بۇگىن «قازاق ءۆالسىنىڭ كورولى» اتانعان، ۇلتىنىڭ ۇلى تۇلعالارىنىڭ بىرى ءشامشى قالداياقوۆتىڭ تۋعان كۇنى. ۇلت تاريحىندا اتى قالعان كومپوزيتور 1930 جىلدىڭ ءدال وسى كۇنىندە (15 تامىز), وڭتۇستىك قازاقستان وبلىسى وتىرار اۋدانىندا دۇنيەگە كەلگەن.

اسا دارىندى سازگەر تۇمسا تالانتىمەن جانە ىزدەنىس ەڭبەگىنىڭ نەگىزىندە وسى زامانعى قازاق ەستراداسىنىڭ نەگىزىن سالۋشىلاردىڭ ءبىرى بولىپ، ەسىمى ەل تاريحىندا ماڭگىلىك قالدى. شىعارماشىلىق جولىندا 300-گە جۋىق تارتىمدى ءان قالدىرعان تالانت يەسىنە روبەرت فايلەر سىندى اعىلشىننىڭ ونەر قايراتكەرى تاڭداي قاعا تامسانىپ، ادامزات مۋزىكا الىبىمەن تانىسقانىن ايتىپ ماقتانىپتى.

بۇگىندە ەگەمەن ەلىنىڭ ءانۇرانىنا اينالعان «مەنىڭ قازاقستانىم» اتتى تۋىندىسى، قازاق جەرىنىڭ تۇتاستىعىنا سەلكەۋ تۇسكەن، ەڭ ءبىر تاريحي كەزدە دۇنيەگە كەلگەن. كەڭەس وداعى كەزىندە قازاقستاننىڭ سولتۇستىك بەس وبلىسىن رەسەيگە قوسۋ تۋرالى ماسكەۋدىڭ ىزعارى ەسكەن تۇستا، ءشامشى قازاقستاننىڭ تۇتاستىعىن تۋ ەتكەن، جالپى حالىققا تارايتىن ورتاق ۇراننىڭ كەرەك ەكەنىن تەرەڭ ساناسىمەن سەزىنگەن. جۇرەگىنىڭ تۇبىندە قايناپ جاتقان وتانشىل ۇلى سەزىمىن انگە اينالدىرىپ، «مەنىڭ ەلىم، مەنىڭ جەرىم...» دەپ ۇلتىنىڭ جان ايقايىن سىرلى سازىنا سىيدىرعان ەكەن.

قازاق توپىراعىنىڭ تۇكپىر-تۇكپىرىنەن شىرقالعان بۇل ءان، بابا تۇلپارىنىڭ دۇبىرىندەي ۇلى دالانى دۇركىرەگەن رۋحتاي كەرنەسە كەرەك. بۇگىندە ءاربىر قازاقستاندىق وڭ قولىمەن جۇرەك تۇسىن باسىپ تۇرىپ، وتانعا دەگەن سۇيىسپەنشىلىگىن وسى ەكپىندى رۋح سازىمەن جەتكىزەدى. 2005 جىلدان باستاپ «مەنىڭ قازاقستانىم» ءانى مەملەكەت ءانۇران مارتەبەسىندە، كوك بايراقپەن بىرگە جەلبىرەپ، ۇلى دالامەن بىتە قايناسىپ كەلەدى.

وشپەس ونەر تۋىندىلارىن قالدىرعان ءشامشى قالداياقوۆ 1992 جىلى اقپان ايىنىڭ 29 جۇلدىزىندا الماتىدا دۇنيە سالعان. دالاسىن سازبەن الديلەگەن ۇلىنىڭ ەسىمى حالقىنىڭ ەسىندە ماڭگىلىككە ساقتالادى. رۋحىنا تاعزىم رەتىندە تىلەگەن احمەتوۆتىڭ "قايران ءشامشى" اتتى دەرەكتى ءفيلمىن ۇسىنامىز!

“The Qazaq Times”