«زاڭسىزدىقتى قىتايىڭا بارىپ ايت». الماتى قالاسى الاتاۋ اۋداندىق مەملەكەتتىك كىرىستەر باسقارماسىنان (سالىق قىزمەتى) مەملەكەتتىك ءتىلدى تالاپ ەتكەن ازاماتتىق بەلسەندى كۇزەتشىدەن وسىنداي جاۋاپ الدى. بۇنداي كەلەڭسىز جايتتى قوعام بەلسەندىسى ىرىسبەك توقتاسىن ءوزىنىڭ الەۋمەتتىك جەلىدەگى پاراقشاسىندا ونلاين تاراتقان ەدى.

مەملەكەتتىك مەكەمە الدىندا مەملەكەتتىك تىلگە دەگەن بۇنداي جاۋاپ الەۋمەتتىك جەلى قولدانۋشىلارى جاعىنان اۋىر سىنعا ۇشىرادى. ماسەلەنىڭ ءمان جايىن قوعام بەلسەندىسى ىرىسبەك توقتاسىننان سۇراپ بىلدىك. ونىڭ ايتۋىنشا، الاتاۋ اۋداندىق مكب سالىق تولەۋشىلەر مەن ەسەپ تاپسىرۋشىلاردى مەكەمە ىشىنە كىرگىزبەگەن جانە مەملەكەتتىك مەكەمە الدىنداعى جەكەلىك قىزمەت كورسەتۋ ورتالىقتارىنا بارۋعا "كەڭەس بەرگەن". «ولاردىڭ ءبارى اقىلى، 3 مىڭ دا 5 مىڭ تەڭگە ەكەن ءبىر ەسەپ تاپسىرعاندا. سولاي جاساپ قويعان عوي، ەسىكتىڭ الدىنا جىگىتتەر تۇرىپ العان دا، جەكە مەنشىك ورتالىقتارعا جىبەرىپ تۇر. بۇنىڭ ءبارى سىبايلاس قوي»، – دەيدى بەلسەندى ىرىسبەك توقتاسىن.

الايدا، الاتاۋ اۋداندىق مەملەكەتتىك كىرىستەر باسقارماسىنا قوڭىراۋ سوققانىمىزدا، ءوزىن كەڭەسشى مامانمىن دەپ تانىستىرعان جانىبەك اتتى قىزمەتكەر بۇل ايىپتى جوققا شىعاردى. «قازىر بىلەسىز، ىندەت جاعدايىنا بايلانىستى الاتاۋ اۋداندىق سالىق قىزمەتى عانا ەمەس، قالاداعى وسىعان ۇقساس مەملەكەتتىك مەكەمەلەر جۇمىس رەجيمى وزگەرگەن. ازاماتتارعا بارىنشا ونلاين قىزمەتتى پايدالانۋعا كەڭەس بەرىپ جاتىرمىز. ال، جەكە مەنشىك ورتالىقتارعا سىلتەگەندە ءبىز اناعان بار، مىناعان بار دەمەيمىز. ولاي كورسەتۋىمىزگە بولمايدى. وندا بۇل سىبايلاستىق بولادى. تەك، الاتاۋ اۋدانىنداعى تۇرعىندار كوبىندە ونلاين قىزمەتتى پايدالانۋدى بىلمەي جاتادى»، – دەپ ءتۇسىندىردى مەكەمە وكىلى.

الايدا، بەلسەندى ازامات: «بارساڭ سالىق قىزمەتىنىڭ الدىنداعى جىگىتتەر اشىقتان-اشىق سىلتەپ تۇر، «شاريپاعا بار»، «ۇلپانعا بار» «سولار جاساپ بەرەدى» دەپ. ال، ونىڭ ءبارى كەزىندە سول مەكەمەدە قىزمەت ىستەگەن ادامدار. كەيىن جەكە مەنشىك سونداي ورتالىق اشىپ العان. «پروبلەمالى» ەسەپ تاپسىرۋلاردىڭ ءبارىن سولار جاسايدى. مەن كىرىپ سۇراپ شىقتىم عوي، ءبىر ەسەپ تاپسىرۋعا 3-5 مىڭ تەڭگە. كوردىڭىز بە، كومپيۋتەرگە وتىرادى، بەس مينۋتتا 3 مىڭ، 5 مىڭ الىپ جاتىر. وسى جايتتى كورگەننەن كەيىن مەن ونى الەۋمەتتىك جەلىگە جاريالادىم»، – دەيدى. ول جانە: «مەملەكەتتىك ورگانعا كارانتين بار دا، جەكە مەنشىك ورتالىققا جوق، بۇل قانداي سوندا؟ كارانتين شاراسى بىردەي بولۋى كەرەك قوي»، – دەگەن پىكىردە.

بەلسەندى ىرىسبەك توقتاسىن مەملەكەتتىك مەكەمە وكىلدەرىنە مەكەمە ەسىگىندە جاپسىرىلعان ەرەجەلەر مەن سالىق قىزمەتىنە قاتىستى نۇسقاۋلىقتاردىڭ ءبارى دەرلىك ورىس تىلىندە ەكەنىن العا تارتىپ، مەملەكەتتىك تىلدە جازىلۋىن تالاپ ەتكەن. مەكەمە وكىلدەرى قازاقشا نۇسقاسىن دايىندايتىنىن ايتقان. وسى كەزدە كۇزەتشى كەلىپ «ونداي زاڭسىزدىقتى قىتايىڭا بارىپ ايت!» دەپ دۇرسە قويا بەرگەن. سونداي-اق، بەلسەندىنىڭ مەملەكەتتىك ءتىلدى تالاپ ەتۋ ارەكەتىن «ارانداتۋ» دەپ اتاعان.

بولعان وقيعانىڭ ۆيدەو جازباسى ىرىسبەك توقتاسىننىڭ فب-تاعى پاراقشاسىندا ساقتالعان. ۆيدەو جازبادان كورىنگەندەي مەملەكەتتىك مەكەمەدەگى كۇزەتشى قىزمەتكەر بەلسەندىنى سىرتقا قاراي شاقىرادى جانە جەلىدەگى تىكەلەي ەفيردى توقتاتۋ ءۇشىن تەلەفونىنا جارماسادى.

الاتاۋ اۋداندىق مكب-دەن بۇل تۋرالى تۇسىنىك بەرۋدى سۇراپ ەدىك، بىزگە جاۋاپ بەرگەن قىزمەتكەرلەر باسشىلىققا سىلتەدى. ال، ولار كورسەتكەن نومەرلەردەن «ءاۋ» دەگەن ادام بولمادى.

“The Qazaq Times”