بۇگىن 1 ماۋسىم حالىقارالىق بالالاردى قورعاۋ كۇنى. ادامزات بولاشاعىنىڭ مۇراگەرلەرى – بالالارعا نازار اۋدارىپ، ولار تۋرالى ويلاۋعا مۇرسات بەرەتىن كۇن. بالالىق شاقتى ەلەستەتكەن ءار ادامنىڭ قامسىز، باقىتتى كۇندەر ەسىنە ورالارى انىق. الايدا، قاتال قوعامىمىز كەي ادامزات بالاسىن باقىتتى بالا شاعىنان ايىردى. ەكىنشى دۇنيە سوعىسى جىلدارىنان كەيىنگى قازاق ادەبيەتىنە «بىزدە بالالىق شاق بولعان جوق» دەگەن تاقىرىپتاردىڭ كىرىسۋى ءبىر ءبىزدىڭ ەمەس، تۇتاس ادامزات قوعامىن ۇلكەن سوتقا تارتاتىنى شىن.

دۇنيەگە دەگەن تانىم جاڭارعان، جاڭا وركەندەۋ ءداۋىرى جەتكەن بۇگىنگى كۇندە دە ءبىز الەمدەگى از بولماعان ايماقتارداعى جازىقسىز سابيلەردىڭ ايانىشتى تاعدىرلارى تۋرالى ەستىپ، ءبىلىپ وتىرمىز. ءبىز بۇگىن الەمنىڭ ءبىر مۇشەسى رەتىندە ادامسۇيگىشتىك، باۋىرمالدىق، ىزگىلىك، مەيىرىم تۇرعىسىنان سوعىس ءورتى قاماعان ەلدەردەگى بالالىق شاعى وق استىندا وپات بولعان بالالار تۋرالى ويلانايىق.

ءساۋىر ايىندا بۇۇ كورسەتكەن مالىمەت بويىنشا الەمدە 22 ملن بالا اشتىقتا ءومىر ءسۇرىپ وتىر. سونىڭ ىشىندە 1,4 ملن بالا حال ۇستىندە جاتىر. وسىنىڭ باسىم كوبى الەمدە سوعىس تۋىلىپ جاتقان 30-دان استام مەملەكەتتە بولعان جاعداي.

بۇۇ كورسەتكەن مالىمەت بويىنشا، تەك قانا 1990-2003 جىل ارالىعىندا 2 ميلليوننان استام جازىقسىز بالانىڭ ءومىرىن سوعىس جالماعان. 6 ملن.-نان استام بالا مۇگەدەك بولدى نەمەسە جاراقات الدى. 12 ملن بالا باسپاناسىنان ايىرىلعان. ال بۇل كورسەتكىش قازىر ەكىنشى دۇنيە سوعىسىنان بەرگى ەڭ جوعارى شەككە جەتىپ وتىر. ءبىر عانا ءسۇريا سوعىسىندا جارتى ميلليون ادام كوز جۇمسا، قازا بولعانداردىڭ ءار التىنشىسى بالالار. 300 مىڭعا جۋىق بالا گۋمانيتارلىق كومەككە ءزارۋ بولىپ وتىر. ءسۇريانىڭ وزىندە 2015 جىلى 522 بالا تەك قانا سوعىستا كوز جۇمسا، 2016 جىلى ودان 20 پايىزعا ارتقان. باسپاناسىز بالالار سانى بۇلاردان الدە قايدا كوپ.

ال، يەمەندە اشتىقتان وزەگى تالىپ 2 ملن بالا مەيىرىمدى جانداردىڭ كومەگىن كۇتىپ وتىر. ونىڭ ىشىندە 60 مىڭنان استام بالاعا اشتىقتان ءولىم قاۋىپى ءتونىپ تۇر. ال ءسىز وسى مالىمەتتەردى وقىپ وتىرعاندا بۇل ستاتيستيكالىق كورسەتكىشتەردەگى سانداردىڭ وزگەرىپ جاتقانىن ەسكەرىڭىز.

سوعىس تۋىلعان ەلدەردەگى بالالاردىڭ ءومىرى وپات بولۋمەن بىرگە، ءتىرى قالعانداردىڭ بولاشاق وركەنى كوكتەي ورىلۋدا. تەررورلىق توپتار مىلتىق كوتەرە المايتىن بالالاردان تارتىپ ەرەسەكتەرىنە دەيىن جانكەشتىلىككە جەلىكتىرسە، بۇلدىرشىندەي قىزداردى جەزوكشەلىككە باۋلىدى نەمەسە شەتەلدەرگە ساتتى. يراك، ءسۇريا جەرىندە جانتۇرشىگەرلىك حيميالىق سىناقتارعا ۇلگى بولعان جاسوسپىرىمدەر سانىنىڭ ءوزى نەشە جۇزدەن اسادى.

سوعىس تۋىلعان ەلدەردى بىلاي قويعاندا، بەيبىت ەلدەردە جارىق دۇنيە ەسىگىن اشپاي جاتىپ قاتال تاعدىرعا تەلىنگەندەر قانشا ما! كۇن سايىن تەبىندەپ كەلە جاتقان ادام اعزاسى ساۋداسى دا بالالار ومىرىنە تونەتىن قاۋىپتى كۇشەيتە تۇسۋدە.  انا-اناسى جاعىنان قاراۋسىز قالىپ ءتىرى جەتىم كۇن كەشكەن بالالاردى بۇگىنگى مەرەكە دە قالاي قۇتتىقتاساق تا ادامزات قوعامىنىڭ ايىبىن جۋا الامىز با!

«بالالاردى قورعاۋ كۇنى قۇتتى بولسىن»!

ءبارىمىز بالالاردى قورعايىق!

“The Qazaq Times”