ساياسي قارۋعا اينالعان ەنەرگيا: رەسەي پولشا مەن بولگارياعا گاز جەتكىزۋدى توقتاتتى

رەسەيلىك گازپروم 27 ءساۋىر سارسەنبىدەن باستاپ پولشا مەن بولگارياعا گاز جەتكىزۋدى توقتاتتى. بۇل رەسەي ۋكرايناعا باسىپ كىرگەننەن بەرى باتىس پەن ماسكەۋ اراسىنداعى ەكونوميكالىق سوعىستىڭ سوڭعى قادامى قاتارى باعالانۋدا.

باتىستىڭ قاتاڭ سانكتسيالارىنا قارسى ماسكەۋ ءوزىنىڭ مۇناي-گاز ەكسپورتىن ساياسي قۇرال قاتارىندا قولدانىپ جاتىر. سەبەبى، ەۋروپانىڭ كوپتەگەن ەلى ەنەرگەتيكا قاجەتتىلىگى بويىنشا رەسەيگە تاۋەلدىلىگى جوعارى. ءتىپتى سانكتسيا كەزىندە باتىس ەلدەرىنەن گاز اقىسىن رۋبلمەن تولەۋدى تالاپ ەتۋدە. گازپروم سارسەنبى كۇنى رۋبلمەن تولەي الماعان سوڭ پولشا مەن بولگارياعا گاز جەتكىزۋدى توقتاتاتىنىن مالىمدەدى.

گازپروم مالىمدەمەسىندە، اتى اتالماعان ءتورت گاز ساتىپ الۋشىنىڭ رەسەي تابيعي گازى ءۇشىن رۋبلمەن تولەپ وتىرعانىن،  ال 10 ەۋروپالىق كومپانيا رەسەيلىك ۆاليۋتامەن تولەۋ ءۇشىن رۋبل شوتتارىن اشقانىن ايتتى.

ەۋروپا ەلدەرى مەن اقش رەسمي مالىمدەمەلەرىندە رەسەيدىڭ بۇل قادامىنا تاڭ قالمايتىندارىن ايتتى. سوعان قاراعاندا باتىس ءۇشىن بۇل كۇتىلگەن قادام ەكەنى انىق.

رەسەيدىڭ بۇنداي شەشىمىنەن كەيىن اقش ەۋروپاداعى وداقتاس، سەرىكتەس ەلدەرمەن، پولشا جانە بولگاريا باسشىلارىمەن ماسەلە بويىنشا سويلەسىپ جاتقانىن ايتتى. اقش ەۋروپا ەلدەرىنىڭ گاز يمپورتىن ءارتاراپتاندىرۋ بويىنشا ارەكەت ەتەتىنىن جەتكىزدى.

ال، پولشا مەن بولگاريا ۇكىمەتتەرى گازپرومنىڭ بۇل شەشىمىن كەلىسىمدى بۇزۋ دەپ اتادى. ەۋروپا وداعى بولسا رەسەيدىڭ ەنەرگەتيكانى قۇرال قاتارىندا پايدالانۋى ولار كۇتكەندەي بولعانىن، بىراق ەو تارابىنان بىرىككەن جاۋاپ بولاتىنىن ەسكەرتتى.

ەۋروپا ەلدەرى رەسەي گازى مەن مۇنايىنا تاۋەلدىلىكتەن ارىلۋ بويىنشا كەشەندى باعدارلامالار جاساپ جاتىر، ونىڭ قاتارىندا ەنەرگيانىڭ باسقا كوزدەرىن قاراستىرۋ جانە قايتا تۋىندايتىن ەنەرگيانى دامىتۋ باعدارلامالارى دا بار.

The Qazaq Times