Täuelsiz jurnalistiñ 4 talabı: On künnen asa aştıqta otırğan Duman Mwhamedkärimniñ densaulığı naşarladı

Jetisu oblısınıñ ortalığı Taldıqorğandağı mekemede qamauda otırğan Almatı oblısınıñ twrğını, täuelsiz jurnalist Duman Mwhammedkärim tergeu organına 4 şart qoyıp, aştıq jariyalağalı on künnen astı. Sınşıl jurnalistiñ densaulığı naşarlağanı habarlandı. 

Bügin täuelsiz jurnalist aştıq jariyalağanına on birinşi kün. Qart äkesi Almas Tilepov pen advokatı Ğalım Nwrpeyisovtiñ QT tilşisine habarlauınşa, jurnalist aştıqtı toqtatu üşin bilikke tört talap qoyğan.

Atap aytqanda:

• Äkesin qoğamdıq qorğauşı retinde tanudı;
• Biliksiz tergeuşini auıstırudı;
• Tergeu ayaqtalğanşa densaulıq jağdayına baylanıstı üyqamaqqa Almatığa auıstırudı;
• Qwqıq qorğau wyımdarınıñ jetekşileri Baqıtjan Töreğojina men Evgeniy Jovtispen kezdestirudi swrağan.

Äzirge tört şarttıñ ekeui orındalu barısında ekeni aytıladı. Äkesine qoğamdıq qorğauşı märtebesi berilip, köñili tolmağan tergeuşi özgerip jatır.

14 şildede därigerlerdiñ medicinalıq tekserisiniñ qorıtındısı boyınşa, jurnalistiñ qanı qattı qoyulanğan, kez-kelgen uaqıtta jüregi toqtap qaluı äbden mümkin, eki büyregi qabınğan, keude twsındağı omırtqasınıñ şemirşegi ösip ketken.

Duman Mwhammedkärimniñ densaulıq jağdayı turalı 14 şilde jasalğan medicinalıq qwjat. Foto: äkesi Almas Tilepovten

Jurnalistiñ qorğau tarabınıñ sözinşe, 45 jastağı Duman Mwhammedkärimge Almatı auruhanasında emdelu qajet.

Aptap ıstıqta audan men Taldıqorğan arasında jolda jürip, qajığan qart ata-anasınıñ da densaulığı naşarlağan. Almas Tilepov wlınıñ ömirine alañdaulı. Onıñ sözine qarağanda, qamaudağı sırqat perzentiniñ eki közi şüñireyip ketken, äzer jürip-twradı, söyleuge şaması joq, jağdayı naşar.

Ol keyingi bir jılda tört ret «miting ötkizu tärtibin bwzdı» degen ayıppen jiını 90 täulik qamauda otırdı. Bwdan soñ osı jazda bilik qılmıstıq is aşqan. Toqaev pen onıñ biligin aşıq äri ötkir sınaytın oğan policiya Mwhtar Äblyazovtan jurnalist retinde swqbat alğanın sebep etedi. Jaz bastalğalı Qılmıstıq kodekstiñ eki birdey ekstremistik babımen («tıyım salınğan wyımnıñ isine aralasu» / 405-bap jäne «ekstremizmdi qarjılandıru» / 258-bap – QT ) auır ayıp tağılıp, tergeu sotınıñ sankciyasımen tağı 2 ay qamauğa alındı.

Duman Mwhammedkärim özine tağılğan ayıppen kelispeydi, mwnı qudalau dep esepteydi. Qarsılıq retinde Toqaevqa jäne İle audandıq policiya böliminiñ basşısı Bolat Totıbaevqa «Demokratiya üşin men bas bostandığımdı baylauğa dayınmın» dep hat jazğan.

Taldıqorğan qalasında ornalasqan №71 mekeme. 6 aqpan 2022 jıl. Foto: QT

Twrğılıqtı jeri İle audanınan şalğay Taldıqorğan qalasındağı №71 mekemege qamağan. Zeynet jasındağı qart ata-anası apta sayın jüzdegen şaqırım jol jürip, as-auqat tasıp jür. Qwzırlı organdar tergeu jürgizip jatqanın aytadı. Al qwqıq qorğauşılar keñesi «sayasi twtqın» retinde tanığan. Azamattıq qoğam müşeleri Duman Mwhammedkärimdi qorğau komitetin qwrğan.

Osığan deyin aqparat ministri Darhan Qıdıräli jurnalistiñ qamalıp, auır ayıptarmen isti boluın «jurnalistik qızmetimen emes, sayasi közqarası üşin» degen. Qañtardan keyin Toqaevtıñ biligi nığayıp, «Jaña Qazaqstan» sayasi bağdarı jariyalağalı beri elde jurnalisterge jasalatın şabuıl men qısım-kedergi jiilegen.

The Qazaq Times