كەشە، 30 مامىر دۇيسەنبىنىڭ كەشىندە، ەۋروپالىق وداق ليدەرلەرى رەسەيگە قارسى سانكتسيالاردىڭ 6-شى پاكەتىن ماقۇلدادى. بۇل سانكتسيا كەزەگىندە رەسەي مۇنايىن يمپورتتاۋعا اۋقىمدى شەكتەۋلەر جانە سبەربانكتى SWIFT جۇيەسىنەن شىعارۋ ماسەلەسى قاراستىرىلعان.

ەۋروپا كەڭەسىنىڭ توراعاسى شارل ميشەل ءوزىنىڭ الەۋمەتتىك جەلىدەگى پاراقشاسىنا جاريالاعان پىكىرىندە، رەسەيدىڭ ەو-عا باعىتتالاتىن مۇناي ەكسپورتىنا شەكتەۋ قويۋ ەلدىڭ تۇتاس مۇناي ەكسپورتىنىڭ ۇشتكەن ەكى بولىگىنە اسەر ەتەتىندىكتەن، كەزەكتى سانكتسيا رەسەيلىك سوعىس ماشيناسىنىڭ قارجىلىق كوزدەرىن بۇعاتتايتىنىن ايتتى. ول بۇل شارانى: «بۇل سوعىس توقتاتۋ ماقساتىندا رەسەيگە جاسالعان ماكسيمالدى قىسىمىل»، – دەپ باعالادى.

دەگەنمەن، رەسەيدەن ەو ەلدەرىنە تەڭىز ارقىلى جەتكىزىلەتىن مۇنايلارعا عانا شەكتەۋ قويىلدى، «درۋجبا» مۇناي قۇبىرى ارقىلى جەتكىزىلەتىن مۇناي شەكتەۋسىز قالدىرىلدى. سەبەبى، بۇل قۇبىر ارقىلى باراتىن مۇنايعا ۆەنگريا سەكىلدى ەو مۇشەلەرى تاۋەلدى بولعاندىقتان سانكتسياعا كىرگىزۋگە قارسى بولدى.

سونىڭ وزىندە، سانكتسيانىڭ كەزەكتى پاكەتىن جاريا ەتىپ تۇرىپ شارل ميشەل قۇبىر ارقىلى جەتكىزىلەتىن مۇنايدى شەكتەۋسىز قالدىرۋدىڭ ءوزى ۋاقىتتىڭ ءىس ەكەنىن ەسكەرتتى.

ەو تارابى بىلدىرگەندەي، رەسەيدىڭ ءىرى بانكى سبەربانك ەو ەلدەرىندەگى SWIFT جۇيەسىنەن شىعارىلدى. بۇعان قوسا جىل اياعىنا دەيىن رەسەيدەن يمپورتتالاتىن مۇنايدىڭ 90 پايىزىنا شەكتەۋ كىرگىزۋدى جوسپارلاپ جاتىر. رەسەيگە قارسى سانكتسيالارمەن قاتار ەو تارابى ۋكرايناعا 9 ميلليارد ەۆرو كولەمىندە كومەك كورسەتۋدى اقىلداسىپ جاتىر. قازىرگە بۇنداي كولەمدەگى قارجىنى قاي تارماقتان الىنىپ، قالاي بەرىلەتىنى انىق ەمەس.

قابىلدانعان شەشىمدەر سوڭعى رەت تەحنيكالىق تەكسەرىستەردەن ءوتىپ بارىپ وداقتىڭ رەسمي باسىلىمىنا جاريالانادى. سودان كەيىن عانا سانكتسيا تولىق كۇشىنە ەنەتىن بولادى.

The Qazaq Times