Qonaev qalasında ötip jatqan Almasbek Sadırbaydıñ sotı tağı bir mañızdı swraqtı kün tärtibine şığardı: aşıq sot degenimiz ne?

Sud'ya Nwrswltan Qoyşıbaev bwl procestiñ aşıq ekenin birneşe ret atap ötti. Alayda däl osı aşıq sotta jurnalisterge beyne tüsiruge ğana emes, audio jazuğa da tıyım salındı. Keyinirek tipti sud'yanıñ özin, prokurordı jäne jalpı sot procesin tüsiruge bolmaytını aytıldı.

Sonda aşıqtıq qay jerde qaldı?

Jäbirlenuşi tarap ökilderi öz qauipsizdigine alañdaytının jetkizdi. Äleumettik jelilerde özderine qatıstı jağımsız pikirler jazılatının ayttı. Bwl alañdauşılıqtı tüsinuge boladı. Är azamattıñ qauipsizdigi zañmen qorğaluı tiis. Biraq däl osı sebep bükil sot procesin qoğam nazarınan alıstatuğa jetkilikti me?

Bwl swraqqa qorğauşı taraptıñ da öz uäji bar. Advokat Anar Qwsaynova qauipsizdik şaraların qoldanu üşin naqtı qauip-qaterdiñ bar ekeni däleldenui qajet ekenin ayttı. Onıñ pikirinşe, zañdağı qauipsizdik şaraları tek sub'ektivti alañdauşılıqqa emes, naqtı negizderge süyenui tiis.

Mäseleniñ tüyini de osında.

Sot biligi qoğamnıñ senimine süyenedi. Al senimniñ bastı kepili – aşıqtıq. Aşıqtıq degenimiz sot zalına körermen kirgizu ğana emes. Aşıqtıq degenimiz qoğamnıñ sot procesin baqılau mümkindigi. Qazaqstandağı köptegen azamattar sot zalında otıra almaydı. Olar sot turalı aqparattı jurnalisterdiñ beynejazbası, audiosı jäne reportajdarı arqılı aladı.

Eger qoğam sud'yanı da, prokurordı da köre almasa, esti almasa, onda sottıñ aşıq ötip jatqanına qalay köz jetkizedi?

Almasbek Sadırbaydıñ isi qoğam nazarın audarğan rezonanstı process. Oğan 1,2 milliard teñge kölemindegi subsidiya qarajatın jımqırdı degen ayıp tağılğan. Ayıptaluşı ayıbın moyındamaydı. Mwnday jağdayda qoğamnıñ qızığuşılığı da, baqılauı da zañdı qwbılıs.

Sottıñ tağdırın sud'ya şeşedi. Biraq sotqa degen senimdi qoğam qalıptastıradı. Al senim aqparattıñ jabıluınan emes, kerisinşe onıñ aşıq boluınan payda boladı.

Sondıqtan bwl jerde mäsele Almasbek Sadırbaydıñ isinde ğana emes. Mäsele erteñ kez kelgen azamat qatısuı mümkin sottardıñ qanşalıqtı aşıq bolatınında.

Aşıq sottıñ eñ ülken däleli – onıñ qoğamnan jasırınatın eşteñesi bolmauı.

Biz aldağı sot otırıstarın bwrınğıday «The Qazaq Times» YouTube arnasında tolıq kölemde körsete almağanımızben, bwl isti nazardan tıs qaldırmaymız. Sot procesinde aytılğan mañızdı jayttar men köterilgen mäselelerdi twraqtı türde osı saytta jariyalap otıratın bolamız. Sud'ya Nwrswltan Qoyşıbaev beyne jäne audio jazba jazuğa şekteu qoyğanımen, qalam men bloknotqa tıyım salmasa kerek... Sondıqtan sot zalında körgenimiz ben estigenimizdi oqırmanğa jetkizuge mümkindik saqtaladı dep ümittenemiz.

Qoğam üşin mañızdı isterdiñ barısı turalı aqparat beru jurnalistıñ ğana emes, aşıq sot qağidatınıñ da atqarıluğa tiisti mindeti.