Äkimdik mälimeti resmi derekke qayşı: Şımkent naurızğa qanşa qarjı böldi?

Şımkentte Naurız merekesine oray wyımdastırılğan is-şaralarğa jergilikti byudjetten qanşa qarjı bölingeni 19 naurızdan beri qoğamda qızu talqılanıp jatır. Memlekettik satıp alu portalındağı derekke süyengen jurnalister men Qazaqstandağı satıp alu salasın zerteuşi maman Ğalımjan Orazımbet Şımkentte Naurız toylauğa byudjetten 595 mln teñge bölingenin jazğan. Bwl aqparat qoğamda şu tuğızıp, belsendiler Şımkent äkimdiginen byudjetten bölingen qarjı esebin swray bastadı. Al äkimdik 595 mln jaylı aqparattı joqqa şığarıp, Naurızdağı merekelik is-şaralarğa tek 213 mln teñge bölingenin habarladı. Sonımen kimdiki dwrıs? Zerttep kördik.

Naurızğa arnalğan is-şaralardı ötkizuge tapsırıs beruşi – Şımkent qalalıq mädeniet üyi. Onıñ direktorı – MuzArt tobınıñ änşisi Säken Mayğaziev. Memlekettik satıp alu portalınan bwl mekemeniñ Naurızğa oray türli kompaniyalarmen 7 kelisimşart jasasqanın bayqauğa boladı. Olardıñ jalpı qwnı – 595 mln teñge. Barlığı da tikeley bir közden satıp alu täsilimen ötken. Demek Mayğaziev basqaratın mekeme tapsırıstı orındauşı kompaniyalardı konkurssız tañdap alğan.

Endi kelisimşarttardıñ ärqaysına jeke toqtalayıq.

Eñ birinşisi «Penopro» JŞS-men jasalğan. Onıñ qwnı – 322 million 292 mıñ teñge. 16 naurız «Şımkent qayırımdı qala» – wlıstıñ wlı küni» is-şarası üşin jasalğan. Satıp aludıñ tehnikalıq erekşeliginde onıñ formatı, wyımdastıruğa kerek mamandar men tehnikalıq jabdıqtar, basqa da qajetti dünie jaylı mülde aqparat joq. Bastapqıda däl osı satıp aludıñ tehnikalıq erekşeliginde orındalu merzimi retinde naurız ayı körsetilgen äri portaldağı atauında Naurız merekesine oray dep anıq jazılıp twrdı.

«Naurız-Aytıs» merekelik şarasına qatısqan aqındar. Foto: Şımkent qalasınıñ mädeniet basqarması

Alayda Naurızğa 595 mln teñge bölingeni jaylı aqparat tarap, qoğamdıq rezonansqa aynalğannan keyin, 26 naurız küni osı satıp alu boyınşa qosımşa şart jasalıp, tehnikalıq erekşeliginde özgeris payda boldı. Tapsırıs beruşi mekeme, yağni Şımkent qalalıq mädeniet üyi qızmettiñ orındalu merzimi retinde naurız-qazan ayların körsetip delayndı tüzetti. Biraq osı uaqıt aralığında naqtı qanday şaralar ötui kerek ekeni tağı berilmedi. Al mädeniet üyiniñ portaldağı jıldıq josparında bwl satıp aludıñ orındalu merzimi retinde tek naurız ayı körsetilgen. Bwl – mekemeniñ osı şaranı naurızda ötkizudi josparlağanınıñ birden-bir däleli. Öytkeni kez kelgen satıp alu aldımen jıldıq josparğa engiziledi, kelisim şart soğan say jasaladı.

Ekinşi kelisim şart «Bala dauısı, Super Live, Jwldızay» is-şarasına arnalğan. Bağası – 80 mln teñge. Tapsırıstı orındauşı – «ZHAN ALEMI GROUP» JŞS. Onıñ basşısı – YArışev Aleksandr Aleksandroviç degen azamat. Kompaniya astanada tirkelgen. Memlekettik satıp alu portalında barlığı 2 kelisimşart jasağan äri ekeui de osı mekememen.

Soñğı kelisim şartqa 16 naurızda qol qoyılğan. Al 19 naurızda «Bala dauısı, Super Live, Jwldızay» degen atauda is-şara ötken. Ol jaylı Şımkent qalalıq mädeniet basqarmasınıñ Instagram jelisindegi paraqşasında habarlandı. Bwğan qosa, sol paraqşadağı tağı bir mälimet boyınşa, 22 naurız küni de Super Live dep atalğan jas orındauşılardıñ koncerti ötken.

