قازاقستاننىڭ ازاماتتىق قوعامىن ءجيى تولعاندىراتىن ماسەلە «ساياسي تۇتقىنداردى» بوساتۋ تاقىرىبى. ەل اراسىندا «بيلىك قىسىمىنىڭ» سيمۆولىنا اينالعان ديسسيدەنت-اقىن ارون اتابەكتى بوساتۋ جونىندە قول جيناۋ اياقتالعانى، بۇل قۇجات اقورداعا «ەستيتىن مەملەكەت» قۇرۋدى كوزدەيتىن پرەزيدەنت توقاەۆقا جولدانعانى حابارلاندى.

بەلگىلى قۇقىق قورعاۋشى باقىتجان تورەعوجينانىڭ Facebook جەلىسىنە جاريالاعان جازباسىنا قاراعاندا، ارون اتابەككە راقىمشىلىق جاساۋ تۋرالى حاتقا بەس كۇن ىشىندە 2,5 مىڭ ادام قول قويعان. ول اتالعان حاتتى 20 قىركۇيەكتە پرەزيدەنت قاسىم-جومارت توقاەۆقا جولداعانىن مالىمدەدى.

وسىدان 15 جىل بۇرىنعى اتىشۋلى شاڭىراق وقيعاسىنان كەيىن 18 جىلعا سوتتالعان ديسسيدەنت-اقىن ارون اتابەككە راقىمشىلىق جاساۋ تۋرالى حاتقا قوعام اراسىندا قول جيناۋ ناۋقانى وتكەن اپتادا باستالعان. وعان دەيىن بيىل قىستان بەرى بەلسەندىنى بوساتۋ تۋرالى جازۋشىلار-ادەبيەتشىلەر باستاما كوتەرگەن.

بۇعان دەيىن، قازاقستاندا ۇلتتىق الدىن الۋ تەتىگى (ۇاات) قاتىسۋشىلارى تۇرمەدە ارون اتابەكپەن جولىعىپ، ءحالىنىڭ ناشار ەكەنىن ايتقان ەدى.

«الداسپان شايىر، ادام حاقىنىڭ قايسار كۇرەسكەر ارى» رەتىندە ارداقتالاتىن اتابەك 2006 جىلعى «شاڭىراق» وقيعاسىنان 18 جىلعا سوتتالعان. بيلىك ونى سول وقيعا كەزىندە قازا تاپقان پوليتسەيدىڭ ولىمىنە كىنالى دەپ تاپقان. قۇقىق قورعاۋشىلار ۇكىمنىڭ نەگىزسىز ەكەنىن ايتىپ، ونى «ساياسي تۇتقىن» دەپ تانىعان.

قۇقىق قورعاۋشى ساراپشىلار كەڭەسىنىڭ ەسەبىنشە, بوساپ شىققانداردى ەسەپتەمەگەندە قازىر ەلدە 23 ساياسي تۇتقىن اباقتىدا جازىقسىز جازالانىپ جاتىر. حالىقارالىق ۇيىمدار اقوردا مەن «ەستيتىن ۇكىمەتتى» ازاماتتاردىڭ حاقىن قۇرمەتتەپ، ادام قۇقىعىن قورعاپ-ساقتاۋعا ءجيى شاقىرادى، ءتىپتى ەكپىندى ەسكەرتۋ دە جاسايدى. دەگەنمەن ەلدە ساياسي-ازاماتتىق كوزقاراسى بەرىك جاندار ءتۇرلى سەبەپپەن كوپ جاۋاپقا تارتىلادى.

The Qazaq Times