اقش رەسەيگە كەزەكتى مارتە سانكتسيا ەنگىزەدى

اقش «ايداھار سانكتسيالار» اتانعان قاتاڭ قاۋلىنى رەسەيگە قارسى ىسكە قوسادى. بۇل تۋرالى اقش مەملەكەتتىك دەپارتامەنتىنىڭ وكىلى دەۆيد تەسلەر مالىمدەدى.

تەسلەردىڭ ايتۋىنشا، رەسەيگە سالىنعان جاڭا سانكتسيالار اقش-تىڭ حيميالىق قارۋدى باقىلاۋ تۋرالى زاڭىمەن سايكەس. سانكتسيالاردىڭ ءبىرىنشى پاكەتى بريتانيادا ەكس-تىڭشى سكريپالدىڭ ۋلانۋىنا قاتىستى 2018 جىلدىڭ تامىز ايىندا ەنگىزىلگەن بولاتىن. ەكىنشى رەتتەگى سانكتسيالار وسى جىلدىڭ قاراشاسىندا ورىندالادى.

اقش مەمدەپ وكىلى دەۆيد تەسلەر: «بۇگىن ءبىز كونگرەسكە رەسەي ۇكىمەتىنىڭ ءتيىستى كريتەريلەردى ورىنداماعانىن مالىمدەدىك. دەمەك، سانكتسيالاردىڭ ەكىنشى كەزەگىن ەنگىزۋ مەحانيزمى ىسكە قوسىلادى. كەلەسى قادامدارىمىزدى مۇقيات ويلاستىرامىز. ولاردىڭ قانداي بولاتىنىن كەيىن بىلەتىن بولاسىزدار. بىراق، بەلگىلىسى – كەزەكتى سانكتسيالار بۇرىنعىدان دا قاتاڭ بولماق»، – دەدى. سانكتسيالاردىڭ ەكىنشى پاكەتى رەسەيگە قاتىستى قاتاڭ شەكتەۋلەر ەنگىزۋدى كوزدەيدى. بۇدان بىلاي اقش پەن رەسەي ۇكىمەتى اراسىندا ديپلوماتيالىق قارىم-قاتىناس شەكتەلەدى. سونداي-اق رەسەي ۇكىمەتىنە ازىق-تۇلىك ساتىپ الۋدان باسقا جاعدايدا اقش بانكتەرىنىڭ كرەديت بەرۋىنە قاتاڭ تىيىم سالىنادى. بۇدان بولەك:

• رەسەي ۇكىمەتىنىڭ باقىلاۋىنداعى «اەروفلوت» سەكىلدى كومپانيالاردىڭ قىزمەتىن پايدالانباۋ;
• ءوزارا ساۋداعا تولىق تىيىم سالۋ. اقش پەن رەسەي ۇكىمەتى اراسىنداعى ديپلوماتيالىق قاتىناستاردى شەكتەۋ;
• اقش ۇكىمەتىنىڭ «قارا» تىزىمىندەگى ادامدار اراسىنداعى كەز كەلگەن كەلىسىم-شارتتار مەن مامىلەلەردى جۇزەگە اسىرماۋ;
• حيميالىق قارۋدى قولداعان جانە تاراتقان ادامدارعا قارسى دەربەس سانكتسيالار ەنگىزۋدى كوزدەيدى.

سۇراپىل سانكتسيالار اقش قاۋىپسىزدىگى ءۇشىن اسا ماڭىزدى. سەبەبى، رەسەي تاراپىنان كەتكەن قاتەلىكتەر مەن استىرتىن ارەكەتتەر (ساياسي بايلانىس، حيميالىق قارۋ، حاككەرلىك شابۋىل) كوپتەگەن مەملەكەتتەردىڭ قاۋىپسىزدىگىنە نۇقسان كەلتىرىپ وتىر. وسى رەتتە امەريكا مەملەكەتتىك دەپارتامەنتىنىڭ رەسمي وكىلى حيزەر نويەت: «سانكتسيالار ناقتى ەكونوميكا مەن قاۋىپسىزدىك سالاسىنا باعىتتالعان. اقش تاراپىنان قاتاڭ قاۋلىلار رەسەي بيلىگىنە، سونداي-اق رەسەيدىڭ بۇلىكشىل ارەكەتتەرىنىڭ ورىندالۋىنا كومەكتەسكەندەرگە دە اسەر ەتەدى. ءبىز وسى سۋبەكتىلەردىڭ ءىس-ارەكەتتەرىن باقىلاۋعا الامىز»، – دەدى.

زاڭ جوباسىنىڭ ەكونوميكالىق بولىگىندە اقش-تا سانكتسيالىق رەجيمدە تۇرعان جەتى رەسەيلىك بانك قۇرىلىمدارىنىڭ، سونىڭ ىشىندە «سبەربانك»، ۆتب، ۆەبا جانە «پرومسۆيازبانكتىڭ» وپەراتسيالارىنا جانە اكتيۆتەرىنە تىيىم سالۋ قاراستىرىلعان. دەمەك، اتالعان شەكتەۋ ءىس جۇزىندە وسى بانكتەر ءۇشىن دوللارلىق ەسەپ ايىرىسۋدىڭ مۇمكىن ەمەستىگىن بىلدىرەدى. جاڭا قۇجات بويىنشا ساقتاندىرۋ كومپانيالارىنىڭ قىزمەتىنە جانە باسقا دا پۋنكتتەرگە مونيتورينگ جۇرگىزىلەدى. وسى ارقىلى رەسەي «لاڭكەستىكتى قولداۋشى مەملەكەت» رەتىندە تانىلۋى مۇمكىن.

"The Qazaq Times"