Densaulıq saqtau ministri Aleksey Coy. 28 şilde 2021 jıl. Astana, OKQ. Foto: OrtKom

Qazaqstandağı kovidtik reanimaciya jüktemesi 43%-ğa jäne auruhanadağı tösek-orındar 53%-ğa tolğan. Bıltırğa qarağanda Almatı, Şımkent qalaları jäne Aqtöbe, Qızılorda oblıstarında densaulıq saqtau salasınıñ jüktemesi auırlağan.

Särsenbi küni OrtKom alañında ötken Densaulıq saqtau ministrliginiñ dästürli brifinginde ministr Aleksey Coy resmi bayandamasında keyingi eki aptada (COVID boyınşa) auruşañdıq köbeyip, 80 mıñ sırqat tirkelgenin mälimdedi.

Qazir elde otandıq medicina jüktemesi eki esege artıp, 90 mıñğa juıq adam emdelip jatır, onıñ mıñ şaqtısı ökpeni jasandı jeldetu apparatımen (IVL) tınıstap jatır. Şilde ayınıñ basımen salıstırğanda häli auır nauqastar qatarı 2,1 esege ösken.

Ministr Aleksey Coydıñ aytuınşa, keybir aymaqtarda auruhanalarda tösek-orın jetispeui mümkin. Mwnday öñirler qatarında Aqtöbe, Aqmola, Qızılorda oblıstarı men Şımkent qalası bar.

«Birqatar öñirlerde infekciyalıq jäne reanimaciyalıq tösek-orın tapşılığı boluı mümkin. Qater aymağında elorda, Şımkent qalaları jäne Aqtöbe, Aqmola, Qızılorda oblıstarı bar. Osı öñirlerde densaulıq saqtau jüyesiniñ jüktemesi artıp otır», – dep naqtıladı.

Ol qazirgi kezde auruşañdıq pen ölim-jitimniñ 65%-ı astana, Almatı, Şımkent, Atırau jäne Qarağandı öñirlerine tiesili ekenin atadı.

Bıltır 13 naurızdan beri COVID-19 infekciyasın jwqtırğandar qatarı 550 mıñğa juıqtadı, 1 tamızdan bılayğı koronavirus pnevmoniyası 60 mıñnan astı. DDSW derekqorı men Wlttıq statistikada Qazaqstanda auırğandar sanı 610 mıñğa tayadı. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardan 11,6 mıñnan asa adam (KVI+ / U07.1 – 5619, KVI- / U07.2 – 3660, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

“The Qazaq Times”