«Zañsızdıqtı Qıtayıña barıp ayt». Almatı qalası Alatau audandıq Memlekettik kirister basqarmasınan (Salıq qızmeti) memlekettik tildi talap etken azamattıq belsendi küzetşiden osınday jauap aldı. Bwnday keleñsiz jayttı qoğam belsendisi Irısbek Toqtasın öziniñ äleumettik jelidegi paraqşasında onlayn taratqan edi.

Memlekettik mekeme aldında memlekettik tilge degen bwnday jauap äleumettik jeli qoldanuşıları jağınan auır sınğa wşıradı. Mäseleniñ män jayın qoğam belsendisi Irısbek Toqtasınnan swrap bildik. Onıñ aytuınşa, Alatau audandıq MKB salıq töleuşiler men esep tapsıruşılardı mekeme işine kirgizbegen jäne memlekettik mekeme aldındağı jekelik qızmet körsetu ortalıqtarına baruğa "keñes bergen". «Olardıñ bäri aqılı, 3 mıñ da 5 mıñ teñge eken bir esep tapsırğanda. Solay jasap qoyğan ğoy, esiktiñ aldına jigitter twrıp alğan da, jeke menşik ortalıqtarğa jiberip twr. Bwnıñ bäri sıbaylas qoy», – deydi belsendi Irısbek Toqtasın.

Alayda, Alatau audandıq Memlekettik kirister basqarmasına qoñırau soqqanımızda, özin keñesşi mamanmın dep tanıstırğan Jänibek attı qızmetker bwl ayıptı joqqa şığardı. «Qazir bilesiz, indet jağdayına baylanıstı Alatau audandıq Salıq qızmeti ğana emes, qaladağı osığan wqsas memlekettik mekemeler jwmıs rejimi özgergen. Azamattarğa barınşa onlayn qızmetti paydalanuğa keñes berip jatırmız. Al, jeke menşik ortalıqtarğa siltegende biz anağan bar, mınağan bar demeymiz. Olay körsetuimizge bolmaydı. Onda bwl sıbaylastıq boladı. Tek, Alatau audanındağı twrğındar köbinde onlayn qızmetti paydalanudı bilmey jatadı», – dep tüsindirdi mekeme ökili.

Alayda, belsendi azamat: «Barsañ salıq qızmetiniñ aldındağı jigitter aşıqtan-aşıq siltep twr, «Şäripağa bar», «Wlpanğa bar» «solar jasap beredi» dep. Al, onıñ bäri kezinde sol mekemede qızmet istegen adamdar. Keyin jeke menşik sonday ortalıq aşıp alğan. «Problemalı» esep tapsırulardıñ bärin solar jasaydı. Men kirip swrap şıqtım ğoy, bir esep tapsıruğa 3-5 mıñ teñge. Kördiñiz be, komp'yuterge otıradı, bes minutta 3 mıñ, 5 mıñ alıp jatır. Osı jayttı körgennen keyin men onı äleumettik jelige jariyaladım», – deydi. Ol jäne: «Memlekettik organğa karantin bar da, jeke menşik ortalıqqa joq, bwl qanday sonda? Karantin şarası birdey boluı kerek qoy», – degen pikirde.

Belsendi Irısbek Toqtasın memlekettik mekeme ökilderine mekeme esiginde japsırılğan erejeler men salıq qızmetine qatıstı nwsqaulıqtardıñ bäri derlik orıs tilinde ekenin alğa tartıp, memlekettik tilde jazıluın talap etken. Mekeme ökilderi qazaqşa nwsqasın dayındaytının aytqan. Osı kezde küzetşi kelip «Onday zañsızdıqtı Qıtayıña barıp ayt!» dep dürse qoya bergen. Sonday-aq, belsendiniñ memlekettik tildi talap etu äreketin «arandatu» dep atağan.

Bolğan oqiğanıñ video jazbası Irısbek Toqtasınnıñ FB-tağı paraqşasında saqtalğan. Video jazbadan köringendey memlekettik mekemedegi küzetşi qızmetker belsendini sırtqa qaray şaqıradı jäne jelidegi tikeley efirdi toqtatu üşin telefonına jarmasadı.

Alatau audandıq MKB-den bwl turalı tüsinik berudi swrap edik, bizge jauap bergen qızmetkerler basşılıqqa siltedi. Al, olar körsetken nömerlerden «äu» degen adam bolmadı.

“The Qazaq Times”