Qazaqstannıñ azamattıq qoğamın jii tolğandıratın mäsele «sayasi twtqındardı» bosatu taqırıbı. El arasında «bilik qısımınıñ» simvolına aynalğan dissident-aqın Aron Atabekti bosatu jöninde qol jinau ayaqtalğanı, bwl qwjat Aqordağa «Estitin memleket» qwrudı közdeytin prezident Toqaevqa joldanğanı habarlandı.

Belgili qwqıq qorğauşı Baqıtjan Töreğojinanıñ Facebook jelisine jariyalağan jazbasına qarağanda, Aron Atabekke raqımşılıq jasau turalı hatqa bes kün işinde 2,5 mıñ adam qol qoyğan. Ol atalğan hattı 20 qırküyekte prezident Qasım-Jomart Toqaevqa joldağanın mälimdedi.

Osıdan 15 jıl bwrınğı atışulı Şañıraq oqiğasınan keyin 18 jılğa sottalğan dissident-aqın Aron Atabekke raqımşılıq jasau turalı hatqa qoğam arasında qol jinau nauqanı ötken aptada bastalğan. Oğan deyin biıl qıstan beri belsendini bosatu turalı jazuşılar-ädebietşiler bastama kötergen.

Bwğan deyin, Qazaqstanda Wlttıq aldın alu tetigi (WAAT) qatısuşıları türmede Aron Atabekpen jolığıp, haliniñ naşar ekenin aytqan edi.

«Aldaspan şayır, adam haqınıñ qaysar küresker arı» retinde ardaqtalatın Atabek 2006 jılğı «Şañıraq» oqiğasınan 18 jılğa sottalğan. Bilik onı sol oqiğa kezinde qaza tapqan policeydiñ ölimine kinäli dep tapqan. Qwqıq qorğauşılar ükimniñ negizsiz ekenin aytıp, onı «sayasi twtqın» dep tanığan.

Qwqıq qorğauşı sarapşılar keñesiniñ esebinşe, bosap şıqqandardı eseptemegende qazir elde 23 sayasi twtqın abaqtıda jazıqsız jazalanıp jatır. Halıqaralıq wyımdar Aqorda men «Estitin Ükimetti» azamattardıñ haqın qwrmettep, adam qwqığın qorğap-saqtauğa jii şaqıradı, tipti ekpindi eskertu de jasaydı. Degenmen elde sayasi-azamattıq közqarası berik jandar türli sebeppen köp jauapqa tartıladı.

The Qazaq Times