ءمينيستردىڭ ءوز اۋزىنان: قازاقستان مەديتسيناسىندا نە بار، نە جوق؟

باس دارىگەردىڭ مالىمەتىنە قاراعاندا، ەلىمىزدە 135 توموگرافيا، 46 دياگنوستيكالىق ورتالىق بار ەكەن. ال ساراپشىلار پنەۆمونيا تۇرىندەگى ۆيرۋستىڭ اسقىنعان ءتۇرى ورشىگەن تۇستا مۇنىڭ ازدىق ەتەتىنىن ايتادى. 

بريگادا مەن جەدەل جاردەم جەتىسپەيدى. وتاندىق وندىرۋشىلەردەن 807 جەدەل جاردەم كولىگى الىنباق. ۇكىمەتتەن 1,2 ملن تەست ۇلگىسىن ساتىپ الۋعا ميلليارد تەڭگە قارجى ءبولىندى. وسى ارقىلى قور جەتىلدىرىلىپ وتىرادى. تەست جاقىن كۇندەرى كەلەدى.

ەپيدەميا احۋالىنا قاراي ايماقتاردا تەست تالابى بەكىتىلىپ، جەدەل جاردەم بريگاداسىنىڭ شاقىرتۋىمەن حالىقتى تەستىلەۋگە مۇمكىندىك تۋماق. وسى ورايدا ۆەدومستۆو باسشىسى امبۋلاتوريالىق-ەمحانالىق كومەك قاشىقتان كورسەتىلەدى، ۋچاسكەلەر دەڭگەيىندە شامامەن 3 مىڭ ءموبيلدى بريگادا قۇرۋ جوسپارلانىپ وتىرعانىن حابارلادى.

– 7 جىلجىمالى زەرتحانا جۇمىس ىستەپ تۇر. شىلدە ايىندا تاعى 8 دياگنوستيكالاۋعا ارنالعان ءموبيلدى زەرتحانا ساتىپ الۋ كوزدەلگەن. بۇلاردىڭ بارلىعى اۋىلدى جەرلەردە قولدانادى. قازىرگى ۋاقىتتا جامبىل وبلىسىنىڭ قورداي جانە الماتى وبلىسىنداعى ەڭبەكشىقازاق اۋدانىندا پايدالانىپ جاتىر، – دەدى مينيستر.

ەلدەگى ستاتسيونارداعى ورىنداردىڭ 60%-ى تولىپ قالعان. استانا مەن الماتىدا بۇل كورسەتكىش 90%-عا دەيىن جەتتى.

رەسپۋبليكا بويىنشا 348 مەديتسينالىق مەكەمەدە 26 مىڭ توسەك-ورىن دايىندالعان. تامىز ايىنىڭ سوڭىنا قاراي رەانيماتسيا جانە ينتەنسيۆتى تەراپيا بولىمدەرى بار قوسىمشا 10 مىڭ ورىن ازىرلەۋ جوسپارلانىپ جاتىر. قازىرگى تاڭدا قازاقستاندا 3294 دانا جاساندى تىنىستاۋ اپپاراتى (يۆل) بار، ونىڭ 907-ءسى ماۋسىم ايىندا ساتىپ الىندى. الداعى ۋاقىتتا تاعى مىڭ قۇرىلعى ساتىپ الىنباق.

30 ماۋسىمداعى ەسەپ بويىنشا، ۆيرۋس جۇقتىرعان 23,6 مىڭ ناۋقاس ەمدەلىپ جاتىر. ستاتسيوناردا 9800 ادام جاتسا، 13,8 مىڭ ناۋقاس امبۋلاتور-پوليكلينيكالاردىڭ باقىلاۋىندا. ءۇش مەگاپوليستە جاڭا ءمودۋلدى ەمحانادا جانە 340 مەديتسينالىق مەكەمە 27 991 ورىندىق ستاتسيونارعا اينالدى. ايماقتاعى ەپيدەميا جاعدايىنا بايلانىستى قوسىمشا ورىندار اشىلىپ وتىراتىن كورىنەدى.

جوعارىدا بەرىلگەن دەرەك-مالىمەتتىڭ ءبارىن جاقىندا دەنساۋلىق ساقتاۋ ءمينيسترى بولىپ تاعايىندالعان الەكسەي تسوي بۇگىن ەلورداداعى ورتالىق كوممۋنيكاتسيا قىزمەتىندە وتكىزگەن ونلاين بريفينگىندە ايتتى.

ەلدە ءدارىحانالاردا ءدارى تاپشىلىعى پايدا بولدى. ورتالىق باستى ءدارىحانالاردىڭ الدىندا ۇزىن سونار كەزەك. قازاقستاندىقتار ۆيرۋستىڭ كلينيكالىق بەلگىلەرىنە ۇقساس اۋرۋمەن جاپپاي اۋىرا باستاعان. جەدەل جاردەم قىزمەتى ۇلگەرە الماي، تەك جاعدايى اۋىر ناۋقاستاردى تاسىمالداپ جاتىر. اۋرۋحانالار لىق تولى، كادر جەتىسپەيدى. كەيبىر ءوڭىر اكىمدىكتەرى دارىگەرلەرگە ۆاكانسيا جاريالاۋدا. بۇگىنگى تاڭدا ۆيرۋس جۇقتىرىپ، جالپى دەرەكقورعا تىركەلگەن ناۋقاستاردىڭ جيىنتىق ەسەبى 40 مىڭعا تايادى. الەمدە بۇل كورسەتكىش 37-ورىنعا تيەسىلى. دەگەنمەن بۇدان وزگە كۇنىنە مىڭداعان ادام پنەۆمونيا بويىنشا انىقتالىپ وتىر. ماماندار مۇنى كەزىندە بايقالماي، بۇگىن اسقىنعان كوروناۆيرۋستىڭ سالدارى دەپ باعالايدى. الايدا قازاقستاننىڭ دەنساۋلىق ساقتاۋ مينيسترلىگى ددسۇ-عا تەك سيمپتومدى ناۋقاستاردىڭ عانا ەسەبىن ۇسىنۋدا. ساراپشىلار ناۋقاستاردى اۋرۋ بەلگىسى بار-جوعىنا بايلانىستى ەكىجاقتى ەسەپ جۇرگىزۋدى، ۆيرۋسى اسقىنعانداردى  جازدىگۇنى پنەۆمونيا قاتارىنا قوسۋدى «ستاتيستيكانى بۇركەمەلەۋ ارقىلى شىنايى جاعدايدى جاسىرۋ، مانيپۋلياتسيا» دەيدى.

پرەزيدەنت توقاەۆتىڭ «حالىق ۇنىنە قۇلاق اساتىن مەملەكەت تۇجىرىمداماسى» كەڭىنەن ناسيحاتتالىپ جاتقان تۇستا ەل ۇكىمەتى مامانداردىڭ بۇل سىنىنا ءالى مويىن بۇرا قويعان جوق.

“The Qazaq Times”