Almatıda belgili jurnalist, sayasi twtqın Duman Mwhammedkärimniñ aynalasındağı soñğı jağdaylarğa baylanıstı kezekti baspasöz mäslihatı ötti. Jiınğa qamaudağı jurnalistiñ äkesi Almas Tilepov, advokat Ğalım Nwrpeyisov, qoğam qayratkeri Rısbek Särsenbaywlı jäne qwqıq qorğauşılar qatıstı.
Baspasöz jiının aşqan Rısbek Särsenbaywlı Qızılorda qalasındağı №60 tüzeu mekemesinde jazasın ötep jatqan Duman Mwhammedkärimniñ densaulığı kün sanap naşarlap, oğan jasalıp jatqan psihologiyalıq jäne fizikalıq qısımnıñ şekten şıqqanın mälimdedi.
«Wlımnıñ ömirin saqtap qaludı talap etemin»
Baspasöz mäslihatında söz alğan Dumannıñ äkesi Almas Tilepov wlınıñ ömirine tikeley qauip tönip twrğanın aytıp, zañdı organdardan şwğıl araşa tüsudi swradı.
«Men wlımnıñ tiri qalğanın qalaymın! Onıñ qauipsizdigi qamtamasız etilsin. Onı osınday jağdayğa jetkizgen barlıq män-jay anıqtalıp, künäli adamdar bolsa, zañ aldında jauap bersin. Men erteñ wlımnıñ qaytıs bolğanı turalı habar estigim kelmeydi. Wlımnıñ ömirin saqtap qaludı, onı qorğaudı jäne şındıqtıñ anıqtaluın talap etemin», — dedi A.Tilepov.
Dumannıñ äkesiniñ aytuınşa, ol 600 künnen astam uaqıt boyı jalğız adamdıq tärtiptik oqşaulau ornında (DIZO) zañsız wstalıp keledi. Öziniñ arız-şağımdarınıñ sırtqa şıqpauına jäne zañsızdıqtarğa qarsılıq retinde jurnalist tamız ayınıñ ayağınan beri aştıq jariyalap, keyin işki organdarına ziyan keltiretin bögde zattardı (bwranda, magnit, däriler) jwtuğa mäjbür bolğan.
Sonımen qatar, mekemedegi qısımnıñ saldarınan Dumannıñ öz-özine qol jwmsau äreketterine deyin barğanı habarlandı. Äkesi wlınıñ osınday tığırıqqa tireluine türme äkimşiliginiñ, sonıñ işinde mekeme basşısınıñ mindetin atqaruşı Erik Mahanovtıñ zañsız äreketteri men qoqan-loqqıları sebep bolğanın alğa tarttı.
Resmi arız: Erlan Karin, Aida Balaeva jäne Bas prokuraturağa ündeu
Jurnalistiñ otbası men qorğauşıları bwl mäsele boyınşa tek Bas prokuraturağa ğana emes, Memlekettik keñesşi Erlan Karinge, Qauipsizdik keñesi törağasınıñ orınbasarı Aida Balaevağa jäne Wlttıq qauipsizdik komitetine şwğıl arız-şağım joldağanın jetkizdi.
Arızda tömendegidey naqtı talaptar qoyılğan:
  1. Täuelsiz komissiya qwru: Qızılordadağı №60 mekemege WQK, İİM, Prokuratura jäne täuelsiz qwqıq qorğau wyımdarı ökilderinen qwralğan arnayı komissiya jiberip, şwğıl tekseru jürgizu;
  2. Medicinalıq kömek: Dumandı mekemeden tıs täuelsiz mamandandırılğan auruhanağa jetkizip, işki organdarına tolıq medicinalıq saraptama jasau;
  3. Qılmıstıq is qozğau: Oqiğanı Qılmıstıq kodekstiñ 105-babı (Özin-özi ölimge jetkizu) jäne 146-babı (Azaptau) boyınşa tekserip, künäli twlğalardı jauapqa tartu;
  4. Qauipsiz orınğa auıstıru: Jurnalistke töngen qauipti eskere otırıp, onı Almatı qalasındağı mekemege nemese qauipsiz orınğa auıstıru.
Advokattar men qoğam ökilderiniñ wstanımı
Advokat Ğalım Nwrpeyisov öz sözinde penitenciarlıq jüyede otırğan azamattıñ ömiri men densaulığına memleket tikeley jauaptı ekenin atap ötti:
«Adamnıñ türmede otıruı onıñ fundamentaldı adamdıq qwqıqtarı men ömir süru qwqığınan ayırmaydı. Nezavisimo ot togo, soglasen li Duman s prigovorom, gosudarstvo obyazano obespeçit' ego bezopasnost'. Mı trebuem prinyat' bezotlagatel'nıe merı po sohraneniyu ego jizni», — dedi advokat.
Sonımen qatar, baspasöz mäslihatında Tarazdan arnayı Qızılordağa barıp, Dumanmen jüzdesip qaytqan belgili advokat, aqsaqal Abdulla Baqbergenwlınıñ beynejoldauı körsetildi. Ol mekemedegi tek Dumanğa emes, özge de qamaudağı azamattarğa (Berdimwratov, Amangeldi Isahanov, Serikbay Naraşbaev, t.b.) jasalıp jatqan qısımdar bar ekenin rastadı.
Jiın soñında qatısuşılar bilik ökilderin türmedegi zañsızdıqtardı toqtatuğa, sayasi közqarası üşin wstalğan azamattardıñ isin qayta qarauğa jäne eldegi azamattıq dialogtı ornatuğa şaqırdı.