«ۋنيۆەرسيتەتتىڭ ۇزىن دالىزىنەن شىعىپ كەلە جاتقانىمىزدا، قازاقتىڭ قاراكوز قىزدارى ورىسشا ايقايلاپ سويلەپ، دورەكى سوزدەردى توگىپ بارادى ەكەن. ونى ەستىگەن اقسەلەۋ اعام قويشىعارا اعاعا قاراپ:

- بۇگىنگى قازاق قىزدارىنا ۇلگى ەتىپ كورسەتەتىن ناعىز قازاق ايەلىن اتاشى؟ – دەدى. ادەتتەگىدەي جاڭا وي، جاڭا سانامەن تولعاتىپ جۇرەتىن كەيپىنە ەنە سويلەدى.

وعان جاۋاپ رەتىندە:

– ە-ە، ونداي قىزدار، ايەلدەر كوپ قوي، قايسىبىرىن اتايمىز، – دەدى قويشەكەڭ ءوزىنىڭ قاراپايىم، ۇياڭ مىنەزىنە سالىپ.

– حالىقتىڭ الدىندا جۇرگەن، كوپتىڭ كوزىنە ءتۇسىپ، ۇلتى ءۇشىن شىر-پىر بولىپ جۇرگەن ءبىر ايەلدى ايتشى، – دەدى اقاڭ.

– اناۋ شەنەۋنىك ايەلدەر بار عوي، – دەي سالدى قويشى-ەكەڭ.

– قىمبات ۇلدە مەن بۇلدەگە ورانىپ، اسىل تاستاردان القا تاعىنعان ايىمداردى ايتاسىڭ با؟

– نە دەسەڭ دە، ەلدىڭ الدىندا ءجۇر عوي.

سوندا اقسەلەۋ اعا:

– مەن بىلسەم، تاپ وسى ورازكۇل اسانعازىقىزى ىسپەتتى ايەلدەردى ۇلگى ەتىپ كورسەتۋىمىز كەرەك، – دەدى.

ول ورازكۇل باسقارعان تىلدەردى دامىتۋ باسقارماسى باس بولىپ بىرەر كۇن بۇرىن عانا استانانىڭ ءۇش جۇزدەن استام كوشەسىنە قازاق اتاۋلارى بەرىلگەن كەز ەدى».

فيلولوگيا عىلىمدارىنىڭ دوكتورى، پروفەسسور قارجاۋباي سارتقوجاۇلىنىڭ «ورازگۇل ءبىزدىڭ وسىنداي» اتتى ماقالاسىندا وسىلاي جازىلعان ەكەن.

جۋىردا «Palitra press» باسپاسىنان جارىق كورگەن «قايسارلىق پەن قايراتكەرلىك» اتتى كىتاپتا اۆتور وسى ماقالانى ءوز ءتۇيىنى رەتىندە قولدانىپتى.

جاڭا كىتاپ قىرىق جىلدان بەرى ەلىمىزدىڭ ءوسىپ-وركەندەۋى مەن دامۋى جولىندا ايانباي قىزمەت ەتىپ كەلە جاتقان، اتقارعان باعا جەتپەس جۇمىسى مەن ەل يگىلىگىنە قوسقان ۇلەسى ءۇشىن «قۇرمەت» وردەنىمەن (2008); «ەڭبەكتەگى ەرلىگى ءۇشىن» (1978), «قازكسر اعارتۋ ءىسىنىڭ ۇزدىگى» بەلگىسىمەن (1983), «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان رەسپۋبليكاسىنىڭ تاۋەلسىزدىگىنە 20 جىل» (2011), «قازاقستان رەسپۋبليكاسىنىڭ تاۋەلسىزدىگىنە 25 جىل» (2016) مەدالدارىمەن، استانا قالاسى اكىمىنىڭ العىس حاتىمەن (1999), استانا قالاسىنىڭ 10 جىلدىعىنا وراي استانا مەدالىمەن (2008), وقو سارىاعاش جانە بايدىبەك اۋداندارىنىڭ، جامبىل وبلىسى شۋ اۋدانىنىڭ وڭتۇستىك قازاقستان وبلىسىنىڭ «قۇرمەتتى ازاماتى» اتاعىمەن، مادەنيەت قايراتكەرى (2010), «ءتىل جاناشىرى» (2015) قۇرمەت بەلگىسىمەن ماراپاتتالسا، ال  2012 جىلى بەسىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، بولعان ورازكۇل   اسانعازىقىزىنىڭ بۇگىنگە دەيىنگى ءومىر جانە ەڭبەك جولىن قامتىعان. عۇمىرنامالىق جازبا ەسسە-ديالوگ تۇرىندە بەرىلگەن.

ءاۋ باستا جازۋشى-عالىم اقسەلەۋ سەيدىمبەكتىڭ وي تاستاۋىمەن ايگىلى ايەلدەر جونىندە جازۋدى ماقسات ەتكەن كىتاپ اۆتورى ءنازيرا بايىربەك جوعارىدا جازىلعان ماقالاعا جۋىردا كەزدەيسوق تاپ بولعانىن ايتادى. «مەن قارجاۋباي اعامىزدىڭ «ورازكۇل ءبىزدىڭ وسىنداي» اتتى ماقالاسىن وقىماعان ەكەنمىن. كەيىپكەرىمنىڭ جەكە مۇراعاتىنداعى قۇجاتتارمەن تانىسىپ وتىرىپ، وسى ماقالانى كورگەنىمدە قۋانىپ قالدىم. جازباعا قاراپ، مەن «تاقىرىپ» تاڭداعاندا جاڭىلىسپاعان ەكەنمىن دەدىم. اقسەلەۋ اعامنىڭ ءبىر اماناتىن ورىنداعانداي قۋانىپ وتىرمىن. بۇل مەن ءۇشىن – مارتەبە!» دەيدى ول.

قاپەرگە سالا كەتەيىك، ورازكۇل اسانعازىقىزى تۋرالى كىتاپتىڭ «بەتاشارى» 22 اقپان كۇنى ساعات 17-00-دە استانا قالاسىنداعى شابىت ورتالىعىندا وتەدى.

«The Qazaq Times»