سانكتسيالاردان كەيىن سولتۇستىك كورەيا اسكەري جاتتىعۋلارىن قىسقارتتى

اقش شەنەۋنىكتەرىنىڭ بەرگەن مالىمەتىنە سەنسەك، سولتۇستىك كورەيا جىل سايىن اسكەري وقۋ-جاتتىعۋلارعا بولىنەتىن قاراجاتتى قىسقارتقان. بۇل حالىقارالىق سانكتسيالاردىڭ ەلدىڭ اسكەري قادامدارىنا اسەر ەتىپ جاتقانىن كورسەتەدى دەپ حابارلادى «WSJ» باسىلىمى.

سولتۇستىك كورەيا ارميا – الەمدەگى ەڭ ۇلكەن ارميالاردىڭ ءبىرى. قۇراما شتاتتىڭ رەسمي وكىلدەرى جانە ۇكىمەتتەن سىرت ساراپشىلاردىڭ ايتۋىنشا، سولتۇستىك كورەيانىڭ قىستا وتەتىن اسكەري جاتتىعۋلارىنىڭ قارقىنى باياۋ، كولەمى دە اۋقىمدى ەمەس. بۇعان دەيىن كحدر اسكەري جاتتىعۋلارى ءار جەلدىڭ جەلتوقسان ايىنان كەلەسى جىلدىڭ ناۋرىز ايىنا دەيىن جالعاساتىن. سولتۇستىك كورەيانىڭ اسكەري جاتتىعۋىنداعى بۇل كورسەتكىشتىڭ باستى سەبەبى بۇۇ بەكىتكەن سانكتسيا دەپ ەسەپتەيدى، اقش وكىلدەرى. وڭدەلگەن جانە شيكى مۇناي ونىمدەرىنىڭ كىرۋىن ايتارلىقتاي شەكتەگەننەن كەيىن ەلدە قۇرلىق جانە اۋە جاتتىعۋلارىن قىسقارتىپ، شەكتى مۇناي ءونىمىن ۇنەمدەۋگە كوشكەن.

سولتۇستىك كورەيا ءىسى جونىندەگى اسكەري ساراپشىلاردىڭ ءبىرى جوزەف بەرمۋدزەنىڭ ايتۋىنشا، اسكەري جاتتىعۋدىڭ قىسقارۋى سولتۇستىك كورەيانىڭ ناقتى سوعىس قۋاتىنا دا اسەر ەتەتىن بولادى. سەبەبى، اسكەرلەردىڭ سوعىس قابىلەتىن ساقتاپ تۇرۋ ءۇشىن ۇنەمى وقۋ-جاتتىعۋ جاساتۋ كەرەك بولادى.

دەگەنمەن، اقش-تىڭ وزگە اسكەري ساراپشىلارى بۇل سولتۇستىك كورەيا اسكەري قۋاتىن ەلەۋلى دارەجەدە تومەندەتپەيتىنىن ەسكەرتتى. سونىمەن بىرگە، قازىرگە دەيىن حالىقارالىق سانكتسيالاردىڭ كحدر يادرولىق باعدارلاماسى مەن زىمىران دامىتۋ باعدارلامالارىنا قالاي اسەر ەتىپ جاتقانىن انىق بىلە الماي وتىرعاندارىن العا تارتتى.

“The Qazaq Times”