سانكتسيا ىقپالى: يران بانكتەرى حالىقارالىق SWIFT جۇيەسىنەن اجىراتىلدى

يراننىڭ بىرقاتار بانكتەرى حالىقارالىق SWIFT اقشا اۋدارۋ جۇيەسىنەن اجىراتىلدى.

اقش-تىڭ يرانعا قارسى سالىنعان ەكىنشى سانكتسيالارىنىڭ تىزىمىندە يراندى تولەمدەر وتكىزۋ مەن بانكارالىق اقپارات الماسۋ جۇيەسىنەن اجىراتۋ قاراستىرىلعان. بۇل شارا تەك قانا يران ەمەس، وسى ەلمەن مۇناي ەكسپورتىن جانە قارجىلىق بايلانىس جاسايتىن مەملەكەتتەرگە دە قاتىستى. دەمەك، الداعى ۋاقىتتا ەو-عا دا كەرى ىقپالىن تيگىزۋى ىقتيمال. سول سەبەپتى ەۋرووداق باسشىلىعى يران ترانزاكتسيالارىن ساقتاپ الۋعا ارنالعان مەحانيزمدى قۇرۋىن جەدەلدەتپەك. وسى رەتتە ەو سىرتقى قيمىلدار قىزمەتىنىڭ وكىلى مايا كوسيانچيچ: «SWIFT-تىڭ بۇل شەشىمىن ءوز نازارىمىزعا الدىق. تولەمدەر مەن بانكتەر جۇيەسىنەن اجىراتۋ بارلىعىمىزعا كەرى ىقپال ەتەدى. وسىنى ەسكەرە وتىرىپ، ەۋروپالىق بيزنەستىڭ يرانمەن ارنايى قارجىلىق مەحانيزمدەر جۇرگىزۋىن قولعا الدىق»، – دەدى.

5 قاراشادان باستاپ يران مۇنايىن ساتىپ الۋدى توقتاتپايتىن مەملەكەتتەردىڭ بانكتەرى ءۇشىن دوللاردى تۇتىنۋعا تىيىم سالۋ; يران پورتتارى مەن نەگىزگى سالالارعا قارسى سانكتسيالار: ەنەرگەتيكا، كەمە قاتىناسى جانە كەمە جاساۋ; يراننىڭ ورتالىق بانكىمەن شەتەل بانكتەرىنىڭ بارلىق ەسەپتەرى جانە يراننىڭ شەتەلدىك شوتتاردا ساقتالاتىن ۆاليۋتاعا قول جەتكىزۋىنە تىيىم سالۋ قاراستىرىلعان. اقش قارجى ءمينيسترى ستيۆەن منۋچين: «ءبىزدىڭ ماقساتىمىز – استىرتىن ارەكەتتەرگە قارسى تۇرۋ. وسى ارقىلى يراننان مۇناي ەكسپورتىن ازايتپاقپىز. ەگەر توسقاۋىل بولام دەۋشىلەر تابىلسا، جاعداي ودان سايىن ناشارلايدى. يران وزگە ايماقتارعا سوعىس اشۋ جانە جاۋلاۋشىلىق ارەكەتتەرىنەن ارىلۋى ءتيىس»، –ەكەندىگىن ايتتى. يرانعا قارسى قابىلداعان سانكتسيالار وسى ەلمەن قارجىلىق وپەراتسيالار جۇرگىزەتىن جانە مۇناي ساتىپ الاتىن وزگە ەلدەرگە دە قاتىستى بولىپ وتىر. بىراق، اقش بىرقاتار مەملەكەتتەرگە جارتى جىلعا جەڭىلدىك بەردى. جەڭىلدىككە ىلىنگەن مەملەكەتتەر قاتارىندا قىتاي، تۇركيا، ءۇندىستان، جاپونيا، وڭتۇستىك كورەيا، تايۆان، يتاليا مەن گرەتسيا بار.

ەسكە سالا كەتەيىك، رەسمي ۋاشينگتون سانكتسيالار يراننىڭ «دۇشپاندىق ءىس-ارەكەتتەرىنە»، ونىڭ ىشىندە كيبەرشابۋىلدارعا جانە بالليستيكالىق زىمىرانداردى سىناۋعا قارسىلىق ەسەبىندە سالىناتىنىن ايتتى. سونىمەن قاتار، تەھرانعا تاياۋ شىعىستاعى راديكالدى توپتارعا قولداۋ كورسەتۋگە كەدەرگى جاساۋ ماقساتىندا جۇزەگە اسادى. سانكتسيالىق تىزىمدە 700-دەن استام جەكە تۇلعا، ۇيىمدار مەن كومپانيالار، ونىڭ ىشىندە ەلدىڭ نەگىزگى بانكتەرى، مۇناي ەكسپورتتاۋشىلارى مەن كەمە قاتىناسى كومپانيالارى بار.

"The Qazaq Times"