Şımkenttegi naurız merekesi. Foto: Ayğaq

Jalpı portaldağı bwl kelisimşarttıñ tehnikalıq ereşeleginde satıp aludıñ ötkizilu, orındalu merzimi naurız ayı edi. Alayda 26 naurızda qosımşa şart jasalınıp, ötkizu merzimi özgertildi. Soñğı özgeriske say, satıp aludıñ ötkizu merzimi naurız ben mausım ayları retinde körsetildi. Alayda qosımşa şart jasalğan kezde bwl is-şara ötip qoyğan edi. Bwğan qosa, qızmettiñ orındalu merzimi belsindiler men jurnalister äkimdikten Naurızğa ketken naqtı şığınnıñ esebin swrap jatqanda özgergenin ayta ketu kerek.

Naurızğa oray jasalğan tağı bir kelisimşart «Open Art gallery» – «Ayqap» jurnalınıñ qwrılğanına 110 jıl» dep atalatın is-şara. Bağası – 50 mln teñge. Kelisimşartqa 18 naurız küni qol qoyılğan. Tapsırıstı orındauşı retinde  – JK «Prima Gololobova» tañdalğan. Bwl satıp aludıñ tehnikalıq erekşeliginde de is-şaranıñ tolıq sipattaması körsetilmegen. Memlekettik satıp alu portalında bastapqıda ötkizu, orındalu  merzimi retinde naurız ayı belgilengen edi. Keyinnen, 26 naurızda  bwl satıp alu boyınşa da qosımşa şart jasalıp, ötkizu merzimi naurız-mausım aylarınıñ aralığı dep auıstırılğan.

Osı satıp aluğa qatısıtı tağı bir derek taptıq. 17 naurız küni  Şımkent qalası mäslihatı twraqtı komissiyalarınıñ birlesken jiınında Naurızğa oray ötetin şaralardıñ byudjeti talqılanğan. Sol kezde mäslihat hatşısı Bahadır Narımbetov «Ayqap» jurnalınıñ mereytoyına arnalğan şara byujeti 30 mln ekenin äri bwl soma tım köptigin söz etken.

Mäslihat hatşısı «Ayqap» jurnalına arnalğan şara üşin 30 mln qarajattı köp körse de, bwl şara üşin 50 mln köleminde kelisimşart jasaldı.

Şımkent qalalıq mädeniet üyi Naurızğa oray jasasqan qalğan 4 kelisimşart portalda özgerissiz twr. YAğni atalğan kelisim-şarttardıñ tehnikalıq erekşeligine say, qızmettiñ orındalu merzimi – naurız ayı.

Sonımen ol qanday kelisim şarttar? Jeke-jeke toqtalayıq.

Bireui  «Dästürli än men jırlar – Dina Nwrpeyisova is-şarası qızmetine» dep ataladı. Kelisimşart bağası – 50 mln teñge. Tapsırıstı orındauşı  – JK «Dehgani Soloist». Almatı qalasında tirkelgen, basşısı –  Dehgani El'mira Isahanovna. Osı mekememen bwrın da kelisimşart jasasqan. Ol kezde «TMD mädeni astanası» şarasınıñ jabılu saltanatında tikeley efir wyımdastıru qızmetin körsetken. Al biılğı Naurız merekesindegi atqaratın qızmetin tehnikalıq erekşelikten anıqtau mümkin emes. Bir anığı, qızmet naurız ayında orındaluğa tiis. Bwl turalı tehnikalıq erekşelikte de, mädeniet üyiniñ jıldıq josparında da anıq körsetilgen.

Kelesi satıp alu «Naurız merekesine oray, Şımkent qalasınıñ mädeni nısandarın äleumettik jelilerde taratu is-şarası qızmetine» dep ataladı. Bwl boyınşa «Impresario Media Group» JŞS-men 22 mln 980 mıñ teñgege kelisimşart jasalğan. Tapsırıstı orındauşı kompaniya Şımkent qalasında tirkelgen. Basşısı – Asqarova Diana Ardaqqızı. Memlekettik satıp alu portalına 10 naurızda tirkelgen, yağni osı kelisimşartqa qol qoyardan 9 kün bwrın ğana. Kelisimşarttıñ tehnikalıq erekşeliginen kompaniyağa qanday qızmetti atqaru tapsırılğanı jazılmağan. Belgilisi sol – tapsırılğan qızmet naurız ayında orındaluğa tiis.

