جوعارى تەمپەراتۋرانىڭ رەكوردتىق كورسەتكىشى: اپتاپ ىستىق ەۋروپانى الاڭداتۋدا

بۇل اپتادا ەۋروپا ەلدەرىندە اپتاپ ىستىق رەكوردتىق كورسەتكىشكە جەتەدى دەپ كۇتىلۋدە. مەتەورولوگتاردىڭ بولجامىنا سەنسەك، يسپانيادان تارتىپ شۆەيتسارياعا دەيىنگى بىرقاتار باتىس ەۋروپالىق ەلدەردە اۋا تەمپەراتۋراسى 40 گرادۋسقا دەيىن كوتەرىلەدى.

وسى اپتا باستالىسىمەن فرانتسيا مەن يتاليانىڭ كەيبىر اۋماقتارىندا كۇن قاتتى ىسىعان. پاريجدە كەشەگى كۇنى اۋانىڭ ورتاشا تەمپەراتۋراسى 34 گرادۋسقا جەتكەن جانە ۇزدىكسىز جوعارىلاپ بارا جاتقانى بايقالادى. فرانتسيادا جوعارى تەمپەراتۋرادان بولاتىن توتەنشە جاعدايلاردىڭ الدىن الۋ شارالارى قولعا الىنا باستاعان. ەلدىڭ ءبىلىم ءمينيسترى وسى اپتاداعى بارلىق ەمتيحان سىناقتارىن كەيىنگە قالدىرعان.

بۇنداي جاعدايلار يتاليا مەن گەرمانيادا دا قايتالانۋدا. گەرمانيانىڭ فرانكفۋرت قالاسىندا اۋا تەمپەراتۋراسى 38,2C° جەتەتىنى بولجانعان. بۇل 1948 جىلعى رەكوردتى جاڭارتادى.

ەۋروپاداعى بۇل اۋا تەمپەراتۋراسى ورتالىق ازيامەن سالىستىرعاندا تومەن كورىنگەنىمەن جازى سالقىن بولىپ كەلەتىن جانە اينالاسىن تەڭىز قورشاعان ىلعالدى اۋاداعى ەۋروپا ءۇشىن اسا جوعارى تەمپەراتۋرا. مامانداردىڭ پىكىرىنشە، ەۋروپا ەلدەرىندە تەمپەراتۋرانىڭ جوعارىلاۋى ساحارا شولىنەن كەلىپ جاتقان ىستىق اۋا اعىسىنىڭ اسەرى. سونداي-اق، ەكسپەرتتەر ەۋروپادا اۋا تەمپەراتۋراسى كليماتتىڭ جىلىنۋىنا قارسى شارالارعا قاراماستان جىل سايىن جوعارىلاپ كەلە جاتقانىن ەسكەرتۋدە.

جوعارى تەمپەراتۋرا قالانى سۋمەن جانە ەلەكتر قۋاتىمەن قامتۋ جۇمىستارىن قيىنداتادى. الىپ مەگاپوليستەردە اپتاپ ىستىق ادامداردىڭ ومىرىنە دە قاۋىپ توندىرەدى. 2003 جىلعى ەۋروپا ەلدەرىندە بولعان اپتاپ ىستىق شامامەن 20 مىڭ ادامنىڭ جانىن جالماعان ەدى.

“The Qazaq Times”