«Universitettiñ wzın dälizinen şığıp kele jatqanımızda, qazaqtıñ qaraköz qızdarı orısşa ayqaylap söylep, döreki sözderdi tögip baradı eken. Onı estigen Aqseleu ağam Qoyşığara ağağa qarap:

- Bügingi qazaq qızdarına ülgi etip körsetetin nağız qazaq äyelin ataşı? – dedi. Ädettegidey jaña oy, jaña sanamen tolğatıp jüretin keypine ene söyledi.

Oğan jauap retinde:

– E-e, onday qızdar, äyelder köp qoy, qaysibirin ataymız, – dedi Qoyşekeñ öziniñ qarapayım, wyañ minezine salıp.

– Halıqtıñ aldında jürgen, köptiñ közine tüsip, wltı üşin şır-pır bolıp jürgen bir äyeldi aytşı, – dedi Aqañ.

– Anau şeneunik äyelder bar ğoy, – dey saldı Qoyşı-ekeñ.

– Qımbat ülde men büldege oranıp, asıl tastardan alqa tağınğan ayımdardı aytasıñ ba?

– Ne deseñ de, eldiñ aldında jür ğoy.

Sonda Aqseleu ağa:

– Men bilsem, tap osı Orazkül Asanğazıqızı ispetti äyelderdi ülgi etip körsetuimiz kerek, – dedi.

Ol Orazkül basqarğan tilderdi damıtu basqarması bas bolıp birer kün bwrın ğana Astananıñ üş jüzden astam köşesine qazaq atauları berilgen kez edi».

Filologiya ğılımdarınıñ doktorı, professor Qarjaubay Sartqojawlınıñ «Orazgül bizdiñ osınday» attı maqalasında osılay jazılğan eken.

Juırda «Palitra press» baspasınan jarıq körgen «Qaysarlıq pen qayratkerlik» attı kitapta avtor osı maqalanı öz tüyini retinde qoldanıptı.

Jaña kitap qırıq jıldan beri elimizdiñ ösip-örkendeui men damuı jolında ayanbay qızmet etip kele jatqan, atqarğan bağa jetpes jwmısı men el igiligine qosqan ülesi üşin «Qwrmet» ordenimen (2008); «Eñbektegi Erligi üşin» (1978), «QazKSR ağartu isiniñ üzdigi» belgisimen (1983), «Qazaqstan Respublikasınıñ Täuelsizdigine 10 jıl» (2001), «Qazaqstan Respublikasınıñ Täuelsizdigine 20 jıl» (2011), «Qazaqstan Respublikasınıñ Täuelsizdigine 25 jıl» (2016) medal'darımen, Astana qalası äkiminiñ alğıs hatımen (1999), Astana qalasınıñ 10 jıldığına oray Astana medalimen (2008), OQO Sarıağaş jäne Bäydibek audandarınıñ, Jambıl oblısı Şu audanınıñ Oñtüstik Qazaqstan oblısınıñ «Qwrmetti azamatı» atağımen, Mädeniet qayratkeri (2010), «Til janaşırı» (2015) qwrmet belgisimen marapattalsa, al  2012 jılı besinşi saylanğan Qazaqstan Respublikası Parlamenti Mäjilisiniñ deputatı, bolğan Orazkül   Asanğazıqızınıñ büginge deyingi ömir jäne eñbek jolın qamtığan. Ğwmırnamalıq jazba esse-dialog türinde berilgen.

Äu basta jazuşı-ğalım Aqseleu Seydimbektiñ oy tastauımen äygili äyelder jöninde jazudı maqsat etken kitap avtorı Näzira Bayırbek joğarıda jazılğan maqalağa juırda kezdeysoq tap bolğanın aytadı. «Men Qarjaubay ağamızdıñ «Orazkül bizdiñ osınday» attı maqalasın oqımağan ekenmin. Keyipkerimniñ jeke mwrağatındağı qwjattarmen tanısıp otırıp, osı maqalanı körgenimde quanıp qaldım. Jazbağa qarap, men «taqırıp» tañdağanda jañılıspağan ekenmin dedim. Aqseleu ağamnıñ bir amanatın orındağanday quanıp otırmın. Bwl men üşin – märtebe!» deydi ol.

Qaperge sala keteyik, Orazkül Asanğazıqızı turalı kitaptıñ «betaşarı» 22 aqpan küni sağat 17-00-de Astana qalasındağı Şabıt ortalığında ötedi.

«The Qazaq Times»