Şımkent qalalıq mädeniet üyi Naurız merekesine oray tapsırıs bergen tağı bir is-şara – aqındar aytısı. Mekeme ol üşin «Quraq Group» degen jihaz jasaytın kompaniyamen kelisimşartqa otırğan. Bağası – 40 mln teñge. Bwl satıp aludıñ portaldağı tehnikalıq erekşeliginde ötkiziletin şara retinde tek aytıs körsetilgen. Al naurızğa bölingen qarjınıñ esebi swralıp, qoğamda şu tuğan sätte Säken Mayğaziev 40 mln teñge tek aytısqa jwmsalmağanın jäne is-şaranı ötkizgen jihaz kompaniyasınıñ aytıs ötkizuge de qabileti bar ekenin alğa tarttı. Onıñ sözinşe, 40 millionnıñ bir böligi ädebi şığarmalar bayqauına jwmsalğan. Mayğazievtiñ sözi qanşalıqtı ras, bwnı da tekserip kördik.

Aytıs mädeniet üyiniñ jıldıq josparında bar is-şara. Bağası da 40 mln. Biraq 40 millionğa tek aytıs ötkizu üşin josparlanğan jäne kelisimşart ta tek aytıs üşin jasalğan.

Tağı bir derek: 17 naurız  küni Şımkent qalalıq mäslihatınıñ birlesken jiınında däl osı aytıs byudjeti talqılanğan. Mäslihat deputattarınıñ biri Şımkent mädeniet basqarmasınıñ basşısı Hanzada Esenovadan aytısqa ne sebepti 40 mln teñge bölingenin swraydı.

Videoda da tek aytıs turalı aytılğan, ädebi şığarmalar bayqauı jaylı bir auız söz joq. Bwğan qosa, Hanzada Esenova öz esebinde «Bas jülde – 2 mln, birinşi orın – 2 adamğa 1,5 millionnan, ekinşi orın – 2 adamğa 1 milionnan, üşinşi orın – 2 adamğa 500 mıñnan, qalğan 8 qatısuşınıñ ärqaysına 250 mıñ teñgeden beriledi» dedi. Al 20 naurız küni ayaqtalğan aytıstıñ jüldesi Esenova aytqanday bolğan joq. Mäselen, birinşi orın tek 1 aqınğa berildi. Onı jeñip alğan Bauırjan Şirmedenwlına 1,5 millionnıñ emes, 1 mln sertifakatı tabıstaldı. Al ekinşi orınğa ilikken eki aqınğa 1 millionnan emes, 500 mıñnan berildi. Üşinşi orındı 2 emes, 3 aqın ielendi. Alayda Hanzada Esenova aytqanday, ärqaysı 500 mıñnan emes, 300 mıñnan aldı. Qatısuşılarğa qanday jülde bergeni belgisiz.

Aytıstı jihaz jasaytın kompaniya ötkizgeni de qoğamdı tolğandırdı. Al Säken Mayğaziev ol kompaniyanıñ merekelik şara ötkizuge de rwqsatı bar ekenin jetkizdi. Sonımen 40 mln teñge aytıs  ötkizgen «Quraq Group» qanday kompaniya? Basşısı – 27 jastağı Sağıntaev Baqdäulet Batırhanwlı esimdi azamat. Kompaniya 9 ay bwrın qwrılğan. Şımkent qalasında tirkelgen. 19 naurız küni statistika komitetiniñ saytında jihaz jasaumen aynalısadı dep twrdı. Al keyin aytıs jaylı şu bastalğan soñ, kontragentter servisi uchet.kz saytında kompaniyanıñ türli is-şara ötkizuge licenziyası bar ekeni körsetilgen. Jalpı bwl kompaniya memlekettik satıp alu portalına aytıs ötkizu turalı kelisimşartqa qol qoyardan 11 kün bwrın ğana tirkelgen.

Şımkent qalalıq mädeniet üyiniñ Naurızğa oray jasağan eñ soñğı kelisim şartı – MuzArt tobınıñ koncerti. Oğan byudjetten 30 mln teñge bölingen. Bwl satıp alu boyınşa 20 naurız küni «Sapfir Media» kompaniyasımen kelisim şart jasalğan. Mädeniet basqarmasınıñ Instagram jelisindegi paraqşasınan koncerttiñ 21-22 naurız künderi ötkenin bayqauğa boladı. Paraqşadağı aqparatqa sensek, koncert aqılı ötken.

Säken Mayğazievtıñ özi basqaratın mekeme arqılı özi än aytatın toptıñ koncertine ne sebepti aqşa bölgeni tüsiniksiz. Bir anığı, Mayğazievke osı qızmetke tağayındalardıñ aldında MuzArt tobınıñ koncertin ötkizip beruge uäde berilgen. Bwl jaylı änşiniñ özi TalimTV yutub arnasına bergen swhbatında aşıq aytadı.

(17-minut 16-sekund)

Sonımen Şımkent äkimdigi Naurızğa qanşa qarjı böldi? Bizde üş nwsqa bar.

Birinşisi – qala byudjetin naqtılau üşin 17 naurız küni ötken mäslihattıñ birlesken jiınında aytılğan 572 mln teñge. Sol jiında mädeniet basqarmasınıñ basşısı Hanzada Esenova deputattarğa bergen esebinde is-şaralar üşin 572 mln teñge swraydı jäne olardıñ bäri Naurızğa oray wyımdastırılatın 6 is-şara ekenin tilge tiek etedi. Biraq Esenovanıñ esebinde MuzArt tobınıñ koncerti jaylı aytılmadı.

Ekinşi nwsqa Şımkent qalası äkimniñ birinşi orınbasarı Şıñğıs Mwqan men mädeniet basqarmasınıñ basşısı Hanzada Esenovanıñ 25 naurız küni brifingte keltirgen deregi. Olardıñ sözinşe,  Naurızğa 213 mln teñge qaralğan jäne mereke ayasında 103 is-şara ötken. Birden aytayıq, 103 is-şara degen – manipulaciyağa jaqındau aqparat. Iä, mädeniet basqarmasınıñ instagramdağı paraqşasınan 10 kün işinde 100-ge tarta şara ötkenin bayqauğa boladı. Alayda onıñ köbi byudjetten arnayı aqşa bölip ötkizetin şara emes jäne onıñ barlığın Säken Mayğaziev basqaratın mädeniet üyi wyımdastırmağan. Al mäseleni zerttegender däl Mayğaziev basqaratın mädeniet üyi jasağan 595 million teñgelik jeti kelisim şart jaylı jazğan. Jäne kelisim-şarttıñ bärinde qızmettiñ orındalu merzimi naurız ayında dep twrğanın alğa tartqan.

Kelisimşarttarğa qol qoyğan Säken Mayğaziev naurızğa dep bölingen qarajattıñ bäri äkimdik pen mäslihattıñ maqwldauımen boldı dep otır. Alayda bwl aqparat ta manipulaciyağa jaqındau. Öytkeni naurızğa bölinetin qarajat mäslihatta 17 naurız  küni talqılandı. Al ol kezde üş kelisimşart küşine enip qoyğan edi.

Soñğı äri qwjatqa negizdelgen nwsqa – aşıq derekközdegi resmi aqparat. Memlekettik satıp alu portalındağı Şımkent qalalıq mädeniet üyiniñ jıldıq josparı äri jasasqan kelisimşarttarı.

Portaldağı derekke qarağanda, mädeniet üyi 2021 jılı 751 millioğa 101 satıp alu josparlap otır. Onıñ 735 millionı jıl boyı ötetin is-şaralarğa arnalğanın köruge boladı. Al qalğan qarjı mekemeniñ özge şığındarına qarastırılğan.

İs-şaralardıñ jeteuinde Naurız merekesine oray dep anıq jazılıp twr. Olardıñ beseuiniñ orındalu merzimi retinde naurız ayı körsetilse, qalğan ekeuinde satıp aludıñ ötkizilu merzimi naurız ayı dep, al orındalu merzimi naurız-mausım ayları dep körsetilgen. Al osı josparlanğan satıp alular boyınşa jasalğan kelisimşarttarğa kelsek, olardıñ jeteuiniñ de tehnikalıq erekşeligindegi şara atauı Naurız merekesine oray dep toltırılğan. Bastapqıda barlığında orındalu merzimi naurız ayı dep körsetildi. Al 26 naurızda üş kelisimşarttıñ tehnikalıq erekşeligi özgeriske wşıradı. Basa ayta ketetin jayt – Şımkent qalalıq mädeniet  üyi üş kelisimşarttıñ tehnikalıq erekşeligin özgertip, qosımşa şart jasağan kezde «Naurız Şımkentten bastaladı» degen megajobanıñ bitkenine eki kün bolıp qoyğan edi.

“The Qazaq Times”