بەتبۇرىس: ۋكراينا ناتو مەن ەو-عا مۇشە بولماق

ۋكراينا الداعى ۋاقىتتا ناتو مەن ەۋروپالىق وداققا مۇشە بولماق.

وداققا قوسىلۋ تۋرالى زاڭ جوباسىن پرەزيدەنت پەتر پوروشەنكو ۇسىنىپ، ۋكراينانىڭ كونستيتۋتسيالىق سوتى بۇل شەشىمدى ماقۇلداعان. الدىمەن ءبىرشاما رەفورمالار جۇزەگە اسۋى ءتيىس. پوروشەنكو مەملەكەتتىڭ 2030 جىلعا دەيىن بارلىق سالادا تاس-ءتۇيىن دايىن بولاتىندىعىن ايتتى. وسىعان دەيىن ناتو-نىڭ پارلامەنتتىك اسسامبلەياسى «اگرەسسورلىق رەسەيدىڭ قاۋىپ-قاتەرىنە قارسى تۇرۋ ءۇشىن» ۋكراينانى اليانسقا قوسۋدى تالقىلاعان. الايدا، ماسكەۋ تاراپى شىعىس ەۋروپادا باسقىنشىلىق ساياسات جۇرگىزىپ وتىرعانىن تۇبەگەيلى جوققا شىعاردى.

2013 جىلى ەۋرومايدان دەپ اتالعان جاپپاي حالىق تولقۋىنا قاتىسقاندار ۋكراينانىڭ ەۋروپا وداعىنا قوسىلۋىن تالاپ ەتكەن. سونداي-اق ۋكراينانىڭ ۇلتشىلدار ۇيىمى (وۋن) رەسەيدەن ىرگەنى اۋلاق ۇستاپ، ەۋروپوتسەنتريزمگە بەت الۋ كەرەكتىگىن بىرنەشە رەت ەسكەرتكەن. بىراق 2014 جىلعى قىرىم اننەكسياسىنان سوڭ رەسەي تاراپى ۋكراينانى «ۋىستان» شىعارماۋعا تىرىسىپ باقتى. قانشا دەگەنمەن ۋكراينا دا قۇر قالعان جوق: ماسكەۋمەن اراداعى بىرنەشە بايلانىسقا نۇكتە قويدى. ماسەلەن، بيىلعى جىلدىڭ قىركۇيەگىندە پرەزيدەنت پەتر پوروشەنكو ۋكراينا مەن رەسەي اراسىنداعى دوستىق، ىنتىماقتاستىق جانە سەرىكتەستىك كەلىسىمىنىڭ كۇشىن جويۋ تۋرالى جارلىقتى قابىلدادى. ال قازاننان باستاپ ۋكراينانىڭ جيتومير وبلىسى ءورىستىلدى مادەني ونىمدەرگە تولىقتاي تىيىم سالعان بولاتىن. تىيىم اكتىسى بويىنشا، ءورىستىلدى باعدارلاما، فيلمدەردى كورسەتۋگە، اقپاراتتاردى جاريالاۋعا بولمايدى. سونداي-اق، رەسەيلىك ونەرپازداردىڭ گاسترولدىك ساپارمەن كەلۋىنە دە قاتاڭ تىيىم سالىنعان. قارسىلىق شارالار مەن زاڭدار «رەسەي ۋكراينا اۋماعىن باسىپ الۋدان تولىقتاي باس تارتپايىنشا» ءوز كۇشىن جويمايدى.

ءبىر سوزبەن ايتقاندا، ۋكراينا ەۋروپالىق باعىتقا قادام باسپاق. قازىردىڭ وزىندە ۋكراينا ناتو-مەن بىرلەسكەن اسكەري جاتتىعۋلاردى ءجيى وتكىزەدى. سول سەبەپتەن دە رەسەي ناتو-نىڭ شىعىس ەۋروپاعا قاراي ۇلعايۋىنا قارسى بولۋ ماقساتىندا اۋقىمدى اسكەري جاتتىعۋ وتكىزىپ كەلەدى.

"The Qazaq Times"