Ministrdiñ öz auzınan: Qazaqstan medicinasında ne bar, ne joq?

Bas därigerdiñ mälimetine qarağanda, elimizde 135 tomografiya, 46 diagnostikalıq ortalıq bar eken. Al sarapşılar pnevmoniya türindegi virustıñ asqınğan türi örşigen twsta mwnıñ azdıq etetinin aytadı. 

Brigada men jedel järdem jetispeydi. Otandıq öndiruşilerden 807 jedel järdem köligi alınbaq. Ükimetten 1,2 mln test ülgisin satıp aluğa milliard teñge qarjı bölindi. Osı arqılı qor jetildirilip otıradı. Test jaqın künderi keledi.

Epidemiya ahualına qaray aymaqtarda test talabı bekitilip, jedel järdem brigadasınıñ şaqırtuımen halıqtı testileuge mümkindik tumaq. Osı orayda vedomstvo basşısı ambulatoriyalıq-emhanalıq kömek qaşıqtan körsetiledi, uçaskeler deñgeyinde şamamen 3 mıñ mobil'di brigada qwru josparlanıp otırğanın habarladı.

– 7 jıljımalı zerthana jwmıs istep twr. Şilde ayında tağı 8 diagnostikalauğa arnalğan mobil'di zerthana satıp alu közdelgen. Bwlardıñ barlığı auıldı jerlerde qoldanadı. Qazirgi uaqıtta Jambıl oblısınıñ Qorday jäne Almatı oblısındağı Eñbekşiqazaq audanında paydalanıp jatır, – dedi ministr.

Eldegi stacionardağı orındardıñ 60%-ı tolıp qalğan. Astana men Almatıda bwl körsetkiş 90%-ğa deyin jetti.

Respublika boyınşa 348 medicinalıq mekemede 26 mıñ tösek-orın dayındalğan. Tamız ayınıñ soñına qaray reanimaciya jäne intensivti terapiya bölimderi bar qosımşa 10 mıñ orın äzirleu josparlanıp jatır. Qazirgi tañda Qazaqstanda 3294 dana jasandı tınıstau apparatı (IVL) bar, onıñ 907-si mausım ayında satıp alındı. Aldağı uaqıtta tağı mıñ qwrılğı satıp alınbaq.

30 mausımdağı esep boyınşa, virus jwqtırğan 23,6 mıñ nauqas emdelip jatır. Stacionarda 9800 adam jatsa, 13,8 mıñ nauqas ambulator-poliklinikalardıñ baqılauında. Üş megapoliste jaña modul'di emhanada jäne 340 medicinalıq mekeme 27 991 orındıq stacionarğa aynaldı. Aymaqtağı epidemiya jağdayına baylanıstı qosımşa orındar aşılıp otıratın körinedi.

Joğarıda berilgen derek-mälimettiñ bärin jaqında Densaulıq saqtau ministri bolıp tağayındalğan Aleksey Coy bügin elordadağı Ortalıq kommunikaciya qızmetinde ötkizgen onlayn brifinginde ayttı.

Elde därihanalarda däri tapşılığı payda boldı. Ortalıq bastı därihanalardıñ aldında wzın sonar kezek. Qazaqstandıqtar virustıñ klinikalıq belgilerine wqsas aurumen jappay auıra bastağan. Jedel järdem qızmeti ülgere almay, tek jağdayı auır nauqastardı tasımaldap jatır. Auruhanalar lıq tolı, kadr jetispeydi. Keybir öñir äkimdikteri därigerlerge vakansiya jariyalauda. Bügingi tañda virus jwqtırıp, jalpı derekqorğa tirkelgen nauqastardıñ jiıntıq esebi 40 mıñğa tayadı. Älemde bwl körsetkiş 37-orınğa tiesili. Degenmen bwdan özge künine mıñdağan adam pnevmoniya boyınşa anıqtalıp otır. Mamandar mwnı kezinde bayqalmay, bügin asqınğan koronavirustıñ saldarı dep bağalaydı. Alayda Qazaqstannıñ Densaulıq saqtau ministrligi DDSW-ğa tek simptomdı nauqastardıñ ğana esebin wsınuda. Sarapşılar nauqastardı auru belgisi bar-joğına baylanıstı ekijaqtı esep jürgizudi, virusı asqınğandardı  jazdıgüni pnevmoniya qatarına qosudı «statistikanı bürkemeleu arqılı şınayı jağdaydı jasıru, manipulyaciya» deydi.

Prezident Toqaevtıñ «Halıq ünine qwlaq asatın memleket twjırımdaması» keñinen nasihattalıp jatqan twsta el ükimeti mamandardıñ bwl sınına äli moyın bwra qoyğan joq.

“The Qazaq Times”