Qazannıñ 8 küni, Şığıs Qazaqstan oblısı, Öskemen qalasına qarastı Glubokiy audanınıñ ortalığında HH ğasırdıñ alğaşqı jartısında Şığıs Türkistannıñ täuelsizdigi üşin küresip şahit keşken, wlt azattıq köterilisiniñ kösemi Ospan batır Silämwlı (1899-1951) atında meşit aşıldı.

Meşittiñ aşılu saltanatına Astana-Almatı qalalarınan Arıstan Şadatwlı, Jädi Şäken, Serik Äbil bastağan aqın-jazuşılar, öner adamdarı men birge dini qayratkerleri Şığıs Qazaqstan boyınşa bas imamı Ermek Qasbolatwlı, audan imamı, Glubokiy audanı äkimdiginiñ aparat basşısı jäne Ospan batırdıñ nemeresi Örken Näbiwlı bastağan batırdıñ wrpaqtarı, tağı basqada qonaqtar qatıstı.

Saltanattı şarada halqaralıq «Er Jänibek» qoğamdıq qorı men «Twğırıl han – Oñ han» korporativtik qorı bastağan wjımdar meşittiñ salınuına atsalısqan azamattarğı arnayı alğısın bildirdi.

Bwğan deyin Qazaqstan dini basqarmasınıñ törağası bas müfti  Naurızbay qajı Tağanwlı Qazaqstan mwsılmandarı dini basqarmasınıñ 30 jıldıq mereyna oray: «Aytulı mereytoy mwsılman jamağatına ruhani serpilis beru üşin din, el qamında şeyit bolğan bozdaqtarımızdıñ, ağartuşı ğalımdarımızdıñ esimin meşitke beru turalı şeşim qabıldadım». – dep osı rette Qasım han, Qazıbek bi, Äyteke bi, Bwqar jırau, Qajımwqan Mwñaytpaswlı, Abay Qwnanbaywlı, Älihan Bökeyhandarmen birge Ospan batırdıñ atındağı meşittiñ de aşılğanın aytqan  bolatın.

The Qazaq Times