان. جۋكوۆ - "ۆىشكي" ستۋدەنتى ءارى ماسكەۋدەگى بەيبىت اكتسيالارداعى "جاپپاي تارتىپسىزدىك" تۋرالى قىلمىستىق ءىستىڭ فيگۋرانتى. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

ساحاروۆ داڭعىلىنداعى سوڭعى جىلدارى وتكەن ەڭ كوپ نارازىلار ميتينگىسى كۇننىڭ جاۋىنىنا قاراماستان بىرنەشە ساعاتقا سوزىلعان. قولشاتىر ۇستاعان ازاماتتار. 10 تامىز 2019 جىل. ماسكەۋ قالاسى، رف. فوتو: "نوۆايا گازەتا"

جاۋىنعا قاراماستان قارسىلىق اكتسياسىنا قاتىسىپ تۇرعان نارازىلار ساحاروۆ داڭعىلى بويىندا. 10 تامىز 2019 جىل. ماسكەۋ قالاسى، رف. فوتو: فوتوگراف-جۋرناليست يليا ۆارلاموۆتىڭ تۆيتتەر پاراقشاسىنان. @varlamov

"The Qazaq Times"