Densaulıq saqtau ministrligiñ basşılıq qwramı men özge de vedomstvo ökilderi qatısqan epidemiologiyalıq ahual turalı brifing. 28 şilde 2021 jıl. Astana, OKQ. Foto: OrtKom

Qazaqstan Ükimeti otandıq vakcinaciya öndirisi kölemi jönindegi josparın belgisiz sebeptermen özgertken. Köktemde 31 mlrd teñge qarjı bölingen ekpeniñ kölemi 5 esege qısqarğanı belgili boldı.

Densaulıq saqtau ministri Aleksey Coy 28 şildede QT tilşisiniñ saualına «üş aptada äreñ» bergen jauabında:

– Qazir kelisimşart jasaldı, onda jıl soñına deyin QazVac ekpesiniñ 3 mln dozası öndiru qarastırılğan. Qalğan kölemi qayta qaraldı. Bügingi tañda jetkizilip jatqan Sputnik V ekpesinen bölek Qıtaydıñ jaña vakcinasına qol jetkizu üşin ekijaqtı kelissöz ötkizilude. Ekpemen jedel qamtu bağıtında jwmıs jürip jatır, qalay kelisimşartqa qol qoyıladı, qarjı esebin jariyalaytın bolamız, – dedi.

Ötken jwmda, şildeniñ 23-i OrtKomda ötken brifingte ministr «50 mlrd qarjınıñ qayta bölinisin mindetti türde tolıq körsetemiz» degen edi. Särsenbi küngi dästürli brifingte bwl uädesin orındamadı, merzimin tağı şegerdi.

Osığan deyin 21 säuir küni vedomstvo tarapınan redakciyağa joldanğan jauap hatta Ükimet qaulısına säykes 50 mlrd teñgeden astam qarjığa eki ekpe satıp alatının habarlağan.

 «Qazaqstan Respublikası Ükimetiniñ rezervinen qarajat bölu turalı» 31 naurızdağı qaulığa säykes vakcinaciya nauqanında qoldanatın qwraldarğa 50 mlrd 229 mln teñge qarajat bölingen:

  • Sputnik V vakcinasınıñ 2 mln 60 mıñ dozasın satıp alu üşin 18 mlrd 24 mln 600 mıñ,
  • QazCovid-in otandıq vakcinasınıñ 15 mln 680 mıñ dozasına 31 mlrd 610 mln 900 mıñ,
  • 19 mln 800 mıñ dana şpric satıp aluğa 594 mln teñge jwmsalmaq», – delingen edi resmi jauapta.

Degenmen şınayı jağdayda büginde 5,2 mln qazaqstandıqtıñ basım böligi Sputnik V (GamKovidVak) ekpesin aluğa mäjbür boldı. Al «Estuşi Ükimet» josparında reseylik vakcina kölemi nebäri 2 mln şamasında bektilip edi. Bwl meje özgergen-özgermegeni jöninde jauaptı vedomstvo eşqanday mälimet taratpağan. Ministr Aleksey Coy 50 mlrd teñgeniñ jwmsalu bağıtı men esebin bere almay keledi.

Jambıl oblısında 7 mlrd teñge qarjığa salınğan QazVac vakcinasın şığaratın zauıttıñ aşılıp, osı künge deyin 600 mıñ doza şığarğanı, onıñ aldı tamız ayında taratılatını turalı aqparat särsenbide biraq aytıldı. Ükimettiñ bwl oqiğanı nege jasırın wstağanı belgisiz. Ministrliktiñ sılbır äreketin birqatar aqparat qwraldarı ökilderi sınğa aldı. Ükimet zauıttıñ iske qosıluı ğana emes, otandıq ekpeniñ 25 mıñ dozası Qırğıztanğa gumanitarlıq kömek retinde jöneltilgeni jöninde aqparat taratpadı. Mwnı Qırğızstannıñ Densaulıq saqtau ministrliginiñ baspasöz qızmeti jariyaladı.

Mausım ayınıñ soñında vice-prem'er Eralı Toğjanov Qazaqstannıñ Türkiyada QazVac vakcinasın qwyudan bas tartqanın habarlağan jäne küzden bastap zauıt öndiristi 1 mln dozağa deyin arttıradı dep boljağan. Äu basta jılına 1 mln doza ekpe öndiredi dep josparlağan Ükimet mindetti meje retinde nelikten 15,5 mln doza öndirudi maqsat etkeni  bwlıñğır.

QazVac ekpesin Bilim ministrligine qarastı Biologiyalıq qauipsizdik problemaları ğılımi-zertteu institutı inaktivti virus ädisimen jasap şığarğan. Sarapşılar men mamandar birer aydan beri swrap kele jatqanına qaramastan qazaqstandıq vakcinanıñ äleueti men äser-saldarı turalı tolıq ğılımi qorıtındı dekrekteri aşıq aqparat resurstarına jariyalana qoymadı.

"The Qazaq Times"