«Qazaqşa söyle!»: Kur'er twtınuşığa dörekilik tanıtpağanın ayttı. Magnum’nıñ boykot bastamasınan keyingi mälimdemesi

Birer künnen beri äleumettik jelilerde Almatı qalasında Magnum kur'eri twtınuşınıñ şağım-pikirinen keyin jwmıstan quılğanı qızu talqılanıp jatır. QT taraptardıñ pikirin parıqtap kördi.

Bwl oqiğa qostildi qazaq qoğamın wstanım twrğısınan jarmaq taraptarğa toptadı. Sarapşılar men til janaşırlarınıñ tereñ taldama-payımı til mäselesiniñ özektiligin aşa tüsip, eldik-birlik jağınan alañdattı.

Twtınuşı şağımı

Älqissa, qaznet tarmaqtarında tarağan aqparattarğa qarağanda, alğaş Asılhan Älimhanwlı esimdi jeli qoldanuşı Threads paraqşasında kur'erdiñ mämilesin sınap jazba jariyalağan. Ol Magnum sauda jelisinen alğızğan tapsırısın qabıldarda kur'erdiñ «Qazaqşa söyle!» degenin dörekilik dep jazadı.  

Keyinnen twtınuşı özine tapsırıstardı jetkizuge jauaptı Magnum E-Commerce Kazakhstan JŞS direktorı şığıp, kur'erdi jwmıstan birjola şığarılğanın habarlağanı turalı fotoskrinin bölisti.

Derekköz: Threads jelisi

Erkinniñ şındığı

QT jağdaydıñ män-jayın tolıq bilmek nietpen taraptarğa habarlasıp kördi. Kur'er bolıp istegen Erkin tilşi swrağına: 

– Bwl säuirdiñ basında Almatı qalasında boldı. Tapsırıs beruşini rastau üşin atı-jönin swradım orısşa jauap berdi. Qazaqşa söyley berseñizşi dedim bar bolğanı, – dedi.

Ol twtınuşığa dörekilik körsetpegenin, sıpayı bolğanın jetkizdi.

– Dörekilik tanıtqam joq. Tanımaytın kisige qalay döreki bolam. Qazaqşa söyley berseñizşi dedim boldı bir-aq auız sözben, – dedi ol.

Bir jarım jıl kur'er bolıp istegen Erkin jwmıstan bosağanın oqiğanıñ erteñinde estigen. Kompaniyanıñ köligin aydap jan baqqan, otbasılı. 38 jastağı Taldıqorğannıñ tumasınıñ sözinşe, juırda jwbayı bosanadı.

«Jürgen jerimde qazaqşa söyleuge ügittep jüremin. Eşteñege tañğalmaytın bolıp kettik qoy. Köşede orısşa söylep, oynap jürgen qazaq balalarına da aytam keyde» deydi ol eldegi til mäselesine beyjay qaray almaytının bildirip.

Boykottan keyin ün qatqan Magnum 

Oqiğadan birneşe kün ötse de ne saytında, ne äleumettik jelilerde resmi tüsinikteme bermegen kompaniyağa qoğam qısımı arttı. 

4 säuir talqı küş alıp, senbi küni boykot bastaması beleñ ala bastadı. Säuirdiñ 5-i QT tilşisi Magnum Cash & Carry resmi ökilderine, PR qızmetine habarlasuğa tırısqanımen, jauap ala almadı. Magnum baspasöz hatşısı Natal'ya Kunina ne qoñırauğa, ne jelidegi swraqtarğa lämmim demedi.

Kompaniyanıñ Call ortalığına qoñırau soqqanda operator qolına basşılıq bergen mätindi oqıp berdi. Resmi jauap ornına wsınğan bwl aqparattıñ qazaqşa nwsqasında qate köp. Kal'ka audarmadan tuğanı bayqaladı, sauattı redaktordıñ aldınan ötpegeni anıq bilinedi. 

«Biz öz jwmısımızda Qazaqstan Respublikasınıñ zañnamasın basşılıqqa alamız.

Memleketimizdiñ Konstituciyasına säykes: «Memlekettik wyımdarda, jergilikti özin-özi basqaru organdarında, jäne wyımdarda orıs tili resmi türde qazaq tilimen teñ qoldanıladı».

