رەسەي پرەزيدەنتى ۆلاديمير پۋتين ۋكرايناداعى سوعىس جاعدايىندا يادرولىق قارۋ قولدانۋ مۇمكىندىگىن تۋرالى ەكىنشى رەت ءسوز ەتتى. ول باتىس ەلدەرى ۋكرايناعا كيلىگەتىن بولسا رەسەيدىڭ جاۋابى «جاڭعىرىقتاي تەز» بولارىن ەسكەرتتى.

«بىزدە ەشكىم ماقتانا الماي تۇرعان قارۋلار بار، ءبىز ونىمەن ماقتانبايمىز، كەرەك بولسا ءبىز ونى قولدانامىز»، – دەدى پۋتين مەم. دۋما وكىلدەرىمەن كەزدەسۋدە. ول بۇل كەزدەسۋدە ۋكرايناداعى «ارنايى وپەراتسيالارىنىڭ» (رەسەي ءوزىنىڭ ۋكرايناداعى اسكەري شابۋىلىن وسىلاي اتاپ كەلەدى) دۇرىس ءارى ويداعىداي جالعاسىپ جاتقانىن قايتالادى.

ارينە، پۋتين سوزىندە تىكەلەي «يادرولىق قارۋ» دەگەن ءسوزدى قولدانبادى. الايدا، ونىڭ مەڭزەگەنى رەسەيدىڭ قۋاتتى يادرولىق ارسەنالى ەكەنى اڭعارىلادى. وسىدان ەكى جىل بۇرىن جاڭارتىلعان رەسەيدىڭ يادرولىق قارۋ قولدانۋ بويىنشا قۇجاتتا يادرولىق قارۋدى قولدانۋدىڭ شارتى كورسەتىلگەن. وندا رەسەيگە تۋرا باعىتتالعان بالليستيكالىق زىمىران اتىلعانى تۋرالى انىقتالعان مالىمەت العان جاعدايدا يادرولىق قارۋدى قولدانىلاتىنى كورسەتىلگەن. بىلايشا ايتقاندا ماسكەۋ وزىنە قارسى سوققىنىڭ جاۋابى رەتىندە يادرولىق قارۋ قولدانۋعا دايىن. بۇل جولى ءپۋتيننىڭ ءسوزى «قاراما-قارسى جاۋاپ» دەپ وتىرعانى وسىعان ساياتىنداي.

پۋتين ۇزاق سوزدەرىنىڭ اراسىندا «باتىس ەلدەرى رەسەي سەكىلدى الىپ ەلدىڭ بولۋىن قالامايدى» دەپ ءبىلدىردى جانە رەسەي باتىستىڭ سانكتسيالارىنا سىنباعانىن ماقتانا ايتىپ ءوتتى. بۇعان قوسا ول قازىرگى جاعدايدا رەسەي ءۇشىن پاتريوتيزمنىڭ ماڭىزى تۋرالى دا ءبىرمۇنشا ءسوز ارنادى.

پۋتين ءوزى ايتقان «جۇرت ماقتانا الماي تۇرعان» بىراق وزدەرى قولدانۋعا دايىن قارۋدى رەسەيگە تونگەن ستراتەگيالىق قاۋىپكە قارسى دا قولداناتىنىن مەڭزەدى. دەگەنمەن، ماسكەۋ بيلىگىنىڭ وزىنە قارسى ستراتەگيالىق قاۋىپتىڭ شەڭبەرىن قاي ارادان سىزعانىن انىق ايتۋ قيىن. قالاي بولماسىن كرەمل باسشىسى سىرتقى الەمگە يادرولىق سوعىس قاۋپىن ەسكەرتۋى جيىلەپ بارادى.

The Qazaq Times