Fotokollaj QT

Şımkent qalalıq mädeniet üyi Şämşi Qaldayaqov ändiriniñ  koncertin ötkizu üşin CiMediaGroup kompaniyasımen 60 mln teñgege kelisimşart jasasqan. Al aşıq derekközderdegi aqparatqa qarağanda, bwl kompaniya Şımkenttegi mädeniet üyimen kelisimşart jasasardan eki kün bwrın ğana memlekettik tirkeuden ötken. Mädeniet üyi byudjeti 60 mln teñge bolatın is-şaranı wyımdastırudı ne sebepti jañadan qwrılğan täjiribesiz kompaniyağa tapsırdı? The Qazaq Times tilşisi osı swraqtıñ jauabın izdep kördi.

Memlekettik satıp alu portalındağı derekke qarağanda, CiMediaGroup 14 şilde küni qwrılğan. Kompaniya (qwjat boyınşa) Ismagulova Naziya Nurlanovna degen azamatqa tiesili. Memsatıp alu portalında kompaniya meken-jayı retinde astanadağı Bauırjan Momoşwlı köşesi körsetilgen. Al Wlttıq statistika byurosınıñ dereginşe, CiMediaGroup Şımkent qalasınıñ äl-Farabi audanında tirkelgen.

Memsatıpalu portalındağı CiMediaGroup kompaniyası jaylı mälimettiñ skrinşotı.

Wlttıq statistika byurosı saytındağı CiMediaGroup jaylı aqparat.

Kompaniya qwrılğan soñ 3 künnen keyin memsatıp alu portalına tirkelip, Şımkent qalalıq mädeniet üyimen Şämşi änderiniñ koncertin ötkizu boyınşa kelisimşartqa otırğan. 16 şildede bastalğan kelisimşart procesi tamızdıñ 2-sinde ayaqtalıp,  CiMediaGroup kompaniyası resmi türde osı satıp alu boyınşa tapsırıs orındauşı kompaniya atanğan.

Memlekettik satıp alu portalınan skrinşot.

Kelisimşartqa säykes, Şämşi änderiniñ koncerti kompozitordıñ tuğan künine oray, yağni 15 tamızğa josparlanğan. Biraq koncert ol küni ötken joq, kelisimşart ta portalda sol küyi twr. Osığan baylanıstı Şımkent qalalıq mädeniet üyine habarlasıp kördik. Bizdiñ swraqtarımızğa mädeniet üyiniñ direktorı Säken Mayğaziev emes, onıñ orınbasarı Ğani Amanqwlov jauap berdi.

-Koncertti 15 tamızda ötkizudi josparlağanbız. Keyin bizde karantin jağdayına baylanıstı is-şara ötpeytin boldı. Biz endi bwl kelisimşarttı bwzğalı jatırmız, - dedi Amanqwlov.

Negizi bwl tender boyınşa bir közden satıp alu täsili qoldanılğan. YAğni tapsırıs beruşi mekeme tapsırıs orındauşı kompaniyanı eşqanday konkurssız tañdap alğan. Jurnalist Mayğazievtiñ orınbasarınan koncert ötkizuge ne sebepti qwrılğanına eki-aq kün bolğan täjiribesiz kompaniya tañdalğanın swradı. Amanqwlov tilşiniñ bwl swrağına jauap bere almadı. Onıñ aytuına qarağanda, mädeniet üyiniñ direktorı Säken Mayğaziev birer kün bwrın qızmetinen ketken. Al koncertti ötkizuge ne sebepti CiMediaGroup kompaniyası tañdalğanın Mayğaziev biledi eken. Amanqwlov Mayğazievke habarlasıp, mäseleni anıqtauğa tırısatının, sodan keyin tilşige bir habarın beretinin ayttı. Biraq osı maqala jariyalanğanşa Şımkent qalalıq mädeniet üyinen eşqanday habar bolğan joq.

Bwğan deyin Şımkenttegi Naurız toyına arnalğan is-şaralardıñ byudjetine baylanıstı qoğamda şu tuğan. Jurnalister men belsendiler Säken Mayğaziev basqarğan qalalıq mädeniet üyiniñ naurızğa oray türli kompaniyalarmen qwnı 595 mln teñge bolatın jeti kelisimşart jasasqanın jazğan. Jurnalister zertteuinde Naurızğa oray jasalğan kelisimşarttarda tehnikalıq erekşelik dwrıs toltırılmağanı aytıldı. Bwğan qosa, osı mäseleni kötergen belsendiler is-şaralarğa qarjınıñ tım bölinuine jäne tenderdi täjiribesi joq kompaniyalardıñ wtqanına basa nazar audardı.

Osı mäsele qoğamda qızu talqılanıp jatqanda Säken Mayğaziev te, Şımkent qalası äkiminiñ birinşi orınbasarı Şıñğıs Mwqan da jurnalister keltirgen derekti joqqa şığardı. Olar "Naurızğa tek 213  mln teñge bölingenin, jurnalister keltirgen 595 mln teñge jıl boyı ötetin is-şaralarğa qarastırılğanın" uäj etti. Biıl mausımda Ortalıq kommunikaciyalar qızmetinde ötken brifingte The Qazaq Times tilşisiniñ swrağına jauap bergen Şımkent qalasınıñ äkimi Mwrat Äytenov te  595 mln teñge tek Naurız toylauğa emes, jıl boyı ötetin is-şaralarğa da arnalğanın ayttı. Onıñ sözinşe, memlekettik satıp alu portalındağı 595 mln teñgege jasalğan kelisimşarttıñ bärinde "Naurız merekesine oray" dep jazılıp twruına "mekeme qızmetkeriniñ qateligi sebep" bolğan.

Şımkettik şeneunikterdiñ "Naurızğa 213 mln teñge bölindi, 595 mln teñge jıl boyı ötetin is-şaralar üşin qarastırılğan" degeni memlekettik satıp alu portalındağı resmi derekke qayşı. Öytkeni Mädeniet üyiniñ jıl bastalğalı merekelik is-şaralar üşin jasasqan kelisimşarttarınıñ jalpı qwnı qazirdiñ özinde 680 mln teñgeden asıp ketti. Memlekettik satıp alu portalınıñ deregine süyensek, Şımkent äkimdigi merekelik is-şaralarğa 2021 jılı 800 mln teñgeden astam qarajat jwmsaudı josparlap otır.

The Qazaq Times