فوتو: tengrinews.kz

ۋكراينا پرەزيدەنءتى پەتر پوروشەنكو مەملەكەتتىك شەكارانى زاڭسىز كەسىپ وتكەن «اگرەسسورلىق مەملەكەت» ياعني رەسەي ازاماتتارىن قىلمىستىق جاۋاپقا تارتۋ تۋرالى زاڭعا قول قويدى.

بىلتىر كيەۆ تاراپى رەسەي اننەكسيالاعان قىرىمعا شەكارانى كەسىپ وتپەك بولعان 100-گە جۋىق رەسەيلىك ازاماتتارعا قاتاڭ تىيىم سالعان بولاتىن. جوعارى رادانىڭ ءباسپاسوز قىزمەتى حابارلاعانداي، ەندى جاڭا زاڭ جوباسى رەسەي مەن رەسەيشىل، مۇددەلەس مەملەكەتتەرگە قاتىستى. زاڭ ەرەجەلەرىنە ساي، كەدەن بەكەتىنەن زاڭسىز وتپەك بولعاندار نەمەسە ءبىر رەت كەسىپ وتكەندەر ءۇش جىلعا، ەكىنشى مارتە وتكەندەر بەس جىلعا، ال قارۋ قولدانباق بولعان ازاماتتار سەگىز جىلعا دەيىن باس بوستاندىعىنان ايىرىلادى. سونداي-اق، قۇجاتسىز جۇرگەن بوسقىندار دا جاۋاپكەرشىلىككە تارتىلادى.

ايتا كەتەيىك، 2004 جىلى رەسەي ۋكراينانىڭ قىرىم اۆتونوميالىق رەسپۋبليكاسىن اننەكسيالاعان. رەسەي ءوزىنىڭ بۇل قىلىعىن «تاريحي ادىلدىك» دەپ باعالاسا دا، اقش پەن ەۋروپا ەلدەرى ماسكەۋدىڭ «اگرەسسيالىق» ارەكەتىن زاڭسىزدىققا بالاپ، بىرنەشە مارتە سانكتسيالار ەنگىزىپ كەلەدى. ۋكراينا تاراپى دا رەسەيمەن اراداعى بىرنەشە بايلانىسقا نۇكتە قويدى. وسى جىلدىڭ قىركۇيەگىندە پرەزيدەنت پەتر پوروشەنكو ۋكراينا مەن رەسەي اراسىنداعى دوستىق، ىنتىماقتاستىق جانە سەرىكتەستىك كەلىسىمىنىڭ كۇشىن جويۋ تۋرالى جارلىقتى قابىلدادى. ال قازاننان باستاپ ۋكراينانىڭ جيتومير وبلىسى ءورىستىلدى مادەني ونىمدەرگە تولىقتاي تىيىم سالعان بولاتىن. تىيىم اكتىسى بويىنشا، ءورىستىلدى باعدارلاما، فيلمدەردى كورسەتۋگە، اقپاراتتاردى جاريالاۋعا بولمايدى. سونداي-اق، رەسەيلىك ونەرپازداردىڭ گاسترولدىك ساپارمەن كەلۋىنە دە قاتاڭ تىيىم سالىنعان. قارسىلىق شارالار مەن زاڭدار «رەسەي ۋكراينا اۋماعىن باسىپ الۋدان تولىقتاي باس تارتپايىنشا» ءوز كۇشىن جويمايدى.

"The Qazaq Times"