QR SİM jauap berdi. Kollaj: QT,

Ötken aptada portalımız  Qıtay sotı ömir boyı bas bostandığınan ayıruğa ükim etken Ospan batır wrpaqtarına qatıstı mäseleni alğaş bolıp köterdi jäne osı mäsele boyınşa Qazaqstandağı Qıtay elşiligine, QR Sırtqı ister ministrligine aqparattıq saual hat joldağan edik. Qıtay elşiligine joldağan hatımız jauapsız qalğanımen, QR Sırtqı ister ministrligi redakciyağa öz jauabın joldadı.

QR SİM Baspasöz qızmeti joldağan hatta ministrlik QR azamattarı Parasat Nwrlanwlı, Nazıken Bikeyqızı jäne Äşu Ahattıñ tuıstarı Nwrlan Näbiwlı, Nağız Mwhametwlı jäne Tolqın Soğısaywlı qatarlı QHR azamattarınıñ mäselesin öz qwzireti şeginde qarastırıp jatqanın habarlağan.

«Ministrlik atalğan twlğalardıñ tuıstarınıñ Qıtay aumağınan elimizge şığularına rwqsat beru jäne oñ şeşu jöninde Nwr-Swltan qalasındağı Qıtay Halıq Respublikasınıñ Elşiligine tiisti notalar joldadı», – degen Sırtqı ister ministrliginiñ jauap hatında.

Sonday-aq, atalğan hatta: «Qıtay tarapı olardıñ arızdarında körsetilgen twlğalar Qıtay azamattarı bolğandıqtan sol eldiñ qwzıretti organdarı olardıñ mäselesin Qıtaydıñ işki zañnamasına säykes qarastıratının mälimdedi. Bwğan qosa, Ministrlik 1963 jılğı 18 säuirdegi Konsuldıq qatınastar turalı Vena konvenciyasınıñ 55-babınıñ 1-tarmağı boyınşa bir memleket ekinşi memlekettiñ işki isterine qol swğuına qwqığınıñ joq ekenine nazar audaradı», – degen.

Qazaqstan Sırtqı ister ministrligi hat soñında Qazaqstan azamattarınıñ swrauın ädiletti qarastıru maqsatında, äri otbası müşeleriniñ birge twru,  ajırap qalmau turasındağı halıqaralıq jäne Qıtay zañdarındağı qağidalarğa say Qıtay jaqpen jwmıstı jalğastırıp jatqanın jetkizgen.

QR SİM jauap hatı.

Eske sala keteyik, Ospan batırdıñ tikeley jäne atalas ağayındarınıñ wrpaqtarı – Nwrlan Näbiwlı, Nağız Mwhametwlı jäne Tolqın Soğısaywlı qatarlı azamattar ŞWAR Altay aymağı, Köktoğay audanınıñ Qoğam qauipsizdik mekemesi (Policiya) tarabınan 2017 jıldıñ soñı men 2018 jıldıñ naurız aralığında qamauğa alınğan. Olarğa qatıstı alğaşqı sot otırısı tek biıl 10 şildede bolğan.  Al, 24 qırküyek küni audandıq orta sot olarğa «otan twtastığına qauip töndirgen», «äsire wltşıl», «Qazaqstanmen jii baylanıs ornatqan, Qazaqstan täuelsizdik künin qwttıqtağan» degen ayıptarmen ömir boyı bas bostandığınan ayıruğa ükim şığarğan bolatın. Qazaqstandağı tuıstarı olardıñ jazıqsız ekenin aytadı. Aqorda men halıqaralıq adam qwqıqtarın qorğau wyımdarınan araşa swrap baspasöz jinın da ötkizgen bolatın.

“The Qazaq Times”