شىعىس ازيا. فوتو-كارتا: saylordotorg.github.io

ۋكرايناداعى سوعىستان كەيىن الەمدەگى سەزىمتال شيەلەنىس وشاقتارى «جوعارى تەمپەراتۋرادا» تۇر. ۋكراينادا بولىپ جاتقان كەسكىلەسكەن سوعىس جۇرت نازارىن كوبىرەك اۋدارعاندىقتان، وزگە ايماقتارداعى شيەلەنىستەردىڭ بۇرىنعىدان كورى قاۋىپكە بەت الىپ جاتقانىن اڭعارماي دا جاتقانداي. ايتالىق، يەمەندەگى سوعىس، افريكاداعى جاڭا شەكارالار، قايتا كوتەرىلگەن يزرايل-پالەستين تاقىرىبى. بۇلارعا ۇقساس شىعىس ازياداعى «ءداسۇرلى قايشىلىقتار» قايتا ويانىپ كەلەدى. قىتاي مەن سولتۇستىك كورەيانىڭ ۇركىتۋ-قورقىتۋ ارەكەتتەرى كۇشەيگەندىكتەن جاپونيا امەريكا قۇراما شتاتتارىمەن وداقتاستىق ىنتىماقتاستىقتى كۇشەيتۋگە قام قىلۋدا.

وتكەن سەنبىدە، جاپونيانىڭ باس ءۋازىرى (پرەمەر-ءمينيسترى) فۋميو كيشيدا (Fumio Kishida) ەلىنە ساپارلاي كەلگەن اقش سەناتورلارىن قابىلداپ، جاپونيا مەن اقش ورتاسىنداعى وداقتاستىق ىنتىماقتاستىعىن جانداندىرۋ بويىنشا ۇزاق كەڭەس وتكىزدى. بۇل كەزدەسۋدە تاراپتار «ەركىن جانە اشىق ءۇندى-تىنىق مۇحيت ايماعى» ۇستانىمىن ساقتاۋ بويىنشا ورتاق مۇددەگە يە ەكەندەرىن تاعى ءبىر رەت قايتالادى.

ەڭ ماڭىزدىسى، امەريكالىق 6 سەناتور جاپونياعا ساپارىنان ءبىر كۇن بۇرىن تايۋان پرەزيدەنتى تساي يڭۆەننىڭ قابىلداۋىندا بولعان ەدى. وندا ولار ءوزىن ءوزى باسقارىپ كەلگەن جانە دەموكراتيالى تايۋاندى قولدايتىنىن ءبىلدىرىپ، قىتايعا قاراتا ەسكەرتۋ سيپاتتاعى مالىمدەمەلەر جاسادى. اقش زاڭ شىعارۋشىلارىنىڭ تايۋانعا ساپارلاي بارعانىنا نارازىلىق تانىتقان قىتاي بۇعاز ماڭىندا اسكەري جاتتىعۋ وتكىزىپ سەس كورسەتتى. بۇعان قوسا قىتاي سىرتقى ىستەر مينيسترلىگىنىڭ رەسمي وكىلى جاۋ ليشيان قىتايدىڭ «ۇلتتىق ەگەمەندىك پەن اۋماقتىق تۇتاستىقتى تاباندى تۇردە قورعاۋ ءۇشىن قاتاڭ شارالار قابىلداۋعا دايىن» ەكەنىن ايتتى.

ۇزاق ۋاقىتتان بەرى جاپونيا قىتايدىڭ تايۋان ماسەلەسىنە قاتىستى ۇستانىمىنان الاڭداپ كەلدى، ۋكراينا سوعىسىنان كەيىن الاڭداۋشىلىق ءتىپتى دە كۇشەيدى، سەبەبى، ۋكرايناداعى اشىق اگرەسسيالارعا ىلەسە الەمدەگى ەلدەردىڭ قايشىلىقتاردى اسكەري ءىس-قيمىلدارمەن شەشۋگە دەگەن نيەتى وياندى. بۇل تۇستا «قىتاي تايۋاندى كۇشپەن باعىندىرۋعا ارەكەت ەتسە، قۇراما شتتار ارالاسا ما، جوق پا؟» دەگەن سۇراق تاعى دا قىزۋ تالقىنىڭ تاقىرىبىنا كوتەرىلدى. اقش-تايۋان-قىتاي – ۇشتاعاندى ماسەلەسىندە جاپونيا بىلايعى ۋاقىتتا بايقالمايتىن قاتىسۋشىلىق مۇمكىندىگىنە يە.  سەبەبى، اقش-تىڭ جاپونيادا ۇتساعاپ تۇرعان اۋقىمدى اسكەري كۇشى بار.

جاپونيا تايۋاندى تاۋەلسىز ەل رەتىندە رەسمي مويىنداماعىنمەن تىعىز دوستىق قارىم-قاتىناستى ساقتاپ كەلەدى. قازىر جاپون بيلىگىنە سەنىمدى ارميا قۇرۋدى قۋاتتايتىن كونسەرۆانتتار كەلدى. بۇل تۇستا جاپونيا وڭىردەگى گەوساياسي ءىس-قيمىلدا بەلسىندى بولا تۇسەدى دەگەن بولجامدار بار.

The Qazaq Times