سەرگەي لاۆروۆ پەن مەۆلۋت شاۆشوعلۇ انكارادا كەزدەستى. فوتو: ياندەكس

كەشە، 8 ماۋسىم كۇنى تۇركيانىڭ ورتالىق قالاسىندا تۇرىك جانە ورىس ءسىم باسشىلارى كەزدەستى. انكاراداعى كەزدەسۋ رەسەي-ۋكراينا اراسىنداعى ماسەلەنى شەشۋدە يگىلىكتى العا جىلجۋ بولماسا دا استىق ەكسپورتىن قالپىنا كەلتىرۋ بويىنشا بىرقاتار ناتيجەنى كورسەتكەندەي بولدى.

قازىرگە دەيىن بۇۇ تارابى ۋكراينانىڭ استىق ەكسپورتىنىڭ تۇرالاۋى جاھاندىق ازىق-تۇلىك تاپشىلىعىن كۇشەيتىپ جاتقانىن ايتىپ، قوس تاراپتان قارا تەڭىز ارقىلى شىعاتىن استىق ەكسپورتىنا جول اشۋدى سۇراپ كەلدى. انكاراداعى كەزەكتى كەزدەسۋدە دە ۋكراينانىڭ استىق ەكسپورتى باستى تاقىرىپ رەتىندە ورتاعا قويىلعان.

تۇركيا سىرتقى ىستەر ءمينيسترى مەۆۋت شاۆۋشوعلۇ مەن رەسەي ءسىم باسشىسى سەرگەي لاۆروۆ ورتاسىنداعى كەزدەسۋدى رەسەي مەن ۋكراينانىڭ، سونداي-اق، بۇۇ مەن تۇركيانىڭ وكىلدەرى ورتاسىندا استىق ەكسپورتى بويىنشا كەزلىسسوزگە جول اشتى. ءتورت تاراپتى كەلىسسوز الداعى ۋاقىتتا ستامبۋلدا وتەدى دەپ جوسپارلانۋدا.

رەسەيدىڭ باس ديپلوماتى بولسا ۋكراينا پورتتارىنىڭ جابىلۋى دۇنيەجۇزىلىك ازىق-تۇلىك تاپشىلىعىن تۋدىرىپ جاتىر دەگەن ءۋاجدى جوققا شىعارادى. ونىڭ ايتۋىنشا، بۇل «جاھاندىق داعدارىس» دەۋگە كەلمەيدى جانە ۋكراينا پورتتارىندا تۇرعان استىق الەمدەگى استىق قورىنىڭ 1 پايىزىن عانا يەلەيدى. ول استىق ەكسپورتىن قالپىنا كەلتىرۋ ءۇشىن ۋكرايناداعى پورتتاردى مينادان تازارتۋ كەرەكتىگىن العا تارتادى. ال، ۋكراينا جاق رەسەي بۇل ارەكەتتى اسكەري ماقساتتا پايدالانباۋى كەرەك دەگەن تالاپتارىن العا قويادى.

ءباسپاسوز جيىنى كەزىندە لاۆروۆ رەسەي مەن تۇركيا اسكەري كۇشتەرى پورتتاردى مينادان تازارتۋ بويىنشا ارەكەتتەردى تالقىلاپ جاتقاندارىن ايتتى. ول جانە كەلىسسوزدەردەن كەيىن رەسەيدىڭ جاعدايدى اسكەري ماقساتتا پايدالانباۋعا كەپىلدىك بەرەتىنىن ايتتى.

«ەگەر ۋكراينا كەمەلەردىڭ شىعۋىنا رۇقسات بەرىپ، مينالاردى تازالايتىن بولسا، ءبىز بۇل جاعدايدى ارنايى جۇرگىزىلىپ جاتقان اسكەري وپەراتسيانىڭ مۇددەسىنە پايدالانبايمىز. بۇل پرەزيدەنتتىڭ كەپىلدىگى. ءبىز بۇل كەپىلدىكتى جازباشا حاتتاۋعا دا دايىنبىز»، – دەدى لاۆروۆ ءسوزىندى.

كەزدەسۋدە بەلگىلى بولعانداي، تۇركيا مەن رەسەي اسكەري كۇشتەرى قارا تەڭىزدەگى پورتتاردان استىق الىپ شىعاتىن كەمەلەردىڭ قاۋىپسىزدىگىن قامتاماسىز ەتۋگە دايىن ەكەندىكتەرىن ءبىلدىردى. سونداي-اق، ەكى ەل ءسىم جەتەكشىلەرىنىڭ كەزدەسۋى ناۋرىزدان بەرى توقتاپ قالعان رەسەي-ۋكراينا كەلىسسوزىنە دە جول اشتى.

The Qazaq Times