Auruhana dälizi. Körneki suret. Jambıl oblısı, Taraz qalalıq ortalıq auruhanası. 31 tamız 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 3,1 mıñ artıp, jalpı esebi 915 mıñnan astı. 

Törtinşi tolqın ekpindey bastağan şilde ayınıñ ortasına qaray täuliktik sırqattar sanı 5 mıñnıñ, tamızğa qaray 7 mıñnıñ üstine şıqqan, indet qarqını eki aptadan beri 5 mıñnan 3 mıñ keyske mañayladı. Keşe 8 şildeden beri alğaş märte 3,1 mıñnan kem jağday anıqtaldı. Densaulıq saqtau ministrliginiñ resmi mälimetinşe, elde 12 qırküyekte koronavirus (KVI+) jwqqan 3088 adam, al 11-i küni  koronavirus pnevmoniyasına (KVI-) şaldıqqan 54 adam tirkeldi jäne senbide 70 qazaqstandıq aurudan qaytıs boldı. Qazir elde 78 mıñ adam (KVI+ boyınşa 70 mıñ, KVI- boyınşa 8 mıñday) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 23%-ı ädettegidey joğarı dinamikada twrğan bir ğana Almatı (719) qalasına tiesili. Al Qarağandı (379), astana (325), Almatı (218),  Pavlodar (204), Aqmola (194), Qostanay (159), ŞQO (158), Aqtöbe (140), Mañğıstau (123), Şımkent (95), Atırau (86), BQO (69), Qızılorda (51), Jambıl (58), SQO (73), Türkistan (37) öñirlerinde dert qarqını twraqtı, keybirinde sırqattar qatarı şamalı azayğanı bayqaladı. Jeksenbide aurudan ayıqqan 3959 adam üyine şığarılğan. 11 qırküyekte jiını 57 adam qaytıs bolğan.

#COVID_pnevmoniyası mehanikalıq ädispen esepke alınatındıqtan, demalıs künderi medstatistika jüyesi tolıq qamtılmaydı. Saldarınan keyster qatarı senbi jäne jeksenbi, mereke künderi ädettegiden aytarlıqtay az tirkeledi. Qırküyektiñ 11-i aqparatı bir täulikke keşigip beriletin koronavirus pnevmoniyasına şaldıqqan 54 nauqas esepke alındı. Vedomstvo dereginşe, bwl küni sırqattar Almatı oblısı (12), Aqtöbe (6), Almatı qalası (6), ŞQO (5), Türkistan (5), Şımkentte (5) köptep anıqtalğan. Sonımen qosa, 13 adam ayığıp şıqqan, tağı 18 adam köz jwmğan.

#Jalpı  DenMin deregine qarağanda, emdelip jatqan 78 mıñ nauqastıñ 16 mıñı auruhanada, 62 mıñı ambulatorlıq baqılauda. 1276 nauqastıñ jağdayı naşar, ondağı 340 adamnıñ häli öte auır. Bwdan özge 196 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan oblısınan basqa ŞQO, SQO, BQO, Jambıl, Qızılorda öñirleri «sarı aymaqqa» ötken. Basqa 11 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Üş ayda bas-ayağı 420 mıñ adam auırsa, 6,6 mıñnan asa adam köz jwmdı. Küz tüskeli 12 künde 51 mıñnan asa nauqas esepke alınğan.

Bıltır 13 naurızdan beri COVID-19 infekciyasın jwqtırğandar qatarı 842 mıñnan, 1 tamızdan bılayğı koronavirus pnevmoniyası 72 mıñnan asqan. DDSW derekqorı men Wlttıq statistikada Qazaqstanda auırğandar sanı 915 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 17,6 mıñnan asa adam (KVI+ / U07.1 – 10 354, KVI- / U07.2 – 4677, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 36-orınğa ornıqtı.

Ükimettiñ soñğı deregine qarağanda, Qazaqstanda 5,9 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 7 mln-nan asadı.

The Qazaq Times