Qıtaydıñ iri qarjı ortalığı Fudoñ rayonı. Foto: Hutong School

Qıtaydıñ eñ iri qalası äri qarjı ortalığı sanalatın Şanhay qatañ karantindik şekteuge jabılğanına eki aptadan astı. Keybir sarapşılar Şanhaydağı koronavirusqa baylanıstı qatañ şekteulerdiñ sayasi sebepteri de bar dep sanaydı. YAğni, Beyjiñniñ küştik qwrılım ökilderi men men Şanhaydıñ jergilikti şeneunikteri arasında qarama-qayşılıqtar men qaqtığıstar bolıp jatqan boluı mümkin. Sarapşılar bwl jağday Şanhaydağı indettiñ aldın alu şayqasın jergilikti jäne ortalıq ükimet arasındağı sayasi küreske aynaldırıp jatır degen pikirler de aytadı.

Resmi statistika boyınşa Şanhaydağı indet jağdayı

Qazir Şanhay qalasın üş aymaqqa böle otırıp indetti tejeu şaraları jürgigizip jatır. Şığıs audandarda «jabıq baqılau aymağı» rejimi engizilse, Fu Şi sekildi batıs audandar «baqılau aymağı» rejiminde, özge audandar men oğan jaqın aymaqtar «aldın alu aymağı» rejiminde. Qıtaydıñ resmi mälimetinde 7 säuir men 9 säuir arasında Şanhay qalasında virus jwqtırğandar sanı qatarınan 3 kün boyı 20 mıñnan asqanı aytılğan. 9 säuirdegi körsetkiş boyınşa 24 mıñ 943 şanhaylıqtan virus anıqtalğan. Resmi statistika boyınşa 1 naurızdan beri qaray Şanhayda tirkelgen nauqastar sanı 180 mıñ adamğa jetti. Onda qazir 50 mıñ orındı jedel emhana qwrılu üstinde.

Qıtaydıñ virusqa qarsı küresudegi sayasatı sınğa qaldı

Koronavirus pandemiyasınıñ älemge jayılğan alğaşqı jäne ekinşi tolqını, tipti üşinşi tolqını kezinde älemdegi köptegen elderde indet jwqtırğandar sanı neşe jüzmıñdap sanalıp jattı. Qazaq bolğandar sanı da on mıñdap, jüz mıñdap sanaldı. Bwl kezeñderde Qıtay virustıñ «nöldik körsetkiş» sayasatın wstanıp, özin indetti önimdi tejey alğan el retinde nasihattağan bolatın. Biraq, qazirgi Qıtaydağı indet jağdayına qaray otırıp, jağdaydıñ mülde kerisine aynalıp bara jatqanın bayqauğa boladı. Qazir älem elderinde koronaviruspen birge ömir sürudiñ epidemiyağa qarsı mentaliteti qalıptasıp ülgirgendey boldı. Köptegen elde vakcinaciya, revakcinaciyadan ötken azamattar sanı köbeydi nemese twrğındardıñ virusqa qarsı immundıq qarsılıq quatı küşeyip, betperdelik rejim alınıp tastalıp jatır. Däl osı twtsa Qıtay koronavirustıñ jaña tolqınına tap boluda.

Qazir Qıtaydıñ eñ iri qalasındağı 26 millionnan astam adam üylerinen şığa almay otır. Qatañ karantindik şarttarda keybir wdayı medicinalıq järdemge mwqtaj nemese sozılmalı sırqatı bar twrğındar üşin ülken qiındıqtar jaraldı. Onıñ üstine virusqa qarsı kürestegi keybir äsire şekteuler men qatañ şarttar Şanhay twrğındarınıñ tözimin tauısıp, şekteu şarasınan kelip şıqqan ziyannıñ özi Omicron virusı keltirgen ziyannan da asıp tüsti.

«Qarañğıdağı qarsılıq»

Bwnday jağday el azamattarın ğana emes, şeteldik aqparat qwraldarınıñ da Şanhaydağı indetke qarsı küres şaralarınan sayasi astar izdeuge itermeledi. Şanhaydağı indet jağdayında «Nöldik körsetkiş» sayasatı turalı bağalağan N'yu-Yorkte twratın täuelsiz sarapşı YU Pin bılay depti: « “Nöldik körsetkiş” sayasatınıñ eñ bastı mäselesi – onıñ epidemiologiyalıq twrğıdan emes, sayasi twrğıda qarastırıluında. Onıñ (Qıtay basşısı Şi Jinpiñdi meñzeydi, QT) sayasi kapital retinde bwrınğı indettiñ aldın aluınıñ negizgi qağidası retinde qarastırıluı», – deydi. VOA agenttigine bergen jauabında.

Rasında Qıtay basşısı koronavirus indetine qarsı qatañ sayasi wstanımdı taldadı. El şekarasın tolıq jauıp, «nöldik körsetkiş» sayasatı boyınşa indettiñ taraluın küşpen tejedi. Bwl özge elderdegi indet jağdayımen salıstırğanda kädimgidey joğarı sayasi wpay berdi. Biraq, eki jıl boyı jürgizgen osı sayasi täsilderinen keyin de elde jüz mıñdap nauqastardıñ tirkelui el halqınıñ indetke qarsı kürestegi bilik wstanımına degen senimin küyretkendey boldı.

Keybir şeteldik basılımdar, aytalıq The New York Times, VOA qatarlı amerikalıq iri aqparat qwraldarı indetke qarsı küres boyınşa Beyjiñ men Şanhaydağı bilik klandarı arasında «astırtın tartıstar» jürip jatqanın aytadı. Bwl qayşılıq, şın mänisinde, indetti jeñu boyınşa qoldanatın sayasatta ğana emes, Şanhay men Beyjiñ arasındağı sayasi, mentalitettik tartıs desek te artıq emes. Sırtqı baqılauşılardıñ pikirinşe, Beyjiñ biligi Şanhaydıñ özi wsınğan «Naqtı aldın alu jäne baqılau» şarasın maqwldamay, Şanhaydağı epidemiyalıq jağdaydı bağalauda küşpen aralasıp otırğan boluı mümkin. Tipti, agressiyalıq mümkindigin de paydalanıp qalanı küşpen karantinde wstauı da mümkin degen közqarastar aytıladı.

The Qazaq Times