Biz adamdardı wltına qaray bölmeymiz jäne barlıq satıp aluşılarımızğa birdey qamqorlıq jasaymız. Biz jwmısımız barısında satıp aluşılardı tärbielemeuimiz jäne olarğa mädeni nemese basqa da dünietanımdıq talaptar qoymauımız kerek.

Sondıqtan biz qızmetkerimizdi söylesu tili üşin emes, satıp aluşımen qarım-qatınas jasau mäneri, jwmıs ornındağı lauazımdı asıra siltep paydalanğanı üşin jwmıstan bosattıq», – dep oqıdı eki operator da birdey mätindi ejektep. 

Alayda Magnum Cash & Carry jariya resurstarınıñ eşbirinde köpşilik nazarına jazbaşa nemese video-audio reakciya bildirmedi.

Boykot bastaması jelide jappay qoldau tapqan soñ 5 säuirdiñ tüninde sağat 22:00-de Magnum akkaunttarına resmi mälimet tarattı.

«Qwrmetti ağayın! 

Äleumettik jelide Magnum kompaniyası kur'erdi til mäselesi üşin jwmıstan şığardı degen aqparat tarauda. Alayda bwl şındıqqa janaspaydı. Jağdaydıñ män-jayı müldem basqaşa. 

Kur'erdiñ jwmıstan bosatılu sebebi — klienttermen bir emes, eki emes, birneşe dürkin döreki söylesip, qızmet körsetu ädebin qaytalap bwzuı.

Biz oğan öz qateligin tüzetuge jetkilikti uaqıt mümkindik berdik — eskertu jasadıq, sınaq merzimine auıstırdıq. 

Alayda, ökinişke qaray, sol uaqıt işinde de ädebi özgermey, tağı da twtınuşımen arazdasıp qaldı. Keleñsiz oqiğalar qaytalandı. 

Artınan şağım tüsip jattı. Sodan keyin, amal joq, eñbek şartın bwzuğa tura keldi. 

Biz üşin qızmet körsetu mädenieti öte mañızdı. Sıpayılıq pen adamğa qwrmet birinşi orında.

Kur'erdiñ jwmıstan ketuine til emes, minez-qwlqı sebep boldı – mwnı naqtı aytıp ötkimiz keledi. 

Biz ana tilimizge, yağni memlekettik tilge ülken qwrmetpen qaraymız.

Bwl jağday memlekettik tilge qatıstı bolıp qabıldanğanına ökiniş bildiremiz.

Qwrmetpen, Talgat.

Magnum komandası».

Magnum’nıñ jelide kommentariy jazu mümkindigin şektegen jazbası. Foto-skrin: Instagram

Magnum E-Commerce Kazakhstan JŞS kur'erin til mäselesine emes, qızmet ädebine qatıstı bosatqanın mälimdedi. Kur'erge bwrın da birneşe märte eskertu berilgenine eş ayğaq wsınbağan. Twtınuşı-kur'er arasında boldı degen dörekilik jağdayına dälel jariyalanbadı. Jeli jwrtınıñ basım böligi kur'erdiñ «Qazaqşa söyle!» degen eskertpesi döreki aytılğannıñ özinde birden jwmıstan quıp, qatañ şara qoldanılğanına narazı. Tört jıl aldın tirkelgen kompaniyada qazir jüzdegen kur'er bar. Statsnet dereginşe, bıltırğı qarjılay tüsimi 155 mlrd teñgeden asqan.  

Kur'erdi bosatudı mäseleniñ şeşimi körgen Magnum E-Commerce Kazakhstan JŞS-nıñ eki qwrıltayşısı bar. Olar – Magnum Cash&Carry jäne Kaspi Magazin kompaniyaları. 

Bwğan deyin 200 filialı bar Magnum tübirtekterin tek 15 jıldan keyin belsendi twtınuşılar men til janaşırlarınıñ talap-arızınan keyin qazaqşalağan. 

Qazaqstan qoğamında Memlekettik til turalı zañ qabıldau talabı küşeyip keledi. Biraq orıstildi şeneunikteri köp qazaq biligi til taqırıbına asa saq, qazaq tiliniñ zañnama şeñberinde qoldanuına sılbır. Keybir sarapşılar qazaq tiliniñ zañdı quatın nığaytuğa biliktiñ sayasi jigeri älsiz ekenin sınaydı. 

The Qazaq Times