Bügin 1 mausım Halıqaralıq balalardı qorğau küni. Adamzat bolaşağınıñ mwragerleri – balalarğa nazar audarıp, olar turalı oylauğa mwrsat beretin kün. Balalıq şaqtı elestetken är adamnıñ qamsız, baqıttı künder esine oraları anıq. Alayda, qatal qoğamımız key adamzat balasın baqıttı bala şağınan ayırdı. Ekinşi dünie soğısı jıldarınan keyingi qazaq ädebietine «Bizde balalıq şaq bolğan joq» degen taqırıptardıñ kirisui bir bizdiñ emes, twtas adamzat qoğamın ülken sotqa tartatını şın.

Düniege degen tanım jañarğan, jaña örkendeu däuiri jetken bügingi künde de biz älemdegi az bolmağan aymaqtardağı jazıqsız säbilerdiñ ayanıştı tağdırları turalı estip, bilip otırmız. Biz bügin älemniñ bir müşesi retinde adamsüygiştik, bauırmaldıq, izgilik, meyirim twrğısınan soğıs örti qamağan elderdegi balalıq şağı oq astında opat bolğan balalar turalı oylanayıq.

Säuir ayında BWW körsetken mälimet boyınşa älemde 22 mln bala aştıqta ömir sürip otır. Sonıñ işinde 1,4 mln bala hal üstinde jatır. Osınıñ basım köbi älemde soğıs tuılıp jatqan 30-dan astam memlekette bolğan jağday.

BWW körsetken mälimet boyınşa, tek qana 1990-2003 jıl aralığında 2 millionnan astam jazıqsız balanıñ ömirin soğıs jalmağan. 6 mln.-nan astam bala mügedek boldı nemese jaraqat aldı. 12 mln bala baspanasınan ayırılğan. Al bwl körsetkiş qazir Ekinşi dünie soğısınan bergi eñ joğarı şekke jetip otır. Bir ğana Süriya soğısında jartı million adam köz jwmsa, qaza bolğandardıñ är altınşısı balalar. 300 mıñğa juıq bala gumanitarlıq kömekke zäru bolıp otır. Süriyanıñ özinde 2015 jılı 522 bala tek qana soğısta köz jwmsa, 2016 jılı odan 20 payızğa artqan. Baspanasız balalar sanı bwlardan älde qayda köp.

Al, Yemende aştıqtan özegi talıp 2 mln bala meyirimdi jandardıñ kömegin kütip otır. Onıñ işinde 60 mıñnan astam balağa aştıqtan ölim qauipi tönip twr. Al siz osı mälimetterdi oqıp otırğanda bwl statistikalıq körsetkişterdegi sandardıñ özgerip jatqanın eskeriñiz.

Soğıs tuılğan elderdegi balalardıñ ömiri opat bolumen birge, tiri qalğandardıñ bolaşaq örkeni köktey orıluda. Terrorlıq toptar mıltıq kötere almaytın balalardan tartıp eresekterine deyin jankeştilikke jeliktirse, büldirşindey qızdardı jezökşelikke baulıdı nemese şetelderge sattı. Irak, Süriya jerinde jantürşigerlik himiyalıq sınaqtarğa ülgi bolğan jasöspirimder sanınıñ özi neşe jüzden asadı.

Soğıs tuılğan elderdi bılay qoyğanda, beybit elderde jarıq dünie esigin aşpay jatıp qatal tağdırğa telingender qanşa ma! Kün sayın tebindep kele jatqan adam ağzası saudası da balalar ömirine tönetin qauipti küşeyte tüsude.  Ana-anası jağınan qarausız qalıp tiri jetim kün keşken balalardı bügingi mereke de qalay qwttıqtasaq ta adamzat qoğamınıñ ayıbın jua alamız ba!

«Balalardı qorğau küni qwttı bolsın»!

Bärimiz balalardı qorğayıq!

“The Qazaq Times”