Auıl şaruaşılığı subsidiyasına qatıstı Qonaev qalasında ötip jatqan şulı sot procesinde tağı da zañ bwzılğanı äşkere boldı. Prokurorlar dayındağan 500 tomdıq qılmıstıq istiñ siqı jäne memleket atınan jäbirlenuşi bolıp otırğan ökilderdiñ sauatsızdığı sot zalındağılardı jağasın wstattı.

Process tiliniñ bwzıluı: Orıstildi qızmetker qazaqşa qwjatqa qalay qol qoyğan?

Sot otırısında belgili bolğanday, Pavlodar oblıstıq Auıl şaruaşılığı basqarmasınıñ ökili Vladimir Pak is boyınşa memleket atınan jäbirlenuşi retinde qatısıp otır. Alayda, qorğauşı tarap onıñ sotqa deyingi tergeu kezinde öz qwqıqtarı tüsindirilgen qaulığa jäne özin jäbirlenuşi retinde tanu turalı mañızdı zañdıq qwjattarğa qazaq tilinde qol qoyğanın anıqtadı.

Sot zalında ayıptaluşı Almasbek Sadırbaydıñ «Memlekettik tildi bilesiz be, bwl qwjattardıñ mänin tüsindiñiz be?» degen swrağına V. Pak:

«Men memlekettik tildi (qazaq tilin) müldem bilmeymin, qazir mağan audarmaşı kerek», – dep jauap berdi.

Qorğauşı tarap bwl jayttı Qılmıstıq is jürgizu kodeksin (QİJK) öreskel bwzu dep atadı. Tildi bilmeytin azamatqa tergeu amaldarı kezinde zañdı türde audarmaşı berilmegen, al şeneunik istiñ män-jayın tüsinbesten, tergeuşiler dayındap qoyğan hattamalarğa soqır türde qol qoya salğan. Zañ boyınşa, is jürgizu tiliniñ bwzıluı bwl tergeu qwjattarınıñ ğana emes, aldağı uaqıtta şığatın kez kelgen sot aktisiniñ küşin joyuğa jetkilikti negiz bolıp tabıladı.

«Bwqa men qoydı şağılıstıru»: Ayıptau aktisindegi absurd

Sottağı eñ soraqı jayt ayıptau aktisiniñ mazmwnınan körindi. Prokuratura käsipkerlerge «Saqtandıru jäne asıl twqımdıq qoy şaruaşılığın damıtuğa bağıttalğan memlekettik subsidiyanı zañsız iemdendi» degen ayıp taqqan. Qwjatta «Satbaev-agro» käsiporınınıñ qoylardıñ analıq basımen selekciyalıq jwmıs jürgizgeni jazılğan.

Biraq sotta jauap alu barısında jäbirlenuşi Paktıñ özi bwl aqparattı joqqa şığardı.

«Meniñ biluimşe, ol jerde ötinim tek iri qara malğa, yağni bwqalarğa qatıstı bolğan. Qoylarğa qatıstı eşteñe joq», — dedi basqarma ökili.

Ayıptaluşı Almasbek pen onıñ advokatı bwl ayıptaudıñ eşqanday logikağa sıymaytının, tergeu organdarınıñ respublikalıq deñgeydegi «wyımdasqan qılmıstıq top» (WQT) jasau üşin isti qoldan qwrastırğanın mälimdedi.

Advokat Qwsayınova öz sözinde bılay dedi:

«Ayıptau aktisine qarasaq, Pavlodar oblısında bwqalar men qoylardı şağılıstırğan sekildi külkili jağday tuındaydı. Mwnday ötinimder müldem bolğan emes. Käsipkerler bwqa satıp alğan, onıñ aqşası tölengen, saraptama onı rastap otır. Bwl bwqalar sot barısında qoyğa aynalıp ketpeydi. Bwl – taza zañsızdıq!»

Ayıptaluşı A. Sadırbay bwl qateliktiñ kesirinen 12 jılğa deyin bas bostandığınan ayırılu qaupimen, 2024 jıldıñ qaraşasınan beri tergeu izolyatorında (SIZO) qamauda otır.

500 tomdı 2 sağatta «oqıp şıqqan» jäbirlenuşi

Advokattar issapar qwjattarın kötere otırıp, Pavlodar oblısı Auıl şaruaşılığı basqarması ökilderiniñ Qonaev qalasındağı arnayı prokuratura ğimaratında nebäri 2-3 sağat qana bolğanın däleldep berdi.

Jäbirlenuşi ökili V. Pak basında is materialdarımen tolıq tanıstım degenimen, advokattardıñ qıspağına şıdamay:

«Joq, men 500 tomdı tügel oqığan joqpın. Tek bizge qatıstı jerin prokurordıñ özi körsetip, tüsindirip berdi», – dep moyındadı.

Bwl jayt memleket atınan ayıp tağıp, adamdardı türmege otırğızğısı kelip otırğandardıñ istiñ män-jayın özderi de tolıq bilmeytinin körsetedi. Olar tek prokurorlardıñ aytqanımen jürip, dayın qwjattarğa qol qoyuşı «instrumentke» aynalğan.

Audarmaşılar tapşılığı jäne adam qwqığınıñ ayaqqa basıluı

Sot procesiniñ aylar boyı sozılıp, ayıptaluşınıñ türmede otıruına tağı bir sebep — sottağı sauattı audarmaşılardıñ joqtığı. Qorğauşı tarap är apta sayın käsibi emes audarmaşılardıñ kesirinen sottıñ keyinge qalatının, bwl uaqıt işinde sottaluşılardıñ adam tözgisiz jağdayda qamauda otırğanın jetkizdi.

Ayıptaluşı men advokatı sotqa resmi türde talap qoydı: eger sot sauattı audarmaşı tauıp, procesti zañ şeñberinde jürgize almasa, onda ayıptaluşını üy qamağına nemese kepilmen bosatu kerek. Jeke azamattardıñ tağdırı memlekettik organdardıñ nemqwraylılığı men sauatsızdığınıñ qwrbanı bolmauı tiis.

«The Qazaq Times» bwl şulı sot procesin wdayı baqılap, oqırmanğa aldağı uaqıtta da eksklyuzivti materialdar men ötkir taqırıptardı wsınudı jalğastıradı.

The Qazaq Times