Para alğan vice-ministr Säken Mwsaybekov, onıñ basşısı ministr Aqtotı Rayımqwlova, prem'er-ministr Asqar Mamin jäne prezident Toqaev. Fotokollaj: QT

QT redakciyası jıl basında lauazımınan bosatılıp, keyinnen para aldı degen küdikpen isti bolğan orınbasarınıñ kinäsi däleldengen jağdayda otstavkağa ötiniş jazatının mälimdegen ministr Aqtotı Rayımqwlovanıñ mäselesi jaylı prem'er-ministr Asqar Maminniñ atına joldağan swrau hatına jauap aldı.

Biıl mamırda ükimet qwramındağı jalğız äyel jäne mädeniet jäne sport ministri  sot ayıptau ükimin oqısa, otstavkağa ketuge dayınmın mälimdegen. Artınşa tamız ayında Almatı qalası Türksib audandıq sotı bwrınğı vice-ministr Säken Mwsaybekovke 15 mıñ dollar para aldı degen ayıppen kinäli dep tauıp, 62 mln teñge köleminde ayıppwl salğan. Resmi aqparatqa qarağanda, Rayımqwlova uädesin orındağan, biraq  onı «tağayındağan lauazımdı adam uäjdi türde bas tartqan». Konstituciyanıñ 65-babı men «Ükimet turalı» konstituciyalıq zañnıñ 19-babı boyınşa, prem'er-ministr prezidentke minkab qwramına kandidattardıñ tizimin wsınadı.

«Mädeniet jäne sport ministrliginiñ aqparatı boyınşa, ministr Aqtotı Rayımqwlova bwrınğı vice-ministr S.J. Mwsaybekovke qatıstı sot ükiminiñ zañdı küşine enuine baylanıstı «Qazaqstan Respublikasınıñ memlekettik qızmeti turalı» zañnıñ 60-babına säykes, otstavkağa ketu turalı ötiniş berdi. Ötinişti qarau nätijeleri boyınşa otstavka qabıldanğan joq. Zañnıñ 60-babınıñ 2-tarmağına säykes «otstavkadan bas tartılğan jağdayda sayasi qızmetşi qızmettik ökilettikterin atqarudı jalğastıruğa tiis», – delingen Ükimettiñ jauap hatında.

Redakciyağa joldanğan aqparatta otstavkağa ötiniş qaşan berilgeni jäne onı qanağattandarudan qanday uäjben kim bas tartqanı jöninde mülde aytılmağan. Şeşim qabıldauşı Toqaev nemese Mamin qaysıbiri ekeni belgisiz, qwqıqtıq arajigi ayqındalmağan.

2019 jılğı qaraşada Toqaev «Memlekettik qızmet turalı» jäne «Jemqorlıqpen küres turalı» zañdarğa özgertu engizip, qızmetkeri paramen wstalğan basşını otstavkağa arız jazuğa mindetteytin erejeni bekitken. Resmi derekke qarağanda, 2020 jılı ärtürli deñgeydegi 7 äkim men olardıñ orınbasarları, sonday-aq 14 oblıstıq basqarma basşısı men olardıñ orınbasarları qılmıstıq jazağa tartılğan. Bwdan özge bıltırğı qañtar men biılğı naurız aralığında, 14 ayda qaramağındağı qızmetkeri jemqorlıq jasağanı üşin 20 sayasi qızmetşige şara qoldanılğan. Tirkelgen jäne sot ükim şığarğan isterdi tolıq eseptegende bwl esep äldeqayda köp boluşı edi. Degenmen zañdağı «qatañ mehanizm» retinde äspettelgen talapqa qaramasatan, birqatar ministr men äkim qolastındağı äriptesiniñ jemqorlığı üşin otstavkağa ketuden jaltaruda «jolı bolğan» ya «amalın tapqan». Tağayındauşı basşınıñ qaramağındağı qızmetkerdiñ otstavka jönindegi ötinişinen bas tartu kriteriyleri naqtı emes.

Sonımen qosa, Qazaqstanda ädette qoğamda qattı sınğa wşırap, tipti prezidenttiñ özinen qatañ eskertu alğan basşılardıñ özi «uaqıtşa mezettik üzilisten» keyin türli joğarı lauazım iesi bola beredi. Mäselen, biıl «Wlı dala jwtına» baylanıstı Toqaevtıñ wsınısımen otstavkağa ketken eks-auıl şaruaşılığı ministri Saparhan Omarov büginde Azıq-tülik kelisimşart korporaciyasınıñ basqarma törağası qızmetinde. Däl sol siyaqtı quañşılıqtan eñ köp zardap şekken, uaqıtılı qamdanbağan Mañğıstau oblısınıñ osığan deyingi äkimi Serikbay Trwmov senator-deputat mandatın ielendi. Biraq joğarıda bayandalğan auıs-tüyis kezinde Toqaev Jambıl oblısınıñ äkimi Berdibek Saparbaevqa 2019 jılı Tarazda oquşı zorlanğannan keyin qala äkimi qızmetinen bosatılğan Qayrat Dosaevtı basqarması basşılığına tağayındağanı üşin sögis jariyalap, qateligin tüzeudi tapsırğan. Sol küni-aq tüs aua eks-äkimniñ basqarma jetekşiliginen bosağanı habarlandı. Mwnı sayasatşı sarapşılar men azamattıq qoğam belsendileri «qosstandarttı wstanım» dep sınağan.

The Qazaq Times