مايعازيەۆ ءشامشى اندەرىنىڭ كونتسەرتىن وتكىزۋدى نە سەبەپتى تىركەلگەنىنە ەكى-اق كۇن بولعان كومپانياعا تاپسىردى؟

شىمكەنت قالالىق مادەنيەت ءۇيى ءشامشى قالداياقوۆ ءاندىرىنىڭ  كونتسەرتىن وتكىزۋ ءۇشىن تسيMediaGroup كومپانياسىمەن 60 ملن تەڭگەگە كەلىسىمشارت جاساسقان. ال اشىق دەرەككوزدەردەگى اقپاراتقا قاراعاندا، بۇل كومپانيا شىمكەنتتەگى مادەنيەت ۇيىمەن كەلىسىمشارت جاساساردان ەكى كۇن بۇرىن عانا مەملەكەتتىك تىركەۋدەن وتكەن. مادەنيەت ءۇيى بيۋدجەتى 60 ملن تەڭگە بولاتىن ءىس-شارانى ۇيىمداستىرۋدى نە سەبەپتى جاڭادان قۇرىلعان تاجىريبەسىز كومپانياعا تاپسىردى؟ The Qazaq Times ءتىلشىسى وسى سۇراقتىڭ جاۋابىن ىزدەپ كوردى.

مەملەكەتتىك ساتىپ الۋ پورتالىنداعى دەرەككە قاراعاندا، تسيMediaGroup 14 شىلدە كۇنى قۇرىلعان. كومپانيا (قۇجات بويىنشا) يسماگۋلوۆا نازيا نۋرلانوۆنا دەگەن ازاماتقا تيەسىلى. مەمساتىپ الۋ پورتالىندا كومپانيا مەكەن-جايى رەتىندە استاناداعى باۋىرجان موموشۇلى كوشەسى كورسەتىلگەن. ال ۇلتتىق ستاتيستيكا بيۋروسىنىڭ دەرەگىنشە، تسيMediaGroup شىمكەنت قالاسىنىڭ ءال-فارابي اۋدانىندا تىركەلگەن.

مەمساتىپالۋ پورتالىنداعى تسيMediaGroup كومپانياسى جايلى مالىمەتتىڭ سكرينشوتى.

ۇلتتىق ستاتيستيكا بيۋروسى سايتىنداعى تسيMediaGroup جايلى اقپارات.

كومپانيا قۇرىلعان سوڭ 3 كۇننەن كەيىن مەمساتىپ الۋ پورتالىنا تىركەلىپ، شىمكەنت قالالىق مادەنيەت ۇيىمەن ءشامشى اندەرىنىڭ كونتسەرتىن وتكىزۋ بويىنشا كەلىسىمشارتقا وتىرعان. 16 شىلدەدە باستالعان كەلىسىمشارت پروتسەسى تامىزدىڭ 2-سىندە اياقتالىپ،  تسيMediaGroup كومپانياسى رەسمي تۇردە وسى ساتىپ الۋ بويىنشا تاپسىرىس ورىنداۋشى كومپانيا اتانعان.

مەملەكەتتىك ساتىپ الۋ پورتالىنان سكرينشوت.

كەلىسىمشارتقا سايكەس، ءشامشى اندەرىنىڭ كونتسەرتى كومپوزيتوردىڭ تۋعان كۇنىنە وراي، ياعني 15 تامىزعا جوسپارلانعان. بىراق كونتسەرت ول كۇنى وتكەن جوق، كەلىسىمشارت تا پورتالدا سول كۇيى تۇر. وسىعان بايلانىستى شىمكەنت قالالىق مادەنيەت ۇيىنە حابارلاسىپ كوردىك. ءبىزدىڭ سۇراقتارىمىزعا مادەنيەت ءۇيىنىڭ ديرەكتورى ساكەن مايعازيەۆ ەمەس، ونىڭ ورىنباسارى عاني امانقۇلوۆ جاۋاپ بەردى.

-كونتسەرتتى 15 تامىزدا وتكىزۋدى جوسپارلاعانبىز. كەيىن بىزدە كارانتين جاعدايىنا بايلانىستى ءىس-شارا وتپەيتىن بولدى. ءبىز ەندى بۇل كەلىسىمشارتتى بۇزعالى جاتىرمىز، - دەدى امانقۇلوۆ.

نەگىزى بۇل تەندەر بويىنشا ءبىر كوزدەن ساتىپ الۋ ءتاسىلى قولدانىلعان. ياعني تاپسىرىس بەرۋشى مەكەمە تاپسىرىس ورىنداۋشى كومپانيانى ەشقانداي كونكۋرسسىز تاڭداپ العان. جۋرناليست مايعازيەۆتىڭ ورىنباسارىنان كونتسەرت وتكىزۋگە نە سەبەپتى قۇرىلعانىنا ەكى-اق كۇن بولعان تاجىريبەسىز كومپانيا تاڭدالعانىن سۇرادى. امانقۇلوۆ ءتىلشىنىڭ بۇل سۇراعىنا جاۋاپ بەرە المادى. ونىڭ ايتۋىنا قاراعاندا، مادەنيەت ءۇيىنىڭ ديرەكتورى ساكەن مايعازيەۆ بىرەر كۇن بۇرىن قىزمەتىنەن كەتكەن. ال كونتسەرتتى وتكىزۋگە نە سەبەپتى تسيMediaGroup كومپانياسى تاڭدالعانىن مايعازيەۆ بىلەدى ەكەن. امانقۇلوۆ مايعازيەۆكە حابارلاسىپ، ماسەلەنى انىقتاۋعا تىرىساتىنىن، سودان كەيىن تىلشىگە ءبىر حابارىن بەرەتىنىن ايتتى. بىراق وسى ماقالا جاريالانعانشا شىمكەنت قالالىق مادەنيەت ۇيىنەن ەشقانداي حابار بولعان جوق.

بۇعان دەيىن شىمكەنتتەگى ناۋرىز تويىنا ارنالعان ءىس-شارالاردىڭ بيۋدجەتىنە بايلانىستى قوعامدا شۋ تۋعان. جۋرناليستەر مەن بەلسەندىلەر ساكەن مايعازيەۆ باسقارعان قالالىق مادەنيەت ءۇيىنىڭ ناۋرىزعا وراي ءتۇرلى كومپانيالارمەن قۇنى 595 ملن تەڭگە بولاتىن جەتى كەلىسىمشارت جاساسقانىن جازعان. جۋرناليستەر زەرتتەۋىندە ناۋرىزعا وراي جاسالعان كەلىسىمشارتتاردا تەحنيكالىق ەرەكشەلىك دۇرىس تولتىرىلماعانى ايتىلدى. بۇعان قوسا، وسى ماسەلەنى كوتەرگەن بەلسەندىلەر ءىس-شارالارعا قارجىنىڭ تىم بولىنۋىنە جانە تەندەردى تاجىريبەسى جوق كومپانيالاردىڭ ۇتقانىنا باسا نازار اۋداردى.

وسى ماسەلە قوعامدا قىزۋ تالقىلانىپ جاتقاندا ساكەن مايعازيەۆ تە، شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان دا جۋرناليستەر كەلتىرگەن دەرەكتى جوققا شىعاردى. ولار "ناۋرىزعا تەك 213  ملن تەڭگە بولىنگەنىن، جۋرناليستەر كەلتىرگەن 595 ملن تەڭگە جىل بويى وتەتىن ءىس-شارالارعا قاراستىرىلعانىن" ءۋاج ەتتى. بيىل ماۋسىمدا ورتالىق كوممۋنيكاتسيالار قىزمەتىندە وتكەن بريفينگتە The Qazaq Times ءتىلشىسىنىڭ سۇراعىنا جاۋاپ بەرگەن شىمكەنت قالاسىنىڭ اكىمى مۇرات ايتەنوۆ تە  595 ملن تەڭگە تەك ناۋرىز تويلاۋعا ەمەس، جىل بويى وتەتىن ءىس-شارالارعا دا ارنالعانىن ايتتى. ونىڭ سوزىنشە، مەملەكەتتىك ساتىپ الۋ پورتالىنداعى 595 ملن تەڭگەگە جاسالعان كەلىسىمشارتتىڭ بارىندە "ناۋرىز مەرەكەسىنە وراي" دەپ جازىلىپ تۇرۋىنا "مەكەمە قىزمەتكەرىنىڭ قاتەلىگى سەبەپ" بولعان.

شىمكەتتىك شەنەۋنىكتەردىڭ "ناۋرىزعا 213 ملن تەڭگە ءبولىندى، 595 ملن تەڭگە جىل بويى وتەتىن ءىس-شارالار ءۇشىن قاراستىرىلعان" دەگەنى مەملەكەتتىك ساتىپ الۋ پورتالىنداعى رەسمي دەرەككە قايشى. ويتكەنى مادەنيەت ءۇيىنىڭ جىل باستالعالى مەرەكەلىك ءىس-شارالار ءۇشىن جاساسقان كەلىسىمشارتتارىنىڭ جالپى قۇنى قازىردىڭ وزىندە 680 ملن تەڭگەدەن اسىپ كەتتى. مەملەكەتتىك ساتىپ الۋ پورتالىنىڭ دەرەگىنە سۇيەنسەك، شىمكەنت اكىمدىگى مەرەكەلىك ءىس-شارالارعا 2021 جىلى 800 ملن تەڭگەدەن استام قاراجات جۇمساۋدى جوسپارلاپ وتىر.

The Qazaq Times