اكىمدىك مالىمەتى رەسمي دەرەككە قايشى: شىمكەنت ناۋرىزعا قانشا قارجى ءبولدى؟

شىمكەنتتە ناۋرىز مەرەكەسىنە وراي ۇيىمداستىرىلعان ءىس-شارالارعا جەرگىلىكتى بيۋدجەتتەن قانشا قارجى بولىنگەنى 19 ناۋرىزدان بەرى قوعامدا قىزۋ تالقىلانىپ جاتىر. مەملەكەتتىك ساتىپ الۋ پورتالىنداعى دەرەككە سۇيەنگەن جۋرناليستەر مەن قازاقستانداعى ساتىپ الۋ سالاسىن زەرتەۋشى مامان عالىمجان ورازىمبەت شىمكەنتتە ناۋرىز تويلاۋعا بيۋدجەتتەن 595 ملن تەڭگە بولىنگەنىن جازعان. بۇل اقپارات قوعامدا شۋ تۋعىزىپ، بەلسەندىلەر شىمكەنت اكىمدىگىنەن بيۋدجەتتەن بولىنگەن قارجى ەسەبىن سۇراي باستادى. ال اكىمدىك 595 ملن جايلى اقپاراتتى جوققا شىعارىپ، ناۋرىزداعى مەرەكەلىك ءىس-شارالارعا تەك 213 ملن تەڭگە بولىنگەنىن حابارلادى. سونىمەن كىمدىكى دۇرىس؟ زەرتتەپ كوردىك.

ناۋرىزعا ارنالعان ءىس-شارالاردى وتكىزۋگە تاپسىرىس بەرۋشى – شىمكەنت قالالىق مادەنيەت ءۇيى. ونىڭ ديرەكتورى – مۋزارت توبىنىڭ ءانشىسى ساكەن مايعازيەۆ. مەملەكەتتىك ساتىپ الۋ پورتالىنان بۇل مەكەمەنىڭ ناۋرىزعا وراي ءتۇرلى كومپانيالارمەن 7 كەلىسىمشارت جاساسقانىن بايقاۋعا بولادى. ولاردىڭ جالپى قۇنى – 595 ملن تەڭگە. بارلىعى دا تىكەلەي ءبىر كوزدەن ساتىپ الۋ تاسىلىمەن وتكەن. دەمەك مايعازيەۆ باسقاراتىن مەكەمە تاپسىرىستى ورىنداۋشى كومپانيالاردى كونكۋرسسىز تاڭداپ العان.

ەندى كەلىسىمشارتتاردىڭ ارقايسىنا جەكە توقتالايىق.

ەڭ ءبىرىنشىسى «Penopro» جشس-مەن جاسالعان. ونىڭ قۇنى – 322 ميلليون 292 مىڭ تەڭگە. 16 ناۋرىز «شىمكەنت قايىرىمدى قالا» – ۇلىستىڭ ۇلى كۇنى» ءىس-شاراسى ءۇشىن جاسالعان. ساتىپ الۋدىڭ تەحنيكالىق ەرەكشەلىگىندە ونىڭ فورماتى، ۇيىمداستىرۋعا كەرەك ماماندار مەن تەحنيكالىق جابدىقتار، باسقا دا قاجەتتى دۇنيە جايلى مۇلدە اقپارات جوق. باستاپقىدا ءدال وسى ساتىپ الۋدىڭ تەحنيكالىق ەرەكشەلىگىندە ورىندالۋ مەرزىمى رەتىندە ناۋرىز ايى كورسەتىلگەن ءارى پورتالداعى اتاۋىندا ناۋرىز مەرەكەسىنە وراي دەپ انىق جازىلىپ تۇردى.

«ناۋرىز-ايتىس» مەرەكەلىك شاراسىنا قاتىسقان اقىندار. فوتو: شىمكەنت قالاسىنىڭ مادەنيەت باسقارماسى

الايدا ناۋرىزعا 595 ملن تەڭگە بولىنگەنى جايلى اقپارات تاراپ، قوعامدىق رەزونانسقا اينالعاننان كەيىن، 26 ناۋرىز كۇنى وسى ساتىپ الۋ بويىنشا قوسىمشا شارت جاسالىپ, تەحنيكالىق ەرەكشەلىگىندە وزگەرىس پايدا بولدى. تاپسىرىس بەرۋشى مەكەمە، ياعني شىمكەنت قالالىق مادەنيەت ءۇيى قىزمەتتىڭ ورىندالۋ مەرزىمى رەتىندە ناۋرىز-قازان ايلارىن كورسەتىپ دەلايندى تۇزەتتى. بىراق وسى ۋاقىت ارالىعىندا ناقتى قانداي شارالار ءوتۋى كەرەك ەكەنى تاعى بەرىلمەدى. ال مادەنيەت ءۇيىنىڭ پورتالداعى جىلدىق جوسپارىندا بۇل ساتىپ الۋدىڭ ورىندالۋ مەرزىمى رەتىندە تەك ناۋرىز ايى كورسەتىلگەن. بۇل – مەكەمەنىڭ وسى شارانى ناۋرىزدا وتكىزۋدى جوسپارلاعانىنىڭ بىردەن-ءبىر دالەلى. ويتكەنى كەز كەلگەن ساتىپ الۋ الدىمەن جىلدىق جوسپارعا ەنگىزىلەدى، كەلىسىم شارت سوعان ساي جاسالادى.

ەكىنشى كەلىسىم شارت «Bala داۋىسى، Super Live, جۇلدىزاي» ءىس-شاراسىنا ارنالعان. باعاسى – 80 ملن تەڭگە. تاپسىرىستى ورىنداۋشى – «ZHAN ALEMI GROUP» جشس. ونىڭ باسشىسى – يارىشەۆ الەكساندر الەكساندروۆيچ دەگەن ازامات. كومپانيا استانادا تىركەلگەن. مەملەكەتتىك ساتىپ الۋ پورتالىندا بارلىعى 2 كەلىسىمشارت جاساعان ءارى ەكەۋى دە وسى مەكەمەمەن.

سوڭعى كەلىسىم شارتقا 16 ناۋرىزدا قول قويىلعان. ال 19 ناۋرىزدا «Bala داۋىسى، Super Live, جۇلدىزاي» دەگەن اتاۋدا ءىس-شارا وتكەن. ول جايلى شىمكەنت قالالىق مادەنيەت باسقارماسىنىڭ Instagram جەلىسىندەگى پاراقشاسىندا حابارلاندى. بۇعان قوسا، سول پاراقشاداعى تاعى ءبىر مالىمەت بويىنشا، 22 ناۋرىز كۇنى دە Super Live دەپ اتالعان جاس ورىنداۋشىلاردىڭ كونتسەرتى وتكەن.

شىمكەنتتەگى ناۋرىز مەرەكەسى. فوتو: ايعاق

جالپى پورتالداعى بۇل كەلىسىمشارتتىڭ تەحنيكالىق ەرەشەلەگىندە ساتىپ الۋدىڭ وتكىزىلۋ، ورىندالۋ مەرزىمى ناۋرىز ايى ەدى. الايدا 26 ناۋرىزدا قوسىمشا شارت جاسالىنىپ، وتكىزۋ مەرزىمى وزگەرتىلدى. سوڭعى وزگەرىسكە ساي، ساتىپ الۋدىڭ وتكىزۋ مەرزىمى ناۋرىز بەن ماۋسىم ايلارى رەتىندە كورسەتىلدى. الايدا قوسىمشا شارت جاسالعان كەزدە بۇل ءىس-شارا ءوتىپ قويعان ەدى. بۇعان قوسا، قىزمەتتىڭ ورىندالۋ مەرزىمى بەلسىندىلەر مەن جۋرناليستەر اكىمدىكتەن ناۋرىزعا كەتكەن ناقتى شىعىننىڭ ەسەبىن سۇراپ جاتقاندا وزگەرگەنىن ايتا كەتۋ كەرەك.

ناۋرىزعا وراي جاسالعان تاعى ءبىر كەلىسىمشارت «Open Art gallery» – «ايقاپ» جۋرنالىنىڭ قۇرىلعانىنا 110 جىل» دەپ اتالاتىن ءىس-شارا. باعاسى – 50 ملن تەڭگە. كەلىسىمشارتقا 18 ناۋرىز كۇنى قول قويىلعان. تاپسىرىستى ورىنداۋشى رەتىندە  – جك «Prima Gololobova» تاڭدالعان. بۇل ساتىپ الۋدىڭ تەحنيكالىق ەرەكشەلىگىندە دە ءىس-شارانىڭ تولىق سيپاتتاماسى كورسەتىلمەگەن. مەملەكەتتىك ساتىپ الۋ پورتالىندا باستاپقىدا وتكىزۋ، ورىندالۋ  مەرزىمى رەتىندە ناۋرىز ايى بەلگىلەنگەن ەدى. كەيىننەن، 26 ناۋرىزدا  بۇل ساتىپ الۋ بويىنشا دا قوسىمشا شارت جاسالىپ، وتكىزۋ مەرزىمى ناۋرىز-ماۋسىم ايلارىنىڭ ارالىعى دەپ اۋىستىرىلعان.

وسى ساتىپ الۋعا قاتىسىتى تاعى ءبىر دەرەك تاپتىق. 17 ناۋرىز كۇنى  شىمكەنت قالاسى ءماسليحاتى تۇراقتى كوميسسيالارىنىڭ بىرلەسكەن جيىنىندا ناۋرىزعا وراي وتەتىن شارالاردىڭ بيۋدجەتى تالقىلانعان. سول كەزدە ءماسليحات حاتشىسى باحادىر نارىمبەتوۆ «ايقاپ» جۋرنالىنىڭ مەرەيتويىنا ارنالعان شارا بيۋجەتى 30 ملن ەكەنىن ءارى بۇل سوما تىم كوپتىگىن ءسوز ەتكەن.

ءماسليحات حاتشىسى «ايقاپ» جۋرنالىنا ارنالعان شارا ءۇشىن 30 ملن قاراجاتتى كوپ كورسە دە، بۇل شارا ءۇشىن 50 ملن كولەمىندە كەلىسىمشارت جاسالدى.

شىمكەنت قالالىق مادەنيەت ءۇيى ناۋرىزعا وراي جاساسقان قالعان 4 كەلىسىمشارت پورتالدا وزگەرىسسىز تۇر. ياعني اتالعان كەلىسىم-شارتتاردىڭ تەحنيكالىق ەرەكشەلىگىنە ساي، قىزمەتتىڭ ورىندالۋ مەرزىمى – ناۋرىز ايى.

سونىمەن ول قانداي كەلىسىم شارتتار؟ جەكە-جەكە توقتالايىق.

بىرەۋى  «ءداستۇرلى ءان مەن جىرلار – دينا نۇرپەيىسوۆا ءىس-شاراسى قىزمەتىنە» دەپ اتالادى. كەلىسىمشارت باعاسى – 50 ملن تەڭگە. تاپسىرىستى ورىنداۋشى  – جك «دەحگاني Soloist». الماتى قالاسىندا تىركەلگەن، باسشىسى –  دەحگاني ەلميرا يساحانوۆنا. وسى مەكەمەمەن بۇرىن دا كەلىسىمشارت جاساسقان. ول كەزدە «تمد مادەني استاناسى» شاراسىنىڭ جابىلۋ سالتاناتىندا تىكەلەي ەفير ۇيىمداستىرۋ قىزمەتىن كورسەتكەن. ال بيىلعى ناۋرىز مەرەكەسىندەگى اتقاراتىن قىزمەتىن تەحنيكالىق ەرەكشەلىكتەن انىقتاۋ مۇمكىن ەمەس. ءبىر انىعى، قىزمەت ناۋرىز ايىندا ورىندالۋعا ءتيىس. بۇل تۋرالى تەحنيكالىق ەرەكشەلىكتە دە، مادەنيەت ءۇيىنىڭ جىلدىق جوسپارىندا دا انىق كورسەتىلگەن.

كەلەسى ساتىپ الۋ «ناۋرىز مەرەكەسىنە وراي، شىمكەنت قالاسىنىڭ مادەني نىساندارىن الەۋمەتتىك جەلىلەردە تاراتۋ ءىس-شاراسى قىزمەتىنە» دەپ اتالادى. بۇل بويىنشا «Impresario Media Group» جشس-مەن 22 ملن 980 مىڭ تەڭگەگە كەلىسىمشارت جاسالعان. تاپسىرىستى ورىنداۋشى كومپانيا شىمكەنت قالاسىندا تىركەلگەن. باسشىسى – اسقاروۆا ديانا ارداققىزى. مەملەكەتتىك ساتىپ الۋ پورتالىنا 10 ناۋرىزدا تىركەلگەن، ياعني وسى كەلىسىمشارتقا قول قوياردان 9 كۇن بۇرىن عانا. كەلىسىمشارتتىڭ تەحنيكالىق ەرەكشەلىگىنەن كومپانياعا قانداي قىزمەتتى اتقارۋ تاپسىرىلعانى جازىلماعان. بەلگىلىسى سول – تاپسىرىلعان قىزمەت ناۋرىز ايىندا ورىندالۋعا ءتيىس.

شىمكەنت قالالىق مادەنيەت ءۇيى ناۋرىز مەرەكەسىنە وراي تاپسىرىس بەرگەن تاعى ءبىر ءىس-شارا – اقىندار ايتىسى. مەكەمە ول ءۇشىن «Quraq Group» دەگەن جيھاز جاسايتىن كومپانيامەن كەلىسىمشارتقا وتىرعان. باعاسى – 40 ملن تەڭگە. بۇل ساتىپ الۋدىڭ پورتالداعى تەحنيكالىق ەرەكشەلىگىندە وتكىزىلەتىن شارا رەتىندە تەك ايتىس كورسەتىلگەن. ال ناۋرىزعا بولىنگەن قارجىنىڭ ەسەبى سۇرالىپ، قوعامدا شۋ تۋعان ساتتە ساكەن مايعازيەۆ 40 ملن تەڭگە تەك ايتىسقا جۇمسالماعانىن جانە ءىس-شارانى وتكىزگەن جيھاز كومپانياسىنىڭ ايتىس وتكىزۋگە دە قابىلەتى بار ەكەنىن العا تارتتى. ونىڭ سوزىنشە، 40 ميلليوننىڭ ءبىر بولىگى ادەبي شىعارمالار بايقاۋىنا جۇمسالعان. مايعازيەۆتىڭ ءسوزى قانشالىقتى راس، بۇنى دا تەكسەرىپ كوردىك.

ايتىس مادەنيەت ءۇيىنىڭ جىلدىق جوسپارىندا بار ءىس-شارا. باعاسى دا 40 ملن. بىراق 40 ميلليونعا تەك ايتىس وتكىزۋ ءۇشىن جوسپارلانعان جانە كەلىسىمشارت تا تەك ايتىس ءۇشىن جاسالعان.

تاعى ءبىر دەرەك: 17 ناۋرىز  كۇنى شىمكەنت قالالىق ءماسليحاتىنىڭ بىرلەسكەن جيىنىندا ءدال وسى ايتىس بيۋدجەتى تالقىلانعان. ءماسليحات دەپۋتاتتارىنىڭ ءبىرى شىمكەنت مادەنيەت باسقارماسىنىڭ باسشىسى حانزادا ەسەنوۆادان ايتىسقا نە سەبەپتى 40 ملن تەڭگە بولىنگەنىن سۇرايدى.

ۆيدەودا دا تەك ايتىس تۋرالى ايتىلعان، ادەبي شىعارمالار بايقاۋى جايلى ءبىر اۋىز ءسوز جوق. بۇعان قوسا، حانزادا ەسەنوۆا ءوز ەسەبىندە «باس جۇلدە – 2 ملن، ءبىرىنشى ورىن – 2 ادامعا 1,5 ميلليوننان، ەكىنشى ورىن – 2 ادامعا 1 ميليوننان، ءۇشىنشى ورىن – 2 ادامعا 500 مىڭنان، قالعان 8 قاتىسۋشىنىڭ ارقايسىنا 250 مىڭ تەڭگەدەن بەرىلەدى» دەدى. ال 20 ناۋرىز كۇنى اياقتالعان ايتىستىڭ جۇلدەسى ەسەنوۆا ايتقانداي بولعان جوق. ماسەلەن، ءبىرىنشى ورىن تەك 1 اقىنعا بەرىلدى. ونى جەڭىپ العان باۋىرجان شيرمەدەنۇلىنا 1,5 ميلليوننىڭ ەمەس، 1 ملن سەرتيفاكاتى تابىستالدى. ال ەكىنشى ورىنعا ىلىككەن ەكى اقىنعا 1 ميلليوننان ەمەس، 500 مىڭنان بەرىلدى. ءۇشىنشى ورىندى 2 ەمەس، 3 اقىن يەلەندى. الايدا حانزادا ەسەنوۆا ايتقانداي، ارقايسى 500 مىڭنان ەمەس، 300 مىڭنان الدى. قاتىسۋشىلارعا قانداي جۇلدە بەرگەنى بەلگىسىز.

ايتىستى جيھاز جاسايتىن كومپانيا وتكىزگەنى دە قوعامدى تولعاندىردى. ال ساكەن مايعازيەۆ ول كومپانيانىڭ مەرەكەلىك شارا وتكىزۋگە دە رۇقساتى بار ەكەنىن جەتكىزدى. سونىمەن 40 ملن تەڭگە ايتىس  وتكىزگەن «Quraq Group» قانداي كومپانيا؟ باسشىسى – 27 جاستاعى ساعىنتاەۆ باقداۋلەت باتىرحانۇلى ەسىمدى ازامات. كومپانيا 9 اي بۇرىن قۇرىلعان. شىمكەنت قالاسىندا تىركەلگەن. 19 ناۋرىز كۇنى ستاتيستيكا كوميتەتىنىڭ سايتىندا جيھاز جاساۋمەن اينالىسادى دەپ تۇردى. ال كەيىن ايتىس جايلى شۋ باستالعان سوڭ، كونتراگەنتتەر سەرۆيسى uchet.kz سايتىندا كومپانيانىڭ ءتۇرلى ءىس-شارا وتكىزۋگە ليتسەنزياسى بار ەكەنى كورسەتىلگەن. جالپى بۇل كومپانيا مەملەكەتتىك ساتىپ الۋ پورتالىنا ايتىس وتكىزۋ تۋرالى كەلىسىمشارتقا قول قوياردان 11 كۇن بۇرىن عانا تىركەلگەن.

شىمكەنت قالالىق مادەنيەت ءۇيىنىڭ ناۋرىزعا وراي جاساعان ەڭ سوڭعى كەلىسىم شارتى – مۋزارت توبىنىڭ كونتسەرتى. وعان بيۋدجەتتەن 30 ملن تەڭگە بولىنگەن. بۇل ساتىپ الۋ بويىنشا 20 ناۋرىز كۇنى «ساپفير مەديا» كومپانياسىمەن كەلىسىم شارت جاسالعان. مادەنيەت باسقارماسىنىڭ Instagram جەلىسىندەگى پاراقشاسىنان كونتسەرتتىڭ 21-22 ناۋرىز كۇندەرى وتكەنىن بايقاۋعا بولادى. پاراقشاداعى اقپاراتقا سەنسەك، كونتسەرت اقىلى وتكەن.

ساكەن مايعازيەۆتىڭ ءوزى باسقاراتىن مەكەمە ارقىلى ءوزى ءان ايتاتىن توپتىڭ كونتسەرتىنە نە سەبەپتى اقشا بولگەنى تۇسىنىكسىز. ءبىر انىعى، مايعازيەۆكە وسى قىزمەتكە تاعايىندالاردىڭ الدىندا مۋزارت توبىنىڭ كونتسەرتىن وتكىزىپ بەرۋگە ۋادە بەرىلگەن. بۇل جايلى ءانشىنىڭ ءوزى TalimTV يۋتۋب ارناسىنا بەرگەن سۇحباتىندا اشىق ايتادى.

(17-مينۋت 16-سەكۋند)

سونىمەن شىمكەنت اكىمدىگى ناۋرىزعا قانشا قارجى ءبولدى؟ بىزدە ءۇش نۇسقا بار.

ءبىرىنشىسى – قالا بيۋدجەتىن ناقتىلاۋ ءۇشىن 17 ناۋرىز كۇنى وتكەن ءماسليحاتتىڭ بىرلەسكەن جيىنىندا ايتىلعان 572 ملن تەڭگە. سول جيىندا مادەنيەت باسقارماسىنىڭ باسشىسى حانزادا ەسەنوۆا دەپۋتاتتارعا بەرگەن ەسەبىندە ءىس-شارالار ءۇشىن 572 ملن تەڭگە سۇرايدى جانە ولاردىڭ ءبارى ناۋرىزعا وراي ۇيىمداستىرىلاتىن 6 ءىس-شارا ەكەنىن تىلگە تيەك ەتەدى. بىراق ەسەنوۆانىڭ ەسەبىندە مۋزارت توبىنىڭ كونتسەرتى جايلى ايتىلمادى.

ەكىنشى نۇسقا شىمكەنت قالاسى اكىمنىڭ ءبىرىنشى ورىنباسارى شىڭعىس مۇقان مەن مادەنيەت باسقارماسىنىڭ باسشىسى حانزادا ەسەنوۆانىڭ 25 ناۋرىز كۇنى بريفينگتە كەلتىرگەن دەرەگى. ولاردىڭ سوزىنشە،  ناۋرىزعا 213 ملن تەڭگە قارالعان جانە مەرەكە اياسىندا 103 ءىس-شارا وتكەن. بىردەن ايتايىق، 103 ءىس-شارا دەگەن – مانيپۋلاتسياعا جاقىنداۋ اقپارات. ءيا، مادەنيەت باسقارماسىنىڭ ينستاگرامداعى پاراقشاسىنان 10 كۇن ىشىندە 100-گە تارتا شارا وتكەنىن بايقاۋعا بولادى. الايدا ونىڭ كوبى بيۋدجەتتەن ارنايى اقشا ءبولىپ وتكىزەتىن شارا ەمەس جانە ونىڭ بارلىعىن ساكەن مايعازيەۆ باسقاراتىن مادەنيەت ءۇيى ۇيىمداستىرماعان. ال ماسەلەنى زەرتتەگەندەر ءدال مايعازيەۆ باسقاراتىن مادەنيەت ءۇيى جاساعان 595 ميلليون تەڭگەلىك جەتى كەلىسىم شارت جايلى جازعان. جانە كەلىسىم-شارتتىڭ بارىندە قىزمەتتىڭ ورىندالۋ مەرزىمى ناۋرىز ايىندا دەپ تۇرعانىن العا تارتقان.

كەلىسىمشارتتارعا قول قويعان ساكەن مايعازيەۆ ناۋرىزعا دەپ بولىنگەن قاراجاتتىڭ ءبارى اكىمدىك پەن ءماسليحاتتىڭ ماقۇلداۋىمەن بولدى دەپ وتىر. الايدا بۇل اقپارات تا مانيپۋلاتسياعا جاقىنداۋ. ويتكەنى ناۋرىزعا بولىنەتىن قاراجات ءماسليحاتتا 17 ناۋرىز  كۇنى تالقىلاندى. ال ول كەزدە ءۇش كەلىسىمشارت كۇشىنە ەنىپ قويعان ەدى.

سوڭعى ءارى قۇجاتقا نەگىزدەلگەن نۇسقا – اشىق دەرەككوزدەگى رەسمي اقپارات. مەملەكەتتىك ساتىپ الۋ پورتالىنداعى شىمكەنت قالالىق مادەنيەت ءۇيىنىڭ جىلدىق جوسپارى ءارى جاساسقان كەلىسىمشارتتارى.

پورتالداعى دەرەككە قاراعاندا، مادەنيەت ءۇيى 2021 جىلى 751 ميلليوعا 101 ساتىپ الۋ جوسپارلاپ وتىر. ونىڭ 735 ميلليونى جىل بويى وتەتىن ءىس-شارالارعا ارنالعانىن كورۋگە بولادى. ال قالعان قارجى مەكەمەنىڭ وزگە شىعىندارىنا قاراستىرىلعان.

ءىس-شارالاردىڭ جەتەۋىندە ناۋرىز مەرەكەسىنە وراي دەپ انىق جازىلىپ تۇر. ولاردىڭ بەسەۋىنىڭ ورىندالۋ مەرزىمى رەتىندە ناۋرىز ايى كورسەتىلسە، قالعان ەكەۋىندە ساتىپ الۋدىڭ وتكىزىلۋ مەرزىمى ناۋرىز ايى دەپ، ال ورىندالۋ مەرزىمى ناۋرىز-ماۋسىم ايلارى دەپ كورسەتىلگەن. ال وسى جوسپارلانعان ساتىپ الۋلار بويىنشا جاسالعان كەلىسىمشارتتارعا كەلسەك، ولاردىڭ جەتەۋىنىڭ دە تەحنيكالىق ەرەكشەلىگىندەگى شارا اتاۋى ناۋرىز مەرەكەسىنە وراي دەپ تولتىرىلعان. باستاپقىدا بارلىعىندا ورىندالۋ مەرزىمى ناۋرىز ايى دەپ كورسەتىلدى. ال 26 ناۋرىزدا ءۇش كەلىسىمشارتتىڭ تەحنيكالىق ەرەكشەلىگى وزگەرىسكە ۇشىرادى. باسا ايتا كەتەتىن جايت – شىمكەنت قالالىق مادەنيەت  ۇيى ءۇش كەلىسىمشارتتىڭ تەحنيكالىق ەرەكشەلىگىن وزگەرتىپ، قوسىمشا شارت جاساعان كەزدە «ناۋرىز شىمكەنتتەن باستالادى» دەگەن مەگاجوبانىڭ بىتكەنىنە ەكى كۇن بولىپ قويعان ەدى.

“The Qazaq Times”