اقش-تا كونگرەسس سايلاۋى وتەدى: ترامپ اكىمشىلىگى باسىمدىققا يە

6 قاراشادا جەرگىلىكتى ۋاقىت بويىنشا اقش-تا كونگرەسس سايلاۋى باستالادى. كەزەكتى ساياسي شارانىڭ مەملەكەت ءۇشىن ماڭىزى زور بولماق.

سايلاۋ كەزىندە امەريكاندىقتار قاۋىمدار پالاتاسىنىڭ 435 دەپۋتاتىن، 100 سەناتوردىڭ 35-ءىن جانە ءار شتاتتان گۋبەرناتورلىققا ۇمىتكەرلەرگە داۋىس بەرەدى. الدىن-الا ساۋالناما قورىتىندىسى بويىنشا، قۇراما شتاتتارىندا 31 ميلليوننان استام تۇرعىن مەرزىمنەن تىس داۋىس بەرگەن. وتكەن جولعى كونگرەسكە ارالىق سايلاۋمەن سالىستىرعاندا بۇل ناتيجە الدەقايدا جوعارى. ماسەلەن، 2014 جىلى تەك 19 ميلليون ادام مەرزىمىنەن بۇرىن ءوز تاڭداۋىن جاساعان.

كونگەرستىڭ ەكى پالاتاسىندا دا رەسپۋبليكالىقتار كوش باستاپ تۇر. «The New York Times» باسىلىمىندا كەي ساراپشىلار بۇل ساياسي شاراعا «دونالد ترامپ اكىمشىلىگىنە قاتىستى رەفەرەندۋم» دەپ باعا بەرگەن. ارالىق سايلاۋدا رەسپۋبليكالىقتار جەڭىسكە جەتسە، ترامپ اكىمشىلىگى كەزەكتى مارتە ءىرى باسىمدىققا يە بولادى. وسى رەتتە اق ءۇي باسشىسى دونالد ترامپ: «سىزدەر ەلىمىزگە ميگرانتتار كەرۋەنى اعىلىپ، قىلمىستاردىڭ ارتقانىن قالاساڭىزدار دەموكراتتارعا داۋىس بەرسەڭىزدەر بولادى. ال ەگەر شەكارامىز بەرىك، ۇلتتىق قاۋىپسىزدىك مىعىم جانە قوعامدىق ءتارتىپتىڭ ساقتالعانىن قالاساڭىزدار رەسپۋبليكالىقتاردى تاڭداڭىزدار»،– دەپ قىسقا قايىردى. اقش-تىڭ 44-ءشى پرەزيدەنتى باراك وباما ارالىق سايلاۋ باستالعالى جەر-جەردە ساياسي ناۋقان، ارنايى جيىن ۇيىمداستىرىپ ۇلگەردى. ول: «بىرنەشە ۋاقىت كولەمىندە ەلىمىز كوپتەگەن ءىرى جەتىستىكتەرگە جەتتى. ەندى ءبىزدىڭ ەلىمىزدىڭ نە قالايتىنى وسى سايلاۋدا بەلگىلى بولماق. حالىق وسى جولى بۇرىنعىدان دا ايرىقشا بەلسەندىلىك تانىتىپ كەلەدى. مەنىڭشە، بۇل – جاقسى جاڭالىق. ءوز باسىم، حالىقتىڭ قازىرگى بەلسەندىلىگىنە كوپ ءۇمىت ارتامىن»،– دەدى.

كەزەكتى ساياسي شارانىڭ اقش ءۇشىن ماڭىزى زور. فوتو: www.bbc.com

امەريكادا ارالىق سايلاۋعا دەيىن الدىن-الا شارالار جۇرگىزىلىپ، اقش قۇقىق قورعاۋ ورگاندارى سايلاۋشىلارعا رەسەي، يران جانە باسقا دا ەلدەردىڭ الەۋمەتتىك جەلىلەردەگى جالعان اقپاراتتارىنان ساقتانۋ كەرەكتىگىن ەسكەرتتى. وتكەن اپتادا جۇرگىزىلگەن زەرتتەۋلەر بويىنشا، اقش-تا 6 قاراشادا وتەتىن كونگرەسكە ارالىق سايلاۋ قارساڭىندا الەۋمەتتىك جەلىلەردە دەزينفورماتسيا 2016 جىلعى پرەزيدەنت سايلاۋى كەزىندەگىدەن دە تەز تارالىپ جاتقانى انىقتالدى. وسىعان وراي Facebook الەۋمەتتىك جەلىسى 115-تەن استام كۇدىكتى جانە فەيك اككاۋنتتاردى بۇعاتتاعان. جويىلعان اككاۋنتتاردىڭ باسىم بولىگى رەسەي مەن يران قولدانۋشىلارىنا ءتان. رەسمي ۋاشينگتون حاكەرلەردىڭ، ولاردىڭ ىشىندە رەسەيدىڭ ساياسي جاعدايلار مەن كانديداتتارعا قاتىستى وتىرىك حابار تاراتىپ، قوعام اراسىندا الاۋىزدىق تۋعىزىپ، پىكىر قايشىلىعىن تۋىنداتۋ ارەكەتتەرىنەن ۇلكەن قاۋىپ بارىن مالىمدەگەن.

"The Qazaq